Read turkana Yakobo 1 Bible Online

Yakobo 1 - turkana bible

Yakobo 1

¹ Ayong Yakobo ekasuban etich a Akuj ka lo a Ekapolon Yesu Kiristo ngesi egirunit abarua naga. Emalae ngitela lutomon ka ngiarei lu epetakina nakwapea daang.

²Ngikaitotoi kang, talakaros noi na kitingeta esi ngakiningioto nagelagelae,

³kainyo iyenete esi atamar na ipiunio anupit kus ngakiningioto, kitaanyuni esi anaikinit.

⁴Toyena dir atamar kigangi esi anaikinit kus jik, toliworotor lu ikiuna nabo lu itemokino, emam ibore iituno.

⁵Ani keyei ipei anikus ni emam aosou, ejoikinit ngesi ilipi Akuj na einakini ngesi, kainyo einanakini Akuj ngitunga daang a apatanu ka ajokis.

⁶Nakaneni ani na ilipea iyong, ejoikinit inupi dir emam ibore ingayat. Itwaan cha daang ni engayat, ikoni ngitoroi a anam lu ijukit ekuwam ilapanarosi.

⁷Nyeetama itwaan ni ikoni neni kori eyei ibore aanyuni ani a Ekapolon Yesu,

⁸kainyo erai ngesi itwaan ni etiakit ngitai ngaarei, esadanakini alorotin kadaang.

⁹Ekiristoit lo ibootonit, ejoikinit elakar na ikeunea ngesi Akuj,

¹⁰ani lokabaran ejoikinit elakar na etiyaunea ngesi Akuj. Kainyo engopiyari ekabaran loger a aturot ana a amoni.

¹¹ Ejupuni akolong erirae noi tonom ekitoe, eraraunosi ngatur tongopia asir keng. Aloger alopei kangolo, inyasun ekabaran esaa lo esubea etich keng.

¹²Epiaritae itwaan ni enaikini ngakiningioto kitiru kainyo ani kitiru ngesi einakinio ebachit lo akiyar, lo echikakini Akuj lu eminasi ngesi.

¹³Ani kining itwaan, nyejoikinit elimuni tama, “Akuj ngesi keningit.” Kainyo nyiningete Akuj ngakiro naaronok, nabo emam itwaan iningi ngesi.

¹⁴Nakaneni iningio itwaan na iriarea ngesi nabo tominu etereku keng loaronon.

¹⁵Sodi etereku ngolo ani kiraka itwaan, irokuni akisech, ani kemasikin akisech nitwaan, irokuni akitu.

¹⁶Warasi nyikingalae ngikaitotoi kang luminan!

¹⁷Ebunit ainakinet daang naajokon na ikiuna anadis, ebunit Anakuj ana kolong asubuni ibore ni echai anadis daang. Nyibelo ngesi jik kori nyerea min etorube.

¹⁸Kotere echami keng a ilope, abu ngesi kitaanyu ngoni akiyar keng anakiroit ana iteni, sodi atarauneta ngoni lu kingareni aloborei kadaang alu asubi ngesi.

¹⁹Ngikaitotoi kang luminan, toyena ngakiro nugu! Ejoikinit itwaan daang erai ni ikirikira apupokin, nakaneni toliwor ni edidis akiruorikin nabo nyeengo atipei.

²⁰Kainyo nyitaanyuni angoit itwaan ngakiro a Akuj na eteniyete.

²¹Nakaneni totiakisi ngakiro na a ngileech ka naaronok daang tachadasi nialonan. Tokera Akuj tachamut akiroit na iwaakini ngesi lotai kus, na epedori ayuun esi.

²²Ejoikinit isubete na elimunito ngakiro a Akuj, meere akipup bon, toliworos ingalasi make.

²³Itwaan cha daang ni epupi ngakiro a Akuj nakaneni nyeesub loger lo elimunitotor ngakiro a Akuj, ikoni itwaan ni isemee ereet keng anakiyo.

²⁴Isemo ngesi niajokon ani erumor torotok, sodi kimuriak atipei eger lota ekoni.

²⁵Nakaneni itwaan cha daang ni isemee etal lo ikiuna lokojokon lo elachanakini ngitunga dir, ngini erubakini irichunit nabo nyerai lo epupi dio kimuriak, nakaneni esubi loger lo elimunitotor ngakiro a Akuj, epiari Akuj itwaan ngini anakiro ana esubi.

²⁶Ani keyei itwaan ni itamit atamar ewapit ngakiro a edin, nakaneni nyiiyapunite ngesi angajep keng anakiro a naaronok, erai edin keng pas nabo ingala ngesi bon.

²⁷Edin loajokon lo ikiuna alongaren Akuj Apa ngesi lo, ngesi lo a achoikin ngikokiok ka ngapuseru alochan kech ka akirichun iyong ilope nyikitoron ngakiro a akwap.