Read turkana 1 Yoana 2 Bible Online

1 Yoana 2 - turkana bible

1 Yoana 2

¹Ngide kang, kegirakinit ayong esi nugu sodi nyiisecha esi, nakaneni ani kesech itwaan idio, eyei epei lo imaimai Akuj Apa kotere ngoni, ngesi Yesu Kiristo, lo etenooko ngakiro keng dir.

²Kainyo erai Kiristo elope ngesi kirimakinere ngoni ngasechesea yok, nabo meere ngasechesea yok make, pearai tani ngasechesea a ngitunga kadaang.

³Ani kiwap ngoni ngitalio lu edungunit Akuj, kiyeni ngoni dir atamar kiyenu ngesi.

⁴Ani kebala itwaan ayeni ngesi, nakaneni nyiwapite ngitalio lu edungunit ngesi, eliokono itwaan ni ikoni neni nabo emam ngakiro na iteni eyeni ngesi.

⁵Nakaneni itwaan cha daang ni iwapi akiroit keng ngesi ni aliwor amina na eminar ngesi Akuj na ikiuna. Eger lo ngesi kiyenea dir atamar kirai ngoni ngipei ka Akuj,

⁶itwaan cha daang ni ebala kirukit aapei ka Akuj, ejoikinit iboikin loger lopei ebooyo Yesu Kiristo.

⁷Ngipaalon kang luminan, meere etal a ngakiro ana kegirakinit ayong esi kanu ekitetet, erai etal longorot, lo iirasi esi napei kolong anakisiakinet. Etal longorot ngesi lo a ngakiro ana kolong sek iirasi esi.

⁸ Nakaneni erai tokona etal lo kegirakinit ayong esi ekitetet, kainyo etakanete ngakiro keng na iteni ani a Kiristo ka esi dang. Kainyo akadaunan aribu nabo imaunit akicha na iteni.

⁹Itwaan cha daang ni ebala ayei nakicha, nakaneni toremokino lokaatokeng, eringa eyei naribu tani tokona.

¹⁰Itwaan cha daang ni emina lokaatokeng, eyei nakicha, nakaneni emam ibore anikeng ni itesechi itwaan niche.

¹¹Nakaneni itwaan cha daang ni eremokino lokaatokeng, eyei naribu, elosi ngesi anaribu nabo nyeyeni ni elosi kainyo etumudukan ngesi aribu.

¹²Kegirakinit ayong esi ngide kang, kainyo arimakin ngasechesea kus kotere Kiristo.

¹³Kegirakinit ayong esi taapa, kainyo iyenete esi lo kolong ayei napei anakisiakinet. Kegirakinit ayong esi ngisorok, kainyo ipiut esi Ekipe.

¹⁴Kegirakinit ayong esi ngide kang, kainyo iyenete esi Apa. Kegirakinit ayong esi taapa, kainyo iyenete esi lo kolong ayei napei anakisiakinet. Kegirakinit ayong esi ngisorok, kainyo igogong esi, ibooyi akiroit a Akuj anikus nabo ipiut esi Ekipe.

¹⁵Warasi nyiiminakis ngakiro a akwap kori ngiborei lu daang lua akwap. Ani kiminakis esi ngakiro a akwap, nyiminasi esi Akuj Apa.

¹⁶Ibore daang ni erai ika akwap, ibore niaronon ni iterekuyarit akwaan, ibore ni iteete ngitunga ka ni esakete, ka ibore daang anakwap ni iwogatar ngitunga, emam tani ipei ni ebunit ani a Apa, ebunit daang anakwap.

¹⁷Edaun akwap ka ibore daang ni eyei nakwap ni iterekuyarit ngitunga, nakaneni ibooyi itwaan ni esubi na echamit Akuj jik.

¹⁸Ngide kang, aapuu esal! Kilimokin esi atamar ebuni Eketepegan a Kiristo, nakaneni atakanuut tokona ngiketepegak lukaalak a Kiristo, kotere nguna kiyeni atamar aapuu esal.

¹⁹Pearaakasi ngitunga lugu dir ngipei ka ngoni, ngakiro nguna kesi kiisikineta ngoni, arai kolong tarai ngipei ka ngoni, kidongoto eruko ka ngoni. Nakaneni arotokinete kesi sodi kileereunio dir atamar amam tani epei anikech arai iyok.

²⁰Nakaneni elelebik Yesu Kiristo Etau a Akuj nikus, kotere nguna, iyenete esi ngakiro daang.

²¹Kegirakinit bocha tokona ayong esi, meere ni nyiyeneta esi ngakiro na iteni, erai ni iyeneta esi, nabo iyenete esi atamar emam alioko na ebuni anakiro ana iteni.

²²Ngae tokona erai ekaliokon? Ngesi itwaan daang ni ebala meere Yesu Kiristo. Erai itwaan ni ikoni neni Eketepegan a Kiristo, engerit ngesi Akuj Apa ka Lokookeng.

²³Kainyo itwaan cha daang ni engerit Lokookeng a Akuj, engerit tani Akuj Apa, itwaan cha daang ni echamunit Lokookeng a Akuj, echamunit tani Akuj Apa.

²⁴Tokona bocha, kirichakisi alotai kus ngakiro na kolong iirarete esi anakisiakinet, ani kirichakis esi ngakiro na kolong iirarete anakisiakinet nguna, iboikinosi esi jiik iraakasi ngipei ka Lokookeng a Akuj ta Akuj Apa.

²⁵Akiyar na nyedaun ngesi kichikak Kiristo ngoni.

²⁶Kegirakinit ayong esi nugu kotere lu esakete akingalare esi.

²⁷Ani eliwor esi, kileleb esi Kiristo Etau keng. Na eringaakar Etau keng eyei nikus, nyejoikinit esi isakete itwaan ni kitatami. Kainyo kitatami esi Etau keng ngakiro daang, nakaneni eraakasi ngakiro na kitatami ngesi esi ngaka iteni, meere alioko. Kiwapa robo ngakitatamet a Etau a Akuj sodi toliwor irukito aapei ka Kiristo.

²⁸Kongina ngide kang, kiruko aapei ka ngesi, sodi ani Akolongit na etakanuunea, atotitinyeketo ngoni noi nyikiruma ngileech atasaka adukakin ngesi na ebunio.

²⁹Iyenete esi atamar erai Kiristo lo etenoono, ejoikinit robo esi iyenete atamar itwaan daang ni esubi ngakiro na eteniyete, erai ikoku a Akuj.