Read turkana 1 Petero 1 Bible Online

1 Petero 1 - turkana bible

1 Petero 1

¹Ayong Petero lo arai emeanara a Yesu Kiristo ngesi egirunit abarua naga. Egirakinit ngitunga luseuna a Akuj lu edokinito epetakina wadaang a akwap a Ponto, ka Galatia, ka Kapadokia, ka Asia ta Bitunia.

²Kiseunio esi ani achamitor Akuj Apa, nabo kitiliwo Etau a Akuj ngitunga lu italeuno, sodi kiwapa Yesu Kiristo nabo kitowatakin ngaakot keng. Agasi atamar taanyut esi ajokis ka ekisil lokojokon noi.

³Atobuakisi Akuj ka Apa a Ekapolon yok Yesu Kiristo alakara! Kona kisienitor ngoni ngesi noi, kitaanyu ngesi ngoni akiyar nakitetet ani eteyarunea Yesu Kiristo. Kitaanyu ngesi ngoni akigieno na a akiyar,

⁴nakaneni kiitanit ngoni aanyun apiaro na idaritor Akuj ngitunga keng. Kidaritor ngesi esi anadis, ni nyeboseta kori nyiinyasunotor kori nyeengopiareta.

⁵Eraakasi kesi ngakus, esi lu kichoikinit Akuj a agogongu keng niajokon kotere ayuuno na edikino idodiunio ngirwa lu a esal.

⁶Talakaros kotere nugu, tani bo kedikino tokona dang ialolongete wadio kotere ngakiningioto nagelagelae na kichanere.

⁷Eraakasi nguna tatakanunea anupit kus atamar erai na iteni. Tani egolit lo epedorio akinyasun, eroyeeneo a akim, nakaneni anupit kus na ejok noi idwangit egolit, ejoikinit eroyo sodi tanaikinea. Sodi taanyuneta esi ekipur ka apolou ta arimatoi Akolongit na idodiunere Yesu Kiristo.

⁸Iminasi esi ngesi tani pakianyungarito, nabo inupito esi ngakiro keng tani tokona peiteete ngesi. Nakaneni ilakarosi esi lokojokon noi a alakara ana a ekipur ana emam kona isisaunio,

⁹kainyo ianyunito esi ayuuno a ngitai kus, na erai ngesi inupitotor esi.

¹⁰Erai ngakiro nugu ngesi kolong esemooto ngikadwarak a Akuj lokojokon, nabo tongicha ngakiro a ayuuno kangina, sodi todwara kesi ngakiro a ainakinet ana adikino Akuj kiinakini esi.

¹¹Asakete kesi angichun atamar esubakinosi ngakiro nguna ori ka atamar esubakinosi kwaani. Esaa ngolo ngesi lo kolong edodikinit kesi Etau a Akuj lo ayei tooma keng, edwari ngakiro na enaikini Kiristo na eboliare ka ekipur lo iwapit aboliaro.

¹²Edodikini Akuj ngikadwarak lu atamar pearai etich kech lo ingarakinotor kesi ngikulepek, nakaneni arai lo kingarakinet esi. Ekote neni na eruorotor kesi ngakiro na tokona iirasi esi ani eya ngikiyaka lu alimorete Ngakiro Naajokak kotere agogongu a Etau a Akuj alo ameunio anadis. Ngakiro nguna ngesi esakete tani ngimalaikae akiyen.

¹³Tokona bocha, kiboikinos erikino ngitamen kus. Kirichunos, kigienokinos noi apiaro na ianyunete esi na idodiunere Yesu Kiristo.

¹⁴Kiwapa ngakiro a Akuj loger a ngide keng, warasi nyiiwapa eboyor loaronon lo kolong sek iwapito a abangaanut.

¹⁵Ejoikinit esi iraakasi lu italeuno anakiro kadaang ana isubete esi, loger lo italeunookor Akuj na kinyarae esi.

¹⁶ Igiritae nagiran kona, “Toliworos lu italeuno kainyo etaleuno ayong.”

¹⁷Inyarito esi ngesi Apa na ilipeta Akuj na irirae ngitunga daang a eger a epei, itemem ka na asub itwaan daang. Tokona bocha, kiboyoto eboyor kus daang kane anakwapin ikerito ngesi.

¹⁸Kainyo iyenete esi ibore ni kolong atachario sodi kitalachakinere esi dir aloboyor alopasit kolong irokunete esi ani kata apaakus. Pearai ibore ngini ni epedorio akinyasun, loger a akwangat kori egolit,

¹⁹nakaneni kitaleunio ngoni a ngaakot anatenoyek a Kiristo alo ekoni imesek ni emam ni ichwangakina kori ni emam akemer.

²⁰Aseuni kolong Akuj ngesi eringa ngakwapin nyesubakina nabo edodiunio ngirwa lu a esal lugu kotere ngoni.

²¹Kotere ngesi, inupito esi ngakiro a Akuj ana kolong eteyaruni ngesi sodi kitaanyu ngesi ekipur, sodi toliworos lu inupito nabo kigienos ngakiro a Akuj.

²²Kona tokona italeunotor esi ani iwapeta ngakiro na iteni, nabo iminakis dir ngikaitotoi luche, tominakinos esi make lokojokon a ngitai kus kadaang.

²³Kainyo kidoun esi nakitetet iraakasi ngide lu nyetoakete, meere lu etoakete, kotere akiroit na eyari nabo na nyedaun a Akuj.

²⁴Loger lo igiritere nagiran kona, “Ikote ngitunga daang nginyia, nabo ikoni ekipur kech dang ngatur. Eoniyorete nginyia, nabo eraraun ngatur,

²⁵ nakaneni erubi akiroit a Ekapolon jik.” Akiroit naga ngesi Ngakiro Naajokak na kolong kilimokinio esi.