Read turkana Ngikatubok Ngakiro 1 Bible Online

Ngikatubok Ngakiro 1 - turkana bible

Ngikatubok Ngakiro 1

¹Na atoanea Yochua kerumor, apot Ngisirael kingita Ekapolon Akuj tamasi, “Ekitela ali anikosi ingarenikini torem Ngikanaan?”

²Tatachu Ekapolon Akuj tama, “Ekitela a Yuda ngesi ingarenikini. Ainak ayong kesi akwap.”

³Apot ngitunga a Yuda tolimokis ngitunga a Simeon tamasi, “Potu erukosi ka sua nakwap nakiinakin sua, sodi etijwoto Ngikanaan aapei. Ani erumor erukosi nabo nakwap nakiinakin esi.” Apot ngitela a Simeon

⁴ka Yuda kirukosi lojie aapei. Abu Ekapolon Akuj nak kesi agogongu na idwangeta Ngikanaan, ka Ngiperes, kidwanga ngikiliok ngabunge ngatomon alo Besek.

⁵Toriamut kesi Adonibesek kaneni sodi kitijikis.

⁶Tamatar ngesi nakaneni apot kesi kiritasi ngesi, sodi kirumut totubosi ngimoyo luapolok a ngakan ka lua ngakejen.

⁷Tolim Adonibesek tama, “Ngikapolok ngitomwon-kaarei lu atuboritae ngimoyo kech luapolok lua ngakan ka lua ngakejen edepete akimuj alokwap emeesa kang. Kasubakinea tokona Akuj ayong ngakiro nakolong asubea ayong kesi.” Apon ngesi yaarae Yerusalem, totoan kaina.

⁸Apot ngitunga a Yuda kitijikis Yerusalem ka alemar ere ngolo. Taara kesi ngitunga a ere kangolo daang, kichunyakis ere akim.

⁹Ani erumor toloto kesi kitijikis Ngikanaan lu ebooyete anakwap ana a ngimukur, ka naukon, ta akwap nakoonon a Negeb.

¹⁰Toloto kesi nia Ngikanaan alu ebooyete alore a Eburon, lokolong anyaritae Kirias Ariba. Kidwanga kesi kaina ngimacharin a Chechai, ka Aiman, ta Talimai.

¹¹Ani enyounete ngitunga a Yuda kaneni, apot toloto lore a Debir, lo anyaritae ngirwa ngulu Kirias Seper.

¹²Abu epei kech lo anyaritae Kaleb tolim tama, “Itwaan daang nicha eremi Kirias Seper, ainakini ayong nakookang Akisa, sodi kiut.”

¹³Osiniel lokookeng a Kenas alo arai lokaatokeng a Kaleb loochi, ngesi abu tolema ere, sodi abu Kaleb kipoto nakookeng Akisa nak ngesi kiut.

¹⁴Ani akolongit na akuuta, abu Osiniel kimaima Akisa[1] atamar kilip apakeng amana. Abu ngesi todoku alosikiria keng sodi kingit Kaleb ngesi ibore ni asaki.

¹⁵Tatachu ngesi tama, “Asaki ayong ngabwelin a ngakipi. Kiinakinit iyong akwap nakoonon.” Sodi nak Kaleb ngesi ngileleae lu ayakasi lowae lo alokuju ka kwap.

¹⁶Apot ngalesea alokamuran a Musa, alo arai eka akwap a Kenis torotokis ka ngitunga a Yuda alo Yeriko, ere lo ayakasi ngikito a ngingolea, toloto nakwap nakoonon a Negeb na eyei diyete Arad. Ani enangete inaa, toloma kesi kiding Ngiamalek.[2]

¹⁷Kirukosi ngitunga a Yuda ka lua Simeon aapei, kidwanga Ngikanaan lu alomito lore a Sepas. Kilama kesi ere ngolo, kinyasut, sodi tanyarata ekiro be Orima.[3]

¹⁸Tolema[4] Yuda tani ere a Gasa ka akwap keng, ka Achikelon ka akwap keng ta Ekiron ka akwap keng.

¹⁹Kingarak Ekapolon Akuj ngitunga a Yuda sodi tolemasi kesi akwap na a ngimukur, nakaneni peapedorete akiritar ngitunga lu alomito naroatin kainyo ayakasi kesi ngaurukukui.

²⁰Loger losek adungunitor Musa, apon Eburon nakinae Kaleb lo eritari ngalesea nauni a Anak alore kangolo.

²¹ Nakaneni apot ngitunga a Benjamen nyiiritasi Ngiebus lu alomito Yerusalem. Eringa Ngiebus elomito neni aapei ka ngitunga a Benjamen.

²²Apot talokookeng a Yosep dang toloto toremo ere a Besel, sodi kingarak Ekapolon Akuj kesi.

²³Tomeasi kesi ngitunga akireb Besel. (Anyaritae kolong sek ere ngolo Lus.)

²⁴Apot ngikarebok kingolikis itwaan epuduni alore sodi tolimokis tamasi, “Kidodikinae sua erot lo elomarere lore, sodi nyikiwani sua iyong.”

²⁵Kidodik ngesi ngitunga ngulu erot. Apot ngitunga a Epiraim ka Manase taara itwaan daang alore pearai itwaan ngini ka ngitunga a awi keng.

²⁶Ani ekisidi tolot itwaan ngini nakwap a Ngiiti, toduk ere neni sodi tanyara ekiro be Lus, ngesi eringa erai ekiro keng.

²⁷Apot ngitunga a ekitela a Manase nyiiritasi ngitunga lu alomito lorerea a Bes-chan, ka Taanak, ka Dor, ka Ibileam, ka Megido, ta ngirerea lu ayakasi diyete. Nakaneni apot Ngikanaan toloma neni.

²⁸Ani eriamunete Ngisirael agogongu, apot kidesikis Ngikanaan akisub etich kech, nakaneni apot nyiiritasi kesi daang.

²⁹ Apot ngitunga a ekitela a Epiraim nyiiritasi Ngikanaan lu alomito lore a Geser, sodi apot Ngikanaan toloma neni aapei ka kesi.

³⁰Apot ngitunga a ekitela a Sebulun nyiiritasi ngitunga lu alomito lorerea a Kitiron ka Naalal, nakaneni apot Ngikanaan ngulu toloma neni aapei ka kesi, nabo kidesikinae akisub etich.

³¹Apot ngitunga a ekitela a Acher nyiiritasi ngitunga lu alomito lorerea a Ako, ka Sidon, ka Alab, ka Akisib, ka Eliba, ka Apek, ta Reob.

³²Apot ngitunga a Acher kiboikinos aapei ka Ngikanaan ngulu kainyo apot nyiiritasi kesi.

³³Apot ngitunga a ekitela a Naputal nyiiritasi ngitunga lu alomito lorerea a Bes Chemech ka Besanas. Apot ngitunga a Naputal kiboikinos aapei ka Ngikanaan ngulu nakaneni kidesikis akisub etich kech.

³⁴Apot Ngiamor kijukasi ngitunga a ekitela a Dan nakwap na a ngimukur, sodi kiratakis kesi nyeetiyaunosi naroatin.

³⁵Kiboikinos Ngiamor lorerea a Aijalon, ka Chaalibim, ta moru a Eres, nakaneni apot ngitunga a Epiraim ka Manase topolokis kesi nabo kidesikis akisub etich kech.

³⁶Alokwap Sela, etorit ekukuor a Ngiedomae[5] napak a Akirabim.