Read turkana 1 Yoana 5 Bible Online

1 Yoana 5 - turkana bible

1 Yoana 5

¹Itwaan cha daang ni enupit atamar erai Yesu Kiristo, erai ikoku a Akuj, ani itwaan cha daang ni emina apa, emina ikoku keng dang.

²Eger lo ngesi kiyenea dir atamar kimina ngide a Akuj, erai ni kiminar Akuj nabo ewapito ngitalio keng.

³Kainyo aminakin Akuj ngesi ngoni akiwap ngitalio keng. Nakaneni nyetioko ngitalio keng aniyok,

⁴kainyo epedori ikoku a Akuj daang akipiun ngakiro a akwap. Nakaneni kipiuni ngoni ngakiro a akwap kotere anupit yok.

⁵ Ngae ipiuni ngakiro a akwap? Erai itwaan bon ni enupit atamar Yesu erai Lokookeng a Akuj.

⁶Yesu Kiristo ngesi lo abuni kibatisa a ngakipi ana ebatisaare ngesi ka ngaakot na atoanea. Peabuni ngesi akibatisare a ngakipi make, nakaneni abuni kibatisa a ngakipi ka ngaakot. Idodiunit Etau a Akuj elope atamar eraakasi nugu iteni, kainyo Etau a Akuj erai iteni.

⁷Eyakasi ngikaanyunak nguuni,

⁸Etau a Akuj, ka ngakipi ta ngaakot. Echamuna luuni ngulu daang anakiro kanguna.

⁹Ani kinupeene ngoni ngalimoret a ngitunga, epolok noi ngalimoret a Akuj. Ngalimoret na kilimok ngoni Akuj kesi ngakiro a Lokookeng.

¹⁰Itwaan cha daang ni enupi ngakiro a Lokookeng a Akuj, eyeni ngakiro keng alotau, nakaneni itwaan cha daang ni nyenupit Akuj, eteliokon ngesi, kainyo nyenupa ngesi ngakiro na alimuni Akuj ani a Lokookeng.

¹¹Ngakiro nguna ngesi nugu, kitaanyu Akuj ngoni akiyar na nyedaun, nakaneni isiakinit akiyar ngina ani eyei Lokookeng a Akuj.

¹² Itwaan cha daang ni erukito ka Lokookeng a Akuj, aanyu akiyar naga, itwaan cha daang ni nyerukito ka Lokookeng a Akuj, nyeanyuna akiyar.

¹³Kegirakinit ayong esi nugu sodi toyenuneta atamar ianyut esi akiyar na nyedaun, esi lu inupito ngakiro a Lokookeng a Akuj.

¹⁴Kititiny ngoni alongaren Akuj kainyo kiyeni ngoni atamar kipupi ngesi ngoni arai kilip ibore daang ni itemem ka ngakiro na echamit ngesi.

¹⁵Epupokini ngesi ngakiro yok esaa daang lo kilipea ngoni ngesi, ani kona kiyenea ngoni atamar eraakasi ngakiro nugu ngaka iteni, kiyeni tani atamar kiinakini ngesi ngoni ibore ni kilipi ngoni ngesi.

¹⁶Ani kingolik iyong lokaatokon esubi akisech na nyeyauni akitu, ejoikinit iyong ilipi Akuj kitaanyu ngesi akiyar. Alimunit ngakiro nguna kotere lu nyeyaunete ngasechesea kech akitu. Nakaneni eyei akisech na eyauni akitu, nakaneni nyabala ayong kilipa Akuj kotere ngina.

¹⁷Eraakasi naaronok daang akisech, nakaneni eyei akisech ache na nyeyauni akitu.

¹⁸Kiyeni atamar emam ikoku a Akuj ni erubakinit esecheene, kainyo echoikinit Lokookeng a Akuj ngesi, nabo nyewani Ekipe ngesi.

¹⁹Kiyeni ngoni atamar kirai ngika Akuj nabo kiyeni atamar epolokinit Ekipe akwap daang.

²⁰Kiyeni ngoni atamar abu Lokookeng a Akuj kitoosu ngoni atoyeneta Akuj na iteni. Kiboi ngoni aapei ka Akuj na iteni, kimorikina ka Lokookeng Yesu Kiristo. Akuj naga ngesi erai aka iteni, nabo ngesi erai akiyar na nyedaun.

²¹Ngide kang, tochoikinos anakujo ana a alioko!