Read turkana Ngieburaniae 8 Bible Online

Ngieburaniae 8 - turkana bible

Ngieburaniae 8

¹Akiroit nateno na tokona kiruoro ngesi na kibala, eyei ngoni Emuron Loapolon a akai a Akuj lo ibooyi alowae alo aloteten a ekicholong alo a apolou a Akuj anadis.

² Esubi ngesi etich lo Emuron a Loapolon a akai a Akuj ani Italeuno Noi, erai neni tooma eam lo a iteni lo aduki Ekapolon, meere ngitunga.

³Eseunio Emuron Loapolon a Akai Akuj daang alemikin Akuj ngalemikinet ka ngakipeyos. Aloger alopei kangolo, ejoikinit Emuron Loapolon a akai a Akuj ngolo dang eyei ibore ni elemuni.

⁴Arai kolong tarai ngesi eka akwap, pekeliworo ngesi emuron a akai a Akuj, kainyo eya ngimurok luche a akai a Akuj lu elemuunete ngalemikinet iwapap ka eger a etal a Ngiyaudi.

⁵Erai etich kech lo eraakatar ngimurok a akai a Akuj ekitetemes ka etorube ana eya nadis. Ekote ngakiro neni tani kolong ani a Musa. Nakolong aapikinea asubakin Eam ngolo, tolimok Akuj tama, “Tosubak ibore daang itemem ka ekitetemes lo kidodikinio iyong alomoru.”

⁶ Nakaneni ainakin tokona Yesu etich loajokon noi lo idwangit lokech, toliwor Emuron Loapolon a akai a Akuj, loger lo ejokia noi achamunet na etachamunea ngesi Akuj ka ngitunga keng, kainyo erai aka ngakichikakinet ana a ngakiro anaajokak.

⁷Arai kolong nyeesechech achamunet na a ekingaren, pakesakitae nabo na a ngaarei.

⁸ Nakaneni abala Akuj esechito ngitunga keng na alimunio tama, “Ebala Ekapolon epote ngirwa lu kichikakinor ayong ka Ngisirael, ka ngitunga a ekitela a Yuda, achamunet nakitetet.

⁹Nyikokini achamunet na kichamakin ayong kata apaakech akolongit na atingea ngakan atoriku alo Misiri. Kona pearubakineta kesi iwapito ngakiro na kichamakin ayong ka kesi, abu ayong nyaamisik kesi.

¹⁰Ebala Ekapolon, ngirwa lu monan epote, achamunet na ngesi kichamakin ayong ka Ngisirael. Eteyenuni ngitalio kang alotamen kech, nabo egiri lotai kech. Aliwor ayong Akuj kech, nabo eliworosi kesi ngitunga kang.

¹¹Emam itwaan itatami itwaan a akwap keng, kori emam ni elimokini lokaatokeng tama, ‘Toyenu Ekapolon.’ Kainyo kayenunete ayong ngitunga daang, luapolok ka luuchik.

¹²Arimakini ayong kesi ngasechesea kech, nabo nyetamuni ngasechesea kech jik.”

¹³Iruoroe ngakiro a achamunet anakitetet ani etongorotonio Akuj na a ekingaren, nakaneni ibore ni engorotoni totoania, engopiari atipei.