Read turkana 2 Petero 3 Bible Online

2 Petero 3 - turkana bible

2 Petero 3

¹Ngipaalon kang luminan, erai abarua na a ngaarei kegirak ayong esi naga. Anabaruae anaarei kanu, kesitam ayong esi ngakiro nugu asaki akiteriengun ngitamen luajokak anikus.

²Asaki ayong esi kitamut ngakiro na kolong eruorosi ngikadwarak a Akuj lukabekoonok, ka ngakiro na adunguni Ekapolon ka Ekayuunan, kitaanyut esi ngimeanara.

³Mono ekingaren, ejoikinit esi iyenete atamar ngirwa lu esal, epote ngitunga ngiche lu iwapete etereku loaronon a ngawat kech. Kikianatar kesi esi

⁴nabo ingitasi ebalasi, “Abe echika kolong ngesi atamar abonguni a? Nyali tokona? Atoaka tani ta apayok, nakaneni ikoni ibore daang eger lo kolong sek asubere akwap!”

⁵Iyachakinito kesi ajamuarit ngakiro na adungunio Akuj akiroit kolong kanuan sodi tosubunae adis ka akwap. Asubunio akwap anakipi, erai ngakipi asubere,

⁶nakaneni erai nabo ngakipi, ngakipi na kolong aburuchiarito akwap, ngesi enyasunere akwap na kolong ngorot.

⁷ Nakaneni adis ka akwap na tokona eyakasi, erai akiroit napei edungunit Akuj ngina eyakatar, sodi kinyasunere a akim. Iwaakinitae kesi idarito akolongit na iriraare ngitunga lu nyilipito Akuj kinyasunae.

⁸Ngipaalon kang luminan, warasi ibore ipei nyikimuriak! Alongaren Akuj, emam ibore etiakit akolongit apei ka ngikaru abunget apei, eraakasi luarei ngulu anikeng ngipei.

⁹ Nyetinenikini Akuj nyesubakina ngakiro na echikak ngesi, loger lo itamitotor ngiche. Nakaneni enaikinit ngesi ngakiro kus kainyo nyesaki itwaan tani ipei inyasun, nakaneni esaki daang tolunga ngasechesea kech.

¹⁰Enangi Akolongit na ebunio Ekapolon Yesu peeyenio loger a ekokolan. Ikilauni adis lokojokon Akolongit ngina sodi tongopia. Enomiari ibore ni eyei nadis daang tomunyar. Epuripuriakin akwap ka ibore daang ni eyei nakwap.

¹¹Kona inyasunere ngiboro lugu daang a eger kalo, ejoikinit esi iliworosi ngitunga lu ikote ai? Ejoikinit eboyor kus erai lo italeuno lo iminatar esi Akuj.

¹²Tosuba kongina idarito Akolongit a Akuj nabo kirichakinos esi sodi taapuunea ngesi atipei, Akolongit na enomiarea adis nabo kinyasun, nabo itokeari amonis ibore daang ni eyei nadis.

¹³ Nakaneni kidarit ngoni ibore ni kichikak Akuj, adis nakitetet ka akwap nakitetet na eya ngakiro na etenooko.

¹⁴Tokona bocha ngipaalon kang luminan, ani idarito akolongit ngina, kirichakinos kitorukau ngesi esi isilito, emam akemer kori ibore ichwangakinito alongaren Akuj, sodi kisila ka ngesi.

¹⁵Toyena atamar erai anaikinit a Akuj ni esakea esi taanyut alolom na iyuunotor, loger lopei kolong kigirakinitor esi lokaatoyok lominat Paulo, a aosou ana etaanyuni ngesi Akuj.

¹⁶Ngakiro nugu ngesi elimuununi ngesi anabaruae kadaang ana kigiranakini esi kotere ngakiro nugu. Eya ngakiro ngache nabaruae keng na etiono akiyen na isisaate lukabangaanak ka lu nyeyenikina ngakiro nguna, kisisata eraakasi alioko, loger lo ilochieneto ngagiran nache. Sodi kinyasun kesi ngikulepek kotere nguna.

¹⁷Nakaneni ani esi ngipaalon kang, iyenete esi sek nugu. Tochoikinos robo sodi nyikibatasi esi ngakiro na ichwanganakinete ngikasechak, sodi kibataros esi aloboyor kus aloajokon.

¹⁸Nakaneni torubakisi irotokinito ngaren niajokon anajokis ka aosou a Ekapolon yok ka Ekayuunan Yesu Kiristo. Emini ekipur nikeng tokona ka jik! Aamen.