Read turkana 1 Petero 2 Bible Online

1 Petero 2 - turkana bible

1 Petero 2

¹Tapalikisi tokona robo ngakiro naaronok daang na ikote alioko ka amodeanut ka arorokanut ta ngakiro na eraakasi ngaka ngiyeny daang.

²Kikokisi ngide luuchik lu imuito ngakile, toliworos esi dang lu kimuito ngakiro a Akuj, sodi topolout esi ani imaasa sodi kitoyuunere.

³ Loger lo igiritere nagiran kona, “Ianyut esi ngikulepek eger lo ejokia Ekapolon.”

⁴Potu nia Ekapolon, amoru na eyari na angerete ngitunga ebalasi erono, nakaneni aseuni Akuj aliwor naajokon.

⁵Potu nikeng loger a ngamoru ana eyarete, sodi kitodukere esi akai a Akuj na etau, na erai ngesi isubeta esi etich iraakasi ngimurok a akai a Akuj lu italeuno nabo lu elemuununete ngakipeyos a etau na italakarete Akuj ani a Yesu Kiristo.

⁶ Kainyo igiritae nagiran kona, “Aseuni ayong amoru naajokon, na ewaakini ayong Sion toliwor amoru na igangit akai, ani itwaan cha daang ni enupi ngakiro keng, nyirumete ngileech.”

⁷Etenoono amoru ngina noi anikus alu inupito, nakaneni ani ngulu nyenupito, “Amoru na kolong angerete ngikadukok ebaasi erono, ngesi tokona ajoker noi edwang daang.”

⁸ Nabo igiritae nagiran ngache kona, “Amoru naga ngesi edakari ngitunga, ataaba na ibusokini kesi.” Adakarosi kesi kainyo awounete akinup akiroit a Akuj, achamit Akuj kesi kikokis neni.

⁹Nakaneni iraakasi esi ebukut lo eseunitae, ngimurok a Ekapolon, ebukut lo italeuno, ngitunga a Akuj a alope lu aseun tolimosi Ngakiro Naajokak a Akuj ana kolong kinyarae esi anaribu kilomak nakicha keng naajokon noi.

¹⁰ Peiraakasi kolong esi sek ngitunga a Akuj, nakaneni iliworosi tokona ngitunga keng, peiyenete kolong esi sek akisienut a Akuj, nakaneni ianyut tokona esi ngisien keng.

¹¹Kemaimai ayong esi ngipaalon kang lu ikote ngitunga lu ibooyete anakwap ana nyerai akech nabo ikote ngitunga lu edokinito anakwapin kanu! Tongero etereku a ngawat lo erai ngesi ichani etau.

¹²Ejoikinit eboyor kus alobukui alu nyerai Ngiyaudi erai loajokon noi sodi ani kiruorotor kesi esi atamar isechito, toyana kesi ngakiro naajokak isubete esi sodi kipuro Akuj Akolongit na ebunio.

¹³Kotere ni iwapitotor esi ngakiro a Akuj, tokera ngitunga lu eraakasi ngikapolok daang. Tokera ekapolon a Ngiroma lo epolokinit luche daang,

¹⁴tokera tani ngikapolok lu aseu ekapolon lo epolokinit kesi akirirare lu esubete naaronok ka akipuruun lu esubete naajokak.

¹⁵Kainyo esaki Akuj esi tosuba ngakiro naajokak sodi kililingeta chek lu kiruorotor esi ngakiro na a abaangu.

¹⁶Kibooyoto loger a ngitunga alu elachakina dir, nakaneni warasi alachakina kus nyeeliwor ngesi idaitotor esi akisech, nakaneni kibooyoto loger a ngikasubak etich a Akuj.

¹⁷Kidodikisi ngitunga daang arimatoi, tominakisi lu eraakasi ngikanupak loger kus, tokera Akuj nabo kidodikis ekapolon a Ngiroma arimatoi.

¹⁸Kiwapa esi ngikasubak etich ngakiro a ngikapolok kus nabo kidodiutu arimatoi daang anikech, meere ani eya lu ajokak ka lukapatanak make, nakaneni tani ani eya lukaadengak.

¹⁹Kainyo kipiari esi Akuj erai kinaikis esi ni kiriebi kotere ni kiboliare pas a ngakiro ana echamit Akuj.

²⁰Kainyo nyoni ikajokon ianyunete esi erai kinaikis kibungao ani isechitotor? Nakaneni ani kinaikis esi ngichan tani na isubeta ngakiro na iyookino, kipiari esi Akuj kotere nguna.

²¹Kainyo ngakiro nguna ngesi kinyarare esi, kainyo aboliare Kiristo dang kotere esi, sodi totupeta esi dang ngesi lo erai ekitetemes.

²²Nyesecha ngesi, nabo emam itwaan eira ngesi nakanuan elimuni alioko.

²³Na amorere ngesi, nyemoro ngesi itwaan, na echanere ngesi, nyitoema ngesi itwaan, pearai abu ngesi kigienokin Akuj na erai akatubon ngakiro na eteniyete.

²⁴Kiristo elope ngesi ewoki ngasechesea yok anakwaan keng alokidiama apir, sodi atotoaka ngoni anakiro a ngasechesea nabo atoyara ana etenooko. Kitangalekin esi kotere ngajemei keng.

²⁵ Ikote kolong esi ngamesekin na awoliyorete alorot, nakaneni kibuun tokona esi kiwapa Ekeyokon ka Ekachoikinan a ngitai kus.