Read turkana Yakobo 3 Bible Online

Yakobo 3 - turkana bible

Yakobo 3

¹Ngikaitotoi kang, nyejoikinit ngikaalak kus eliworosi ngiketatamak. Loger lo iyeneta esi atamar kirirao ngoni ngiketatamak lokojokon noi akidwang luche.

²Kainyo elalak ngakiro na kichwanganakini ngoni daang. Ani keyei itwaan ni nyichwanganakini anakiro ana iruoro, erai ngesi itwaan ni ikiuna ni epedori akirichun akwaan keng daang.

³Kirepanakini ngoni akitoe lokume a asikiria kisaki kiwap ngakiro yok, nakaneni kipedori ngoni akisiitor ngesi ni kisaki.

⁴Kingolikisi tani atubwa, tani kepolot kwaani, nabo kijukite ekuwam loapolon, eyei ikiguriet niichi ni epedorea ekeguron areere.

⁵Eger a angajep dang ngolo, erai ngesi ibore nidiochichi, nakaneni epedori alimun ngakiro nakationok noi na a ngiwog. Toyen cha eger lo epedorea ekatwanyit a akim anomiar amoni daang etia ni etia!

⁶Ikoni angajep dang akim. Erono noi lokojokon, eyei ngesi nawat yok nabo ekeikinit aronis nawat yok daang. Enomianari eboyor yok daang a akim ana ebunit anakim ana nyedungeene.

⁷Epedori itwaan akitapatanuun nabo etapatanu ngitieng luche daang, ngitieng a amoni ka ngikieny, ngiborei lu eliato ta ngikolea.

⁸Nakaneni emam itwaan apedo akitapatanuun angajep. Erono angajep nyirichun jik, nabo ileleba akisierit nakaaran.

⁹Erai ngesi kibuanakinea ngoni Akuj Apa na erai Ekapolon yok alakara nabo ngesi kilamea ngitunga lu kolong asubuni Akuj ikwaan ka ngesi.

¹⁰Itorunito ngakiro napiaret ka nakilamet nakituk apei. Ngikaitotoi kang, nyejoikinit nguna ikokinete neni!

¹¹Epedori eitanit a elelea a epei aitun ngakipi nakaalimok ka nakaabarak imorikina a?

¹² Ngikaitotoi kang! Nyepedori ekitoe lo ikwaan ka emeyen akonere ageor a ngikito a akimiet, nyepedori emusabib akonere ngameyana, kori nyepedori elelea lokaabaran aleleun ngakipi nakaalimok.

¹³Eyei itwaan anikus ni eos tochwaana a? Echamit ngesi idodiuni a eboyor keng a loajokon ka ngitichisio keng luajokak lu itiditeunor ngesi nabo toos.

¹⁴Nakaneni ani kileleba ngitai kus arorokanut, aremo ka abolo na idingatar, tojongoto akiwoga kitiliwosi ngakiro na iteni alioko.

¹⁵Nyebunit aosou na ikoni ngina anadis, erai aka akwap kana, nyerai aka a Etau a Akuj, erai aka a Ekipe.

¹⁶Ni eyei arorokanut ka adinga, eya nginyas dang ka ngakiro naaronok daang.

¹⁷Nakaneni mono ekingaren, ikiuna aosou na ebunit alokidiama, nabo erai aka ekisil ka apalaanut ta aelo. Erai na ileleba ngisien ka ngakiro naajokak nakaalak, emam akipakarit ngitunga ngiche, kori amodeanut.

¹⁸Erai ajokis ngalemet a ngikinyam alu itaate lu eminasi ekisil.