Read turkana 1 Petero 3 Bible Online

1 Petero 3 - turkana bible

1 Petero 3

¹Esi dang ngaberu, kiwapa ngakiro a ngikiliok kus, sodi ani keya ngikiliok ngidi lu nyenupito ngakiro a Akuj, tonupeta ani iteeto eboyor kus. Emam ngakiro tani pakilimut esi akiroit,

²kainyo ingolikinete atamar erai eboyor kus loa arimatoi, tarai lo ikiuna.

³Warasi enape kus nyeeliwor lo isirioto esi nikalapatan a ngawat, lo ikoni eger lo itokioto esi ngitim, kori akisir a ngasua a egolit kori akinap ngiworui lu esiritoe.

⁴Ejoikinit akibuseanu kus erai na ebunit alotau, akibuseanu na nyinyasun na etau alokapatanan nabo kisilite, akibuseanu na ikoni ngina ngesi ejoikinit Akuj noi.

⁵Kainyo ngaberu na kolong ngorok egienosi Akuj, esubusasi ani ewapitotor ngakiro a ngikiliok kech.

⁶ Ekoni Sara neni, ewapi ngesi ngakiro a Aburaam sodi tanyara ngesi ekapolon keng. Iraakasi tokona esi tanakookeng, erai kisuba na iyookino nabo kemam ibore ikerito.

⁷Esi dang ngikiliok, ani ibooyete ka ngaberu kus, toyena lokojokon atamar epalag kesi. Kidodikisi kesi arimatoi, kainyo eanyunete kesi dang ka esi aapei ainakinet a Akuj na a akiyar. Tosuba kongina sodi nyengerere ngakilipet kus.

⁸Esal, alimuni kona, ejoikinit esi daang eraakasi ngakiro a ngitai kus ngapei. Tominakinos make loger a ngikaitotoi, nabo tapataketa toliworos lu itiditeuna.

⁹Nyiitachakis ngakiro naaronok nakisubere kori ngichen lu kichenere, nakaneni ejoikinit itachi a apiaro, kainyo apiaro kolong kichikakini esi Akuj na kinyaraa esi.

¹⁰ Loger lo igiritere nagiran kona, “Itwaan cha daang ni esaki aminakin akiyar nabo tasaki aanyun naajokak, ejoikinit epalikini akiruor ngakiro naaronok nabo tapalik akisud ngakiro.

¹¹Ejoikinit epalikini akisub naaronok tosub naajokak, ejoikinit esaki ekisil a etau keng kadaang.

¹² Kainyo itee Akuj lu etenooko nabo epupi ngakilipet kech, nakaneni itopegi Akuj lu esubete naaronok.”

¹³Ngae kiwani esi erai kimuit esi akisub na iyookino?

¹⁴Nakaneni ani tani kiboliare esi ani isubeta na etenooko, kipiaritae esi noi! Warasi nyiikear itwaan idio, nabo nyeeriab ngitai kus ngakiro.

¹⁵Nakaneni kipuruutu Kiristo alotai kus ani eraakar Ekapolon. Toliworos jiik isadito atachakin itwaan daang ngakiro na kingisi esi esaki kisisaut ngakiro na igienosi esi,

¹⁶nakaneni kikokisi neni a apatanu ka arimatoi. Kitojoka ngitai kus, sodi ani kiyenyio, kirumeta ngileech lu kiruorotor esi ngakiro naaronok ani iraakatar ngirukitos a Yesu, tongopikis kesi ngakiro na elimunete.

¹⁷Kainyo ejok kiboliare ani isubea naajokak, keraakasi nguna na echamit Akuj, akidwang aboliaro kotere akisub naaronok.

¹⁸Kainyo atoani kolong Kiristo atoanet apei kotere ngasechesea, totoan itwaan niajokon kotere ngikasechak, sodi kitorikio nia Akuj. Aario Kirisio erai itwaan, nakaneni kiteyarunae erai etau,

¹⁹ani aloboyor alo araakar ngesi etau, tolot ngesi kitatam ngikaram lu eenikinitae lojela.

²⁰Eraakasi ngulu ngitai alu awounete akiwap ngakiro a Akuj na atitinyikinitor ngesi idarit Noa torumo akiduk atubwa. Ngitunga ngidikidio lu aya natubwa ngina, lu araakasi ngikan-kauni make, kesi ayuunio anakipi,

²¹ana arai ekitetemes a akibatiso ana tokona kiyuununea esi Akuj. Meere akibatiso alemar elos lo eyei nakwaan, nakaneni erai akichikakinet na echikakinio Akuj a etau aloajokon. Kiyuun esi kotere akiteyaruno a Yesu Kiristo,

²² alo alot nadis, ibooyi tokona anakan ana aloteten a Akuj, epolokinit ngimalaikae daang, ka ngapolosio na eya nadis ta ngationisio.