Read turkana 1 Yoana 4 Bible Online

1 Yoana 4 - turkana bible

1 Yoana 4

¹Ngipaalon kang luminan, warasi nyiinupa ngakiro kadaang alu ebalasi eyei kesi Etau a Akuj, nakaneni kiningo toyena kebunit dir etau lo ebalasi kesi eyei nikech ani a Akuj. Kainyo apetakin ngikadwarak lukaliokok wadaang.

²Ikokinete esi iyenete kerai dir Etau a Akuj nege, itwaan daang ni elimunit atamar abuni Yesu Kiristo erai itwaan, eyei Etau lo ebunit ani a Akuj.

³Nakaneni itwaan daang ni ebala nyikote ngakiro nguna ani a Yesu neni, emam Etau lo ebunit ani a Akuj anikeng. Erai etau lo eyei nikeng lo ebunit ani a Eketepegan a Kiristo, iirarete kolong esi atamar ebuni nakaneni eyei nakwap tokona.

⁴Ngide kang, iraakasi esi ngika Akuj, nabo ipiut ngikadwarak lukaliokok kainyo egogong noi Etau lo eyei nikus akidwang etau kangulu eraakasi ngika akwap.

⁵Iruorosi ngikadwarak lukaliokok ngulu ngakiro na eraakasi ngaka akwap, nabo epupete ngitunga a akwap ngakiro kech kainyo eraakasi kesi ngika akwap.

⁶Nakaneni kirai ngoni ngika Akuj. Itwaan cha daang ni eyeni Akuj epupi ngakiro yok, itwaan cha daang ni nyerai ika Akuj, nyepupi ngakiro yok. Eger lo robo ngesi kipedorea ngoni akiyen ibore ni etiakit Etau lo erai eka iteni ka lo erai eka alioko.

⁷Ngipaalon luminan, atominakinos, kainyo ebunit amina ani a Akuj. Itwaan cha daang ni emina, erai ikoku a Akuj nabo eyeni Akuj.

⁸Itwaan cha daang ni nyemina, nyeyeni Akuj kainyo Akuj ngesi erai amina.

⁹Nakaneni kidodiu Akuj atamar kimina ngoni ani ameunea Lokookeng nakwap, sodi ataanyuneta ngoni akiyar anikeng.

¹⁰Amina ngesi na, meere atamar kiminak ngoni Akuj, nakaneni atamar kimina ngesi ngoni sodi tomeu Lokookeng toliwor ngesi kirimakinere ngoni ngasechesea yok.

¹¹Ngipaalon luminan, ani kerai eger lo kiminar ngoni Akuj, ejoikinit robo ngoni kiminakin make.

¹² Emam itwaan engolik Akuj nakanuan, nakaneni ani kiminakin ngoni make, kiboi ngoni ka Akuj aapei, nabo eliwor amina keng na itemokino aniyok.

¹³Kiyeni ngoni dir atamar kiboi aapei ka Akuj nabo iboi Akuj aapei ka ngoni, ani kitaanyunea ngesi ngoni Etau keng.

¹⁴Kingolik ngoni nabo kilimok luche atamar ameuni Akuj Apa Lokookeng toliwor Ekayuunan a ngitunga a akwap.

¹⁵Ani kelimu itwaan atamar erai Yesu Lokookeng a Akuj, ibooyete ngesi ka Akuj aapei nabo ibooyi Akuj ka ngesi aapei.

¹⁶Nakaneni kiyeni ngoni ngikulepek nabo kinupit atamar kimina ngoni Akuj. Akuj ngesi amina, ani itwaan cha daang ni ibooyi anamina ibooyete aapei ka Akuj nabo ibooyi Akuj ka ngesi aapei.

¹⁷Itemokin amina aniyok sodi atotitinyikerotor ngoni Akolongit na Eriras, nakaneni kititinyer ngoni kainyo ikwaan akiyar yok anakwap kana ka na a Kiristo.

¹⁸Emam ebuloi eyei namina, itwarakini amina na iteni dir ebuloi daang. Tokona bocha, eringa amina a itwaan ani ebulit nyeliworo na itemokino dir, kainyo eriras ngesi eyaunit ebuloi.

¹⁹Kirai ngoni lu kimina kainyo kimina kolong sek ngoni Akuj.

²⁰Ani kebala itwaan amina Akuj, nakaneni toremokino lokaatokeng, erai ngesi ekaliokon. Kainyo nyepedori ngesi aminakin Akuj na nyeanyungara, erai pekemina ngesi lokaatokeng lo aanyunga.

²¹Etal lo kidungok ngoni Kiristo ngesi logo, itwaan cha daang ni emina Akuj ejoikinit eminakini lokaatokeng dang.