Read turkana 2 Petero 2 Bible Online

2 Petero 2 - turkana bible

2 Petero 2

¹Kolong sek atakanuunete ngikadwarak lu a alioko alotunga. Aloger alopei kangolo, etakanuunete ngiketatamak lukaliokok anikus. Eropunete kesi ngakitatamet na a nginyas na eraakasi alioko, nabo engerete Ekapolon Yesu lo kolong alachuni kesi, sodi tomunyarator kesi atipei.

²Tani kikoni neni, iwapete ngikaalak ngakiro kech naaronok. Kotere ngakiro na esubete kesi, iruorotor ngiche Erot loa iteni ngakiro naaronok.

³ Kotere etereku kech loaronon, ebarakinete kesi nakiro napasiek na irokete kesi. Alalaketa tokona ngirwa lu esaditor Ekeriran kech, nabo ekienyi Ekenyasunan kech nyeperi jik!

⁴Nyejaluna Akuj ngimalaikae lu asechete, abu tachakak kesi nanam na akim, eenitae kesi anaribu kangina idarito Akolongit na Eriras.

⁵Nyejaluna Akuj ngitunga lu kolong sek aya nakwap, pearai abu yau ngakipi na aburuchiarete akwap a ngitunga aluaronok. Noa lo etatami ngakiro na etenooko ka ngitunga luche lukan-kaarei kesi ayuuni ngesi make.

⁶Erirae Akuj ngitunga a ngirerea a Sodom ka Gomora, tonomia kidong ekuruon bon. Kitiliwo ngakiro kech ekitetemes kanguna esubakinosi alotunga alu engerito Akuj.

⁷Toyuu ngesi Loti lo arai itwaan etenoono. Ealolongi ngesi kotere eboyor a ngitunga aluaronok.

⁸Ebooyi itwaan ni atenoono ngini anikech, nabo ealolongi ngesi ngirwa daang kotere ngakiro naaronok na apupi ngesi kitee kesi esubete.

⁹Nakaneni eyeni Akuj ayuun ngitunga lu eminasi ngesi anakiningioto kech nabo eyeni aisikin luaronok ananyunyura tanang Akolongit na Eriras,

¹⁰tarai cha noi lu iwapito etereku loaronon a ngawat nabo kimenyarito apolou a Akuj. Eraakasi ngiketatamak lukaliokok ngulu lu ikileenikinit nabo kiwogas, nabo nyekerito kesi ngisubuna lu ipuroi lu eya kidiama, nakaneni erai iyenyete kesi.

¹¹Tani ngimalaikae lu etiono noi apolou kech idwangit na a ngiketatamak alukaliokok kangulu, nyititaate kesi a ngiyeny alongaren Ekapolon.

¹²Nakaneni itwangete ngitunga lu loger a ngitieng a moding, alu eurunio sodi kirumunae ka akiar, ematanakinosi kesi ngakiro daang na nyeyenete iyenyasi. Inyasunio kesi loger a ngitieng a amoni,

¹³nakaneni eboliare kesi dang loger lo eboliatar kesi luche. Eminasi kesi akisub ibore daang naparan ileere, kitemuneto etereku a ngawat kech. Eraakasi kesi ngitunga lupasiek ileechikinit na imujeta ka esi, kainyo ejoikinito kesi jiik ngirotin kech lu a amodeanut!

¹⁴Emam ichebore eminasi kesi akitere akidwang ngaberu na imalaikinit, nyienguni jik etereku lo imuitor kesi akisech. Ibatanarete kesi ngitunga lupalag. Anaikis kolong ngitai kech adakanu. Ilamit Akuj kesi!

¹⁵Adepasi kesi erot lo itenene awoliyosi, ewapakis erot lo ewapi Balaam lokookeng a Beor, lo amina ngaropiyae na adikino ngesi eanyuni ani esubea naaronok

¹⁶ sodi kikilakinae ngesi kotere akisech keng. Kiruorik esikiria keng loger a itwaan kitapalik ngakiro na esikerepikinito ngesi.

¹⁷Ikote ngitunga ngulu ngileleae lu kijuasi, ikote ngidowon lu ekutanari ekuwam. Asubaki kolong Akuj ni epete kesi anaaut ana eribokinit nikirion chuch.

¹⁸Iruorosi kesi ngakiro napasiek iwogasi, nabo ibatanarete kesi a etereku aloaronon a ngawat kech, ngulu aringa ebuchunosi alokasechak.

¹⁹Ichikakinito kesi luche atamar eraunete ngitunga lu alachakin dir nakaneni toringa kesi ngikulepek nyelachuna anakiro anakenyasunak, kainyo erai itwaan erikot a ibore kadaang ani eneikin ngesi.

²⁰Ani kebuchun ngitunga anakiro anakenyasunak a akwap, aloger alo eyeneta kesi dir Ekapolon ka Ekayuunan yok Yesu Kiristo, nabo tobongokis kesi akisub ngakiro nguna sodi tokuruwo kesi akipiun naaronok, erono eboyor lo ekisidi a ngitunga kangulu akidwang lo ekingaren.

²¹Kejoikinit kolong kesi peeyenunete erot lo etenoono, akidwang akiyen ani erumor tongero akichikakinet na italeuno adungokinio kesi.

²² Nguna asubasi anikech idodiunito atamar eraakasi ngaka iteni ngakisikwaanet nugu, “Ebongokini iingok akinyam ngalekan keng,” nabo, “Eputir lo elotar aseger, abongo akimodamoda alochoto.”