Read turkana 1 Yoana 3 Bible Online

1 Yoana 3 - turkana bible

1 Yoana 3

¹Kingolikisi eger lo kiminar ngoni Akuj Apa lokojokon noi! Eger lo epolookor amina ngina noi ngesi kinyaritere ngoni ngide a Akuj, iteni dir, kirai ngoni. Ngakiro nguna ngesi pekiyeneta ngoni ngitunga a akwap, nyeyena kesi Akuj.

²Ngipaalon kang luminan, kirai tokona ngoni ngide a Akuj, nakaneni eringa tokona nyileereuno dir atamar kiliwor ngoni nyo. Nakaneni kiyeni ngoni atamar na etakanuunea Kiristo, kikwaanikin ngoni ka ngesi kainyo kianyungari ngoni dir eger lo ikoni ngesi.

³ Itwaan daang ni igieno Kiristo loger ngolo, ibooyi erai lo ikiuna loger lopei eraakar Kiristo lo ikiuna.

⁴Itwaan cha daang ni esecheene, asech etal a Akuj, kainyo akisech ngesi akisech etal.

⁵Iyenete esi atamar atakanuuni Kiristo sodi tolemarea ngasechesea, nabo emam akisech tani nadiochichi anikeng.

⁶ Nakaneni itwaan daang ni erukito aapei ka Kiristo, nyerubakinit esecheene, nakaneni itwaan cha daang ni erubakinit esecheene, eringa nyeanyungara ngesi kori nyeyena ngesi.

⁷Ngide kang! Warasi itwaan nyikibata esi. Itwaan cha daang ni esubi ngakiro na iyookino, erai itwaan ni etenoono, loger lopei eraakar Kiristo lo etenoono.

⁸Itwaan cha daang ni erubakinit esecheene, erai ika Ekipe, kainyo asechi kolong Ekipe napei anakisiakinet. Akiroit kolong naga atakanuunea Lokookeng a Akuj, akinyasun ngitichisio a Ekipe.

⁹Itwaan cha daang ni erai ikoku a Akuj nyerubakinit esecheene, kainyo eyei eboyor a Akuj nikeng, ani kona eraakar Akuj Apakeng, nyerubakini ngesi esecheene.

¹⁰Ibore en ngesi dir etiakit ngide a Akuj ka ngide a Ekipe. Itwaan daang ni nyesubi ngakiro na iyookino kori ni nyemina lokaatokeng, meere ikoku a Akuj.

¹¹Ngakiro na kolong iirarete esi anakisiakinet kesi nugu, ejoikinit kiminakin.

¹² Nyejoikinit ngoni kikokini Kain, arai ngesi eka Ekipe nabo taar ngesi lokaatokeng Abel. Arai nyo aarea ngesi lokaatokeng? Arai ni arokiata ngakiro na asubi ngesi, totenooko na asubi lokaatokeng.

¹³Warasi nyiiriangakinosi ngikaitotoi kang, erai kiremokinosi esi ngitunga a akwap.

¹⁴Kiyeni ngoni atamar kiisik akitu sodi apotu nakiyar, ani kiminar ngikaitotoi yok. Itwaan cha daang ni nyemina, eringa eyei nagogongu a akitu.

¹⁵Itwaan cha daang ni eremokino lokaatokeng, erai ekaaran, nabo iyenete esi atamar nyeanyuni ekaaran akiyar na nyedaun.

¹⁶Kikokini ngoni kiyenuni atamar echami ngesi nyo nege, ajali Kiristo akiyar keng kotere ngoni. Ejoikinit robo ngoni dang kijali akiyar yok kotere ngikaitotoi yok!

¹⁷Ani kingolik ekabaran atamar ichana lokaatokeng, nakaneni toniniker etau keng nyiisien lokaatokeng, ikokini ngesi etamari amina Akuj ai?

¹⁸ Ngide kang, nyejoikinit amina yok erai ngakiro na iruoroe pas, ejoikinit erai amina na iteni na idodiun alotichisio.

¹⁹Eger lo, robo, ngesi kiyenunea ngoni atamar eraakasi ngakiro yok na iteni, eger lo ngesi kititinyokeror ngoni alongaren Akuj.

²⁰Ani kidodikinito ngoni ngitai yok atamar kisechit ngoni, kiyeni ngoni atamar epolot Akuj idwangit ngitai yok, nabo eyeni ngesi ibore daang.

²¹Kongina bocha ngipaalon kang luminan, ani pekidodikinito ngoni ngitai yok atamar kisechit ngoni, kititiny ngoni alongaren Akuj.

²²Kianyuni ngoni anikeng ibore daang ni kilipi, kainyo kiwap ngakiro na edungunit ngesi nabo kisubi ngakiro na ejoikinito ngesi.

²³Edungunit ngesi atamar atonupa ngoni Lokookeng Yesu Kiristo nabo atominakinos make, loger lopei kidungokinea ngoni Kiristo.

²⁴ Itwaan cha daang ni iwapi ngitalio a Akuj, ibooyete aapei ka Akuj nabo ibooyete Akuj ka ngesi aapei. Ani kotere Etau lo kitaanyu ngoni Akuj, kiyeni atamar kiboi aapei ka Akuj.