Read turkana Yakobo 2 Bible Online

Yakobo 2 - turkana bible

Yakobo 2

¹Ngikaitotoi kang, kona inupitotor esi Ekapolon yok Yesu Kiristo lo erai Ekapolon a apolou, warasi nyiitiakatiakata ngitunga kotere asir kech.

²Kainyo ani kebu ekabaran lo enapit ekabaabat lo egolit ka ngiworui lukaanikak ajokak lokiriam kus, sodi tolom ekebootonit dang lo enapit ngiworui lu ekorisiuna.

³Ani kidodiu iyong arimatoi ani eyei lo enapit ngiworui luajokak sodi tolimok tama, “Kiboikin lokicholong loajokon logo,” nakaneni tolimok ekebootonit tama, “Towo kaama, kori kiboikin kwap nege diyete ngakejen kang,”

⁴tokona, nyipakanara cha esi ngitunga a, nabo itiakuunut ngakiro alotamen aluaronok a?

⁵Topupokisi ngikaitotoi kang luminan! Aseu Akuj ngitunga lu ibootonit anakwapea kanu sodi toliworos ngitunga lu enupito ngakiro a Akuj lokojokon noi, nabo taanyut apolou na echikakini ngesi lu eminasi ngesi.

⁶Nakaneni ijamuarito esi ngikebootok! Tokona, meere ngikabarak kichekiyarito esi nabo kesi kirito esi nitubet ekies a?

⁷ Ikwa meere kesi imenyete ekiro loajokon kilimokin esi a?

⁸Isubete esi na iyookino erai kiwap ngakiro a etal a Apolou a Akuj loger lo igiritere nagiran kona, “Tominak ekidunyet kon loger lo iminar iyong akwaan kon a ilope.”

⁹Nakaneni ani kiminakis esi ngitunga kotere esire kech, isechito esi nakaneni kirirae esi etal atamar iraakasi lu isechito etal.

¹⁰Itwaan cha daang ni esechi etal epei, esechi daang.

¹¹Kainyo lopei kolong alimuni tama, “Nyiilom,” ngesi nabo abala, “Nyiiar.” Tani pekilom iyong, isech iyong etal erai kiar.

¹²Kanguna kiruoro nabo tosuba ngakiro loger a ngitunga alu irirao a etal alo kilachakini ngoni dir.

¹³ Kainyo aloriras a Akuj, nyisieni Akuj itwaan ni nyisieno ngitunga luche, nakaneni idwangito ngisien eriras.

¹⁴Ngikaitotoi kang, nyoni ajokis a itwaan ani elimuni atamar arai ngesi ekanupan tarai nyidodiunito ngakiro na esubi ngesi kongina? Epedori anupit ngina ayuun ngesi a?

¹⁵Ani keya ngikaitotoi ka ngakaitotoi na emam ngiworui ka akimuj nanyamat.

¹⁶Nyoni ikajokon ilimokineta esi kesi tamasi, “Kipiari esi Akuj! Kipiara akim sodi kimuja niajokon!” Tarai nyeinakina esi kesi ngiboro lu eyareta?

¹⁷Ikoni anupit neni, ani kerai anupit bon inupit iyong tamam ibore ni isubi, ikoni anupit ngina ibore nikatoan.

¹⁸Nakaneni elimuni itwaan iche tama, “Erai itwaan ipei ikanupan, erai niche nikasuban ngitichisio.” Ngakiro na atachakini ayong ngesi nugu, “Kidodikinae ayong eger lo eliworor itwaan ekanupan emam ngitichisio esubi. Kedodikini ayong iyong eger lo araakar ayong ekanupan a ngitichisio alu asubi.”

¹⁹Inupit iyong atamar erai Akuj apei bon a? Itemokino nguna! Nakaneni enupito tani ngipean kongina, nabo emaranete a ebuloi.

²⁰Etige ekabangabangat! Isaki iyong kidodikin atamar erai anupit na emam ngitichisio pas a?

²¹Ekokini kolong apaayok Aburaam echamun ka Akuj ai? Achamun kotere ngitichisio keng, na alemunea ngesi lokookeng Isaka kiwaak lokeno lo ipeyonokinere Akuj.

²²Ingolik tokona a? Anupit keng ka ngitichisio keng, asubete daang etich aapei, aliwor anupit keng na ikiuna kotere ngitichisio keng.

²³Sodi kiyookinos ngagiran na igiritae kona, “Anupi Aburaam ngakiro a Akuj, kotere anupit keng, kimaru Akuj ngesi atamar erai itwaan ni etenoono.” Kotere nguna tanyarae Aburaam lopae keng a Akuj.

²⁴ Ianyungasi tokona a, echamun itwaan ka Akuj kotere ngitichisio keng, meere kotere anupit keng bon.

²⁵Ekote ngakiro neni tani ani a amalaat ana anyaritae Raab. Achamunosi ngesi ka Akuj kotere ngitichisio keng, ani etepeyonea ngikarebok lu a Isirael nabo kingarak kesi tosiwa a erot a eche.

²⁶Tokona bocha, loger lo ikonea akwaan na etoanit emam Etau a Akuj, anupit dang ikoni na etoanit emam ngitichisio.