Read turkana 1 Petero 4 Bible Online

1 Petero 4 - turkana bible

1 Petero 4

¹Kona aboliare Kirisio, ejoikinit esi dang itamete loger lopei etami ngesi, kainyo itwaan cha daang ni eboliare akwaan keng, epalikini akisech.

²Napei tokona jik, ejoikinit bocha esi kirikito ngakiro na echamit Akuj, nakaneni meere kiterik etereku a ngawat.

³Adaun kolong esaa lokooyen isubete esi ngakiro na eminasi ngibukui lu nyerai ngikanupak akisub. Ibooyete esi alomalaanu ka etereku a ngawat ka elewas ka amera a ekimuje ka na emasere epurot, ta nabo aronis na ilipitere ngakujo nasubuna.

⁴Nakaneni etalarito tokona lu nyerai ngikanupak ngakiro na nyeringa esi imorenakinosi ka kesi anamera ka eboyor loaronon, kotere nguna kiyenyete kesi esi.

⁵Nakaneni isisaunete kesi ngakiro nguna alongaren Akuj na esadit akirirare lu eyarete ka lu atoaka.

⁶Kainyo ngakiro nguna ngesi kolong etatamere tani lu atoaka Ngakiro Naajokak, ngulu eriratae eringa eyarete loger lo iriraare itwaan daang, sodi ani aloboyor kech alo etau kiboyoto kesi loger lo ibooyo Akuj.

⁷Aapuu esal a ibore kadaang. Kotere nguna, ejoikinit esi iyapunito ngakiro nabo tosubakina lokojokon, sodi topedoreta akilip.

⁸Anakiro kanguna kadaang, tominakinos make lokojokon, kainyo erapiyari amina ngasechesea nakaalak.

⁹Kipeyounutu esi luche nawiyei kus emam enguringur.

¹⁰Ejoikinit itwaan daang ingarakini niche a ainakinet ana ainaki ngesi Akuj, loger a ngikaweikinak alu ajokak eweikinito ngainakinet a Akuj.

¹¹ Itwaan cha daang ni itatami, ejoikinit itatami ngakiro a Akuj, itwaan cha daang ni esubi etich a Akuj, ejoikinit esubi a ngikilinga alu ainaki Akuj, sodi kipuruunoe Akuj a ibore kadaang, ani a Yesu Kiristo. Akuj ngina ngesi na erai ekipur ka agogongu ngakeng nakajik. Aamen.

¹²Ngipaalon kang luminan, warasi nyikitalasi ngakiro nakaapilak kiriebete esi, tosub kori eyakasi ngakiro ngache naparing esubasi anikus.

¹³Nakaneni ejoikinit ilakarosi ani kiboliare esi dang kona aboliare Kiristo, sodi talakarotor esi noi na idodiunere ekipur keng.

¹⁴Kipiaritae esi noi erai kiyeny ani iraakatar ngirukitos a Kiristo, idodiunit ibore ngini atamar eyei Etau a Akuj lo a ekipur nikus.

¹⁵Ani keyei esi lo eboliare, warasi nyeboliare kotere ni eraakar ekaaran kori ekokolan kori erukoot kori lo ematanakin ngakiro a ngitunga aluche.

¹⁶Nakaneni ani keboliare ngesi ani eraakar ekiristoit, nyiruma ngileech kotere nguna, nakaneni tobuak Akuj alakara ani enyaritere ngesi a ekiro a Kiristo.

¹⁷Anang esaa lo isiakinea eriras, nakaneni isiaunio mono kirirae ngitunga lu ilipito Akuj. Ani mono kisiak aniyok a, ikokini na enangea nia ngitunga alu nyenupito Ngakiro Naajokak na itorunito nia Akuj ai?

¹⁸ Loger lo igiritere nagiran kona, “Etiono ngitunga luajokak ayuuno, ani ikokinete ngikasechak lu engerito Akuj ai?”

¹⁹Tokona bocha, lu eboliare ani echamitor Akuj atamar toboliare, ejoikinit esubete naajokak sodi kigienokinotor Akuj Akasubunan kech jik, na irichit jiik asubakin na elimuni atamar asubakini.