Read turkana Yakobo 5 Bible Online

Yakobo 5 - turkana bible

Yakobo 5

¹Ani tokona esi ngikabarak, topupokisi ngakiro kang! Kigoro tosutonokis kotere ngichan lu ianyunete esi!

²Abosia ebari kus, nabo amunyasi ngiworui kus ngakimam.

³Erika egolit kus ka akwangat ekut. Ekut ngolo ngesi idodiuni atamar isechito esi, nakaneni enomiari ngawat kus loger a akim. Ingadaasi esi ebari kus alalaar ngirwa lu esal lugu.

⁴Itowosotor esi ngitunga lu esubete etich anamanat kus emam ngaropiyae itanyam. Topupokisi ngakiro na iburaata kesi! Akigoro kangulu elemete ngamanat kus, anang naki a Akuj Namerikanyer.

⁵Ibooyete esi anakwapea kanu anajako ka amera, itutumasi esi kotere akolongit na kingolere.

⁶ Irirata esi nabo iar itwaan ni etenoono nakaneni nyikitepegi ngesi esi.

⁷Ngikaitotoi kang, totitinyikisi robo ngichan tanang na ebunio Ekapolon Yesu. Kingolikisi eger lo etitinyikinitor eketan idarit amana keng ebwangi ngalemet naajokak. Idari ngesi akiru na a erupe ka na a akiporo etitinyikinit.

⁸Ejoikinit esi dang ititinyikinete. Torubakisi igienosi lokojokon, kainyo aapuu akolongit na ebongunio Ekapolon.

⁹Ngikaitotoi kang, tojongoto akiburare make sodi nyikirira esi Akuj. Aapuu Ekeriran, edikino etakanuni.

¹⁰Ngikaitotoi kang, kitamutu ngikadwarak a Akuj lu eruorosi elimito ekiro a Ekapolon. Toyena atamar eraakasi kesi ekitetemes a atitinyikinit ngichan.

¹¹ Kibala ngoni araakasi kesi lu apiaritae ani anaikineta. Iirasi esi ngakiro a atitinyikinit ka Yob, nabo iyenete esi na asubea Ekapolon ngesi adaunet kanguna. Kainyo ileleba akisienut ka ajokis nia Ekapolon.

¹² Kanguna kadaang ngikaitotoi kang, tochoito ikongete anakiro ana ichikakinete. Tochoito ikongete adis kori ngalup kori ibore niche daang. Tolim tama, “Ee” na iikinitor ngakiro, kori “Mam” na ingeritor, sodi nyikirira iyong Akuj.

¹³Eyei itwaan alokiding kus ni ichana a? Ejoikinit ngesi ilipi. Eyei itwaan idio elakara a? Ejoikinit ngesi eokini ipuruunit Akuj.

¹⁴Eyei itwaan idio ni edeaka? Ejoikinit ngesi enyarae ngikasukou a ekanisa kilipakis ngesi sodi kiwasakis akimiet elimito ekiro a Ekapolon.

¹⁵Akilip enupitae itangalekini itwaan ni edeak, itojoki Ekapolon ngesi, nabo ani kesechit ngesi, erimakinio ngasechesea na esubit ngesi.

¹⁶Tokona bocha, tolimonokinos ngasechesea kus make sodi kilipanakinos make sodi kitojok. Akilip a itwaan aniajokon, eyei agogongu na epedori akisub nakaalak.

¹⁷Arai Elija itwaan loger lopei yok. Kilip ngesi lokojokon noi atamar nyeeram akiru, nakaneni mam akiru abu taram a ngikaru a nguuni ka ngilapio ngikan-kapei.

¹⁸ Kilip ngesi nabo taram akiru nakaalan tokon ageor.

¹⁹Ngikaitotoi kang! Ani kibatar ipei kus anakiro ana iteni sodi tobuu itwaan iche ngesi,

²⁰ kitamutu nugu, itwaan cha daang ni ereuni ekasechan aloboyor keng aloaronon, eyuuni etau a ekasechan kangolo anakitu torimakinere ngasechesea nakaalak.