Read turkana Yakobo 4 Bible Online

Yakobo 4 - turkana bible

Yakobo 4

¹Nyai ni ebunitor ejie ka eburas lu eya kiding kus? Itorunito lotereku kus lo isaketa esi amera, etereku ngolo itibitibi ngawat kus.

²Isakete esi ngiboro nakaneni nyianyunete, sodi tasaka esi akiar. Kimuyete esi ngiboro lokojokon noi, nakaneni nyianyunete, sodi kiburata esi nabo tojwoto. Nyianyunete esi ibore ni isakete kainyo nyilipa esi Akuj ibore ngini.

³Ani na ilipeta esi, nyianyunete kainyo eroko na ilipitotor, ilipasi esi ngiboro sodi tomeratar esi.

⁴Abe iraakasi esi ngitunga lu nyikimunoi! Nyiyenete esi atamar aelokin ka ngitunga a akwap erai aliwor emoit a Akuj a? Itwaan cha daang ni esaki aliwor epae a ngitunga a akwap, eliwor emoit a Akuj.

⁵Nyiitamasi kori ngaka alioko ngakiro na igiritae nagiran kona, “Iterekuyarit ngesi Etau lo ewaak Akuj niyok.”

⁶ Nakaneni egogong noi ajokis na kitaanyunit Akuj, loger lo igiritere nagiran kona, “Itopegi Akuj lu inisasi, nakaneni itaanyuni lu itiditeuna ajokis.”

⁷Tokona bocha, kiwapa ngakiro a Akuj. Kitopega Ekipe, nakaneni ematar ngesi ani iyakasi esi.

⁸Taapuutu nia Akuj, dio taapuu ngesi dang nikus. Kilotasi ngakan kus esi ngikasechak! Kitaleutu ngitai kus esi ngikamodeanak!

⁹Kialolongo, kigoro nabo tosutonokis, kilocho akiana kus toliwor akigoro, nabo alakara kus toliwor akimoore!

¹⁰Kitiditeunos alongaren Akuj, nakaneni kikeuni ngesi esi.

¹¹Ngikaitotoi kang! Nyiitoronasi esi make. Itwaan cha daang ni itoronit lokaatokeng lokiristoit kori ni irirae, itoronit ka akirirare etal. Ani kirirae iyong etal, ikwa nyeringa iyong irai ekewapan etal, nakaneni iliwor iyong ekeriran.

¹²Akuj bon erai akepotoron a etal ka akeriran. Ngesi bon epedori ayuun ka amunyar. Itamit iyong atamar iyong ngesi ngae, iriraa iyong ekidunyet kon?

¹³Topupokisi mono esi ngakiro kang, esi lu ibalasi, “Akolongit na kori moi, kilosi lore eche, eboikinos inaa ekaru epei sodi atolomakisi egielit, atoriamutu ngaropiyae nakaalak.”

¹⁴Nyiyenete esi tani atamar ikokini eboyor kus moi ai! Ikote esi eloch lo etakanuni kotere esaa lodiochichi ani erumor tongopiya.

¹⁵Ejoikinit iyong ilimuni kona, “Ani kechamit Ekapolon, kiyari sodi atosuba nugu ka ngun.”

¹⁶ Nakaneni inisasi tokona esi nabo iwogasi, ngiwog lu ikote ngulu daang, eroko.

¹⁷Tokona bocha, itwaan ni nyesubi ngakiro naajokak na ejoikinit ngesi esubi, erai ekasechan.