Read turkana Ngikatubok Ngakiro 10 Bible Online

Ngikatubok Ngakiro 10 - turkana bible

Ngikatubok Ngakiro 10

¹Na atoanea Abimelek kerumor, abu Tola lokookeng a Pua alo arai lokookeng a Dodo bu ayuun Ngisirael. Arai Tola eka ekitela a Isakar. Alomit ngesi Chamir nakwap na ngimukur a Epiraim.

²Abu ngesi torik Isirael a ngikaru a ngitomwon-arei ka nguuni. Totoan Tola tonukakinae Chamir.

³Adaunet a Tola, bu Yair lo a akwap a Gilead. Torik ngesi Isirael a ngikaru a ngitomwon-arei ka ngiarei.

⁴Ayakasi ngesi talokookeng ngitomwon-uni lu ameenete ngisikiria ngitomwon-uni. Ayakasi kesi ngirerea ngitomwon-uni anakwap a Gilead, lu eringa enyaritae ngadakarin a Yair.

⁵Totoan Yair tonukakinae Kamon.

⁶Tosechakis Ngisirael nabo Ekapolon Akuj kilipa ta Baal ka Achitaros ka ngakujo a akwap a Sidon, ka Moab, ka Amon ta Pilistia. Toisikis kesi Ekapolon Akuj tapalikis akilip ngesi.

⁷Tongoik Ekapolon Akuj Ngisirael kilelebun, sodi kimiek Ngipilisti ka Ngiamon idwangete kesi.

⁸Kichiakiasi kesi ka aboliar Ngisirael daang lu alomito nakwap na a Ngiamor kide angolol a Yorudan anakwap a Gilead.

⁹Todokasi Ngiamon tani ekwakaye Yorudan toloto akitijwore ngitela a Yuda ka Benjamen ta Epiraim. Tanoma ngakiro nguna Ngisirael.

¹⁰Kikaloikis Ngisirael Ekapolon Akuj ebalasi, “Kisechak sua iyong, kainyo kiisik sua Akuj kosi sodi elipa ta Baal.”

¹¹Tatachak Ekapolon Akuj kesi tama, “Pekolong kayuuni ayong esi Alomisiri, katoyuu nabo ani a Ngiamor, ka Ngiamon, ka Ngipilisti a?

¹²Apot Ngisidon dang ka Ngiamalek ta Ngiamon kitoboliatar esi. Nakaneni kikaloikis esi ayong, sodi katoyuu ayong esi anikech.

¹³Nakaneni kitoisikis esi ayong kilipa ngakujo ngache. Nyeringa nabo ayong kayuuni esi.

¹⁴Kapesi kikaloikisi ngakujo na iseut esi. Kimiekisi kesi kitoyuut esi ngirwa lu iriamuneta ngichan.”

¹⁵Nakaneni tolimokis Ngisirael Ekapolon Akuj tamasi, “Kisech sua. Tosubakinere sua ngakiro na kijoikinete iyong. Toyuunae kare sua akolongit naga.”

¹⁶Tachakasi kesi ngakujo nagelayek na atingito kesi sodi kilipa Ekapolon Akuj. Apot ngakiro na echanatar Ngisirael nguna kitongoa Ekapolon Akuj.

¹⁷Ani erumor tonyout ngasigerea a Ngiamon lojie, toloma Gilead. Tochunun Ngisirael toloma Misipa alo Gilead.

¹⁸Kingitas Ngisirael ka ngikarikok tamasi, “Ngae isiauni kitijik Ngiamon? Itwaan nicha isiauni ngesi eliwor ekarikon a ngitunga kadaang alo Gilead.”