Read turkana 2 Petero 1 Bible Online

2 Petero 1 - turkana bible

2 Petero 1

¹Ayong Simon Petero lo arai ekasuban etich ka emeanara a Yesu Kiristo ngesi egirunit abarua naga. Egirakinit ngulu etunup Akuj dir ngakiro keng loger lopei yok, kotere ateneanut a Akuj yok ka Ekayuunan Yesu Kiristo.

²Agasi atamar taanyut ajokis ka ekisil lokaalan noi ani iyeneta Akuj ka Ekapolon yok Yesu.

³Kotere agogongu a Akuj, kianyu ngoni ibore daang ni kisaki sodi atopedoreta akiboi eboyor lokikerea Akuj. Aloger alo kiyenea ngoni ngolo kolong kinyarae ngoni ataanyutu ekipur ka ajokis keng.

⁴Alorot kalo, kiinak ngoni Akuj ngainakinet naajokak noi na kolong kichikakini ngesi ngoni. Sodi topedoreta esi abuchun alotereku alo inyasuni ngitunga a akwap kotere ngainakinet nugu. Dio taanyuneta esi eboyor lo ikoni lo Akuj.

⁵Kotere napei nguna, kirichakinos kiatakis ajokis nanupit kus, kiatakisi aosou najokis kus,

⁶kiatakisi akiapunit ngakiro naosou kus, kiatakisi anaikinit nakiapunit kus ngakiro, kiatakisi aminakinit kus Akuj nanaikinit,

⁷kiatakisi amina a ekaitotoonu namina kus Akuj, kiatakisi amina namina a ekaitotoonu.

⁸Ngakiro naajokak nguna ngesi echamakina esi ianyunete. Ani kianyut esi nguna elalak noi, kitiliworete esi ngitunga lukaturonok, lu ejok eboyor anakiyen Ekapolon yok Yesu Kiristo.

⁹Kainyo itwaan cha daang ni emam ngakiro nguna, ikoni emuduk lo emam ibore itee. Emuriak ngesi atamar arimakin kolong ngasechesea keng nangorok.

¹⁰Tokona bocha ngikaitotoi kang, kirichakinos lokojokon akitiliwor anyaritono a Akuj ka aseuno keng ibore ni erubi anikus jik, ani kikokis esi neni, nyipalikinete esi anupit kus.

¹¹Aloger kangolo, iliworosi esi dir lu kichamakin ilomarete Napolou a Akuj na nyedaun na a Ekapolon yok ka Ekayuunan Yesu Kiristo.

¹²Nakaneni kesitamununi ayong esi jiik ngakiro nugu, tani sek kiyenete esi, nabo tonupito lokojokon ngakiro na ianyut.

¹³Engolikinit ayong atamar itemokino ayong kesitamuni iyong ngakiro nugu na eringaakar ayari.

¹⁴Ayeni ayong atamar kitiaka atipei ka akwaan nakatoan naga, loger lo kalimokinea Ekapolon yok Yesu Kiristo dir.

¹⁵Erichakin robo ayong noi asakakin esi erot lo itamuneta ngakiro nugu jiik, katoana ayong kerumor.

¹⁶Nakitatamea sua esi atamar ebuni Ekapolon yok Yesu Kiristo a agogongu anakationon, pekisuruori sua esi a ngakiro na a alioko. Kingolik sua apolou keng a ngakonyen kosi a ngikulepek.

¹⁷Kiya sua neni na edodikinea Akuj Apa ngesi arimatoi nabo kitaanyu ekipur. Tolim Akuj na erai Ekipur lo Epol noi tama, “Lokookang lo amina ayong ngesi lo, alakara ayong kotere ngesi!”

¹⁸ Kiirari sua ngikulepek etoil keng ebuni anadis, nakirukitor sua ka ngesi alomoru a Akuj.

¹⁹Nakaneni kinupi tokona ngoni dir ngakiro na eruorosi ngikadwarak a Akuj. Ejoikinit esi iwapete ngakiro nugu kainyo ikote ataa na inwakunit ni eribokinit tanang ni echilea akwaar sodi kimau akwangis a etop alo a ataparach alotai kus.

²⁰Kanguna kadaang, toyena atamar emam itwaan epedori bon akisisaun akiroit na edwaritae Anagiran.

²¹Kainyo emam nakanuan ngakiro a Akuj na adwar itwaan loger lo echamit ngesi ilope. Nakaneni eruorosi ngitunga ngakiro a Akuj loger lo edodikinitor Etau a Akuj.