Read turkana Ngieburaniae 9 Bible Online

Ngieburaniae 9 - turkana bible

Ngieburaniae 9

¹Achamunet na ekingaren, ayakasi ngitalio a eger alo ilipere ka ni italeuno ni ilipeenere ni erai ngitunga adukete.

²Adukio eam lo anyarao ewae lo anikalapatan ni italeuno. Tooma keng ayei ni asipor ataa ka emeesa lo ayakasi ngamugati na alemanakinio Akuj.

³Naabor a awaru ana a ngaarei, ayei Eam lo anyaritae lo Italeuno Noi.

⁴Tooma eam ngolo, ayei ekeno lo ipeyonokinere Akuj lo enomere ngikinyaatei, lo abutakinitae egolit. Ayei nabo dang Asaduku na a Achamunet na abutakinitae egolit nabo toyei achupa naapolon a egolit na ayei akimuj na enyaritae manna. Tooma achupa ngina, ayei tani aburo a Aron na eminiaunit ngakui ta nabo ngamoru ngaarei elolotae kigirae ngitalio.

⁵ Kidiama Asaduku ngina ayakasi ngiborei lua ngabeben lu esileereunito ayakau a Akuj, apetakina ngabeben kech ni arimanakinere ngasechesea. Nakaneni nyerai tokona esaa lo isisaunere ngakiro daang.

⁶Asubio ngakiro nguna daang loger ngolo. Toliwor epit a ngimurok a akai a Akuj aloseenen akolongit daang akisub etich kech anikalapatan a eam,

⁷nakaneni erai Emuron Loapolon a akai a Akuj bon elomari tooma eam alomaret apei a ekaru a epei. Eyaari ngesi ngaakot nak Akuj kotere ngasechesea keng ka ngasechesea na asechete ngitunga peeyenete atamar kisechit.

⁸Kitatami ngoni Etau a Akuj a eger a ngakiro kanguna kadaang atamar eringa erot lo elomarere ni Italeuno Noi nyengaara arai keringa cha eam lo anikalapatan ewei.

⁹Eraakasi ngakiro nguna ngakisikwaanet a ngakiro ana a ngirwa kalu. Idodiunito atamar ngakipeyos ka ngalemunet na elemanakinio Akuj, nyitiliworete ngitai a ngitunga alu ilipito Akuj lu ikiuna,

¹⁰kainyo eraakasi ngakiro ngaka ngimujen ka ibore matat ta ngakiro ngache nakaalak na italeunere ngitalio. Eraakasi ngulu daang ngitalio lu italeunitere akwaan nakaneni engopiarete na isiakinea Akuj eboyor lokitetet.

¹¹Nakaneni abu kolong Kiristo lo erai Emuron Loapolon a akai a Akuj a ngakiro anaajokak adolut ne. Esubi ngesi etich keng aloeam alo ejok noi nabo kikiuna noi, lo nyesubio a ngakan a ngitunga. Ngesi atamar, meere eka ngakwapea ana kolong asubio kanu.

¹²Alomari kolong Yesu ni Italeuno Noi alomaret apei bon, nabo dang, peatingit ngesi ngaakot a ngakinei kori na a ngaatuk esaki alemun erai ngakipeyos. Alomari ngesi a ngaakot keng a elope sodi kitoyuu ngoni jik.

¹³Iwasakinio ngitunga lu esechito etal ngaakot a ngakinei ka ngimongin ta ngimuudui a itaok ani epeitoe, sodi tomookere ngawat kitaleunos.

¹⁴ Nakaneni, esubasi ngakiro natenoik noi anaakot a Kiristo! Kotere agogongu a Etau a Akuj alokajik, alemun Kiristo ani a Akuj toliwor ngakipeyos na ikiuna. Itosegete ngaakot keng ngitai yok alotalio alu pasiek, sodi atosubeta ngoni etich a Akuj ana eyari.

¹⁵Kotere nguna, Kiristo ngesi eree ngakiro a achamunet anakitetet, sodi taanyuneta lu anyarae Akuj apiaro nakajik nakichikak Akuj. Esubakinio nguna kainyo ayei akitu na elachakini ngitunga dir kitulung naaronok na asubete kesi eringa achamunet na a ekingaren eyei.

¹⁶Ani anakichikakinet ana irumea itwaan ibore, echamunio ngakiro a akichikakinet kangina erai keyen dir atamar atoana itwaan nilope a ibore.

¹⁷Emam itwaan echamuni ngakiro a akichikakinet ana irumea itwaan ibore mati ketoana ilope, kainyo emam ibore esubakini akichikakinet ngina eringa ilope a ibore kangini eyari.

¹⁸Erai ngesi tani kolong peachamunere ngakiro a achamunet ana a ekingaren eringa ngaakot nyebukoro.

¹⁹Alimokini mono Musa ngitunga ngakiro daang na adungunitoe loger lo egiritere Lotal. Sodi tolem ngesi ngaakot a ngitak ka ngakinei kimorik ka ngakipi, ani erumor tolem ateni a ngakui a ekitoe alo enyaritae isopo*g** ka etesiro lotiarengan dio kiwasak nakitab a etal ka ngitunga daang.

²⁰Tolim tama, “Ngaakot nu kesi iyookinete achamunet na kidungok esi Akuj atamar kiwapa.”

²¹Kiwasak Musa ngaakot loeam ka ngiboro daang lu elipeenere, lopit lopei ngolo.

²² Ikongina bocha, italeunio ibore daang a ngaakot iwapap ka eger lopalem a etal a Akuj, nabo erai mati kebukor ngaakot ngesi erimakinere ngasechesea.

²³Ajoikinit ngiboro lu eraakasi ekitetemes alu eya nadis italeunio loger ngolo. Nakaneni, italeunio ngiboro lu eraakasi ngika a adis a ngakipeyos ana ejokak noi idwangito nguna.

²⁴Kainyo pealomari Kiristo ni italeuno ni adukete ngitunga erai ekitetemes ani a iteni. Nakaneni alomari ngesi nadis ni tokona ewaar ngesi alongaren Akuj kotere ngoni.

²⁵Elomanari Emuron Loapolon a akai a Akuj a Ngiyaudi ni Italeuno Noi alomaret apei a ekaru a epei etingit ngaakot a etiengit. Nakaneni pealomari Kiristo neni sodi tolemunor ngalemunet ngakaalak,

²⁶kainyo arai kikote neni, keboliatere ngesi ngaboliaret ngakaalak napei kolong asubakinere akwap. Nakaneni abu tokona ngesi ekisidi kanguna kadaang abunet apei, tolema akisech kotere ngakipeyos keng a elope.

²⁷Etoani itwaan daang atoanet apei ani erumor kirira Akuj.

²⁸ Alopit alopei kangolo alemunio Kiristo dang alemunet apei dio toliwor akipeyos na elemari ngasechesea a ngikaalak. Etakanuni ngesi na a ngaarei, meere kotere ngasechesea, nakaneni erai ayuun lu idarito ngesi.