Read turkana Ngikatubok Ngakiro 11 Bible Online

Ngikatubok Ngakiro 11 - turkana bible

Ngikatubok Ngakiro 11

¹Arai Yepita lo a akwap a Gilead ekajwon. Nakaneni arai ngesi lokookeng a amalaat. Gilead ngesi arai apakeng a Yepita.

²Ayakasi Gilead talokookeng ngiche lu edouni aberu keng. Ani epolounete kesi, kiritasi Yepita anawi ebalasi, “Emam ibore irumi iyong ani a apakosi, kainyo irai iyong ikoku a aberu a ache.”

³Todok Yepita ani kata lokookeng tolot nakwap a Tob. Tochunun ngitunga ngiche luko pasiek nia Yepita, kiruko ka ngesi toliworos ngirukooi.

⁴Ani ekisidi kitijikis Ngiamon Ngisirael.

⁵Ani itijikinete Ngiamon Ngisirael, toloto ngikarikok a Gilead torikut Yepita alo Tob.

⁶Tolimokis kesi Yepita tamasi, “Bua toliwor ekarikon kosi, sodi atopedoreta akitijikin Ngiamon.”

⁷Nakaneni tatachak Yepita kesi tama, “Pekolong kiremokinosi esi ayong kiritasi anawi a apakang a? Nyo tokona iponitotor esi nikang ani ianyunitotor ngichan?”

⁸Tolimokis kesi Yepita tamasi, “Kibongu tokona sua nikon kainyo kisaki erukosi ka iyong kitiji Ngiamon sodi toliwor ekarikon a ngitunga kadaang a Gilead.”

⁹Tolimok Yepita kesi tama, “Ani kibuunito esi ayong nawi nabo akitijwore Ngiamon, ani kiinak Ekapolon Akuj ngoni agogongu edwanga Ngiamon, aliwor ayong ekapolon kus.”

¹⁰Tatachut kesi tamasi, “Ekapolon Akuj eliwor ekaanyunan yok. Kisubakini sua dir ngakiro na ilim iyong.”

¹¹Sodi kirukosi Yepita ka ngikarikok a Gilead. Kitiliwosi ngitunga ngesi ekapolon ka ekarikon kech. Tolimu Yepita ngakiro keng daang alongaren Ekapolon Akuj alo Misipa.

¹²Ani erumor tomea Yepita ngitunga nia ekapolon a Ngiamon ebala, “Nyo kon atingit ayong, ibunitor akitijwore ngitunga a akwap kosi?”

¹³ Tatachak ekapolon a Ngiamon ngitunga a Yepita tama, “Alemarete kolong Ngisirael akwap kang na apudunioto alo Misiri. Tolemasi napei anangolol a Arinon tanang nangololin a Yabok ka Yorudan. Tajala bocha tokona akwap ngina a ekisil.”

¹⁴Tobua nabo Yepita ngitunga keng nia ekapolon a Ngiamon

¹⁵ebala, “Nyelemara Ngisirael akwap a Moab kori na Amon.

¹⁶Ekote kolong ngakiro nege, na arotokinioto Ngisirael alo Misiri, apot kesi kitoro nariet tananga napas a Akaba, sodi potu Kadech.

¹⁷Tomeasi Ngisirael ngitunga nia ekapolon a Edom ebalasi, ‘Kimiekinae kare sua etoro nakwap kus.’ Nakaneni, abu ekapolon a Edom towou achamun kesi. Tomeasi nabo ngitunga lokapolon a Moab, towou nabo tani ngolo. Sodi kiboikinos robo Ngisirael Kadech.

¹⁸Ani erumor toloto kesi kitoro nariet, kirimo akwap a Edom ka Moab jik tanangut lowae lo alo kide Moab, lowae loche a angolol a Arinon. Toloma kesi neni, nakaneni nyedokara kesi ekwakaye Arinon kainyo arai neni ekukuor a Moab.

¹⁹Tomeasi Ngisirael itwaan nia Sion alo arai ekapolon a Ngiamor lo apolokinit Echibon, ebala, ‘Kimiekinae kare sua etoro nakwap kon atoloto nakwap kosi.’

²⁰Nakaneni towou Sion achamun Ngisirael itorete nakwap keng. Sodi Sion tochunak ngasigerea keng daang tolom Yaas, kitiji Ngisirael.

²¹Nakaneni abu Ekapolon Akuj na erai Akuj a Isirael kisidwang Ngisirael Sion ka ngasigerea keng. Sodi tolemasi Ngisirael akwap daang a Ngiamor alu alomito neni.

²²Toloma kesi nakwap daang a Ngiamor napei alo Arinon alokuju tanang Yabok alowae alo alokwap. Kisiak nabo anariet ana eyei kide tanang Yorudan alo too.

²³Aloger kangolo, Ekapolon Akuj na erai Akuj a Isirael ngesi eritari Ngiamor kotere Ngisirael lu eraakasi ngitunga keng.

²⁴Isakete tokona esi abuar akwap ngina? Nyitingete ibore nikiinak esi akuj kus nabe Chemoch a? Kitingi sua ibore daang nikiinak sua Ekapolon Akuj na erai Akuj kosi.

²⁵Ijok tokona iyong noi idwangit Balak lokookeng a Sipor lo erai ekapolon a Moab a? Eyei akolongit elekatar ngesi ka Ngisirael a, kori eyei akolongit ajioto kesi ka Ngisirael a?

²⁶Ngikaru ngamiae ngauni kesi alomitotor Ngisirael Echibon, ka Aroer, ka ngadakarin kech ta ngirerea daang lu eyakasi lokwaasea a angolol a Arinon. Ikote kolong esi abuar ngirerea ngulu alokaru kangulu kadaang ai?

²⁷Nyesechakina robo ayong esi, nakaneni kisechakis esi ayong ani isaketa akitijwore ayong. Kimiek Ekapolon Akuj na erai akatubon ngakiro totiaku akolongit naga ngakiro a Ngisirael ka Ngiamon.”

²⁸ Nakaneni abu ekapolon a Ngiamon nyiira ngakiro na ameuni Yepita nikeng.

²⁹Sodi bu etau a Ekapolon Akuj nia Yepita tonyou ngesi kitor Gilead ka Manase, sodi tobongu Misipa alo Gilead ani erumor tolot Amon.

³⁰Sodi kikong Yepita ani a Ekapolon Akuj ebala, “Ani kisidwang iyong ayong Ngiamon,

³¹kepeyokin ayong iyong itwaan nicha isiauni topud alokai kang bu akisiriamuun ayong abonguni alojie arai ekedwangan. Kalemikini ayong iyong itwaan ngini toliwor akipeyos na inomio.”

³²Sodi todoka Yepita ekwakaye angolol tolot akitijwore Ngiamon. Kidwang ngesi Ngiamon kotere Ekapolon Akuj.

³³Kitijik ngesi kesi napei alo Aroer tanang lowaitin daang a Minis. Araakasi daang ngirerea ngitomwon-arei, tanang Abel Keramim. Aarar ngitunga lukaalak. Apot Ngisirael kidwanga Ngiamon.

³⁴Ani ebongori Yepita nawi keng alo Misipa, kisiriamu ngesi nakookeng idongae taramite atamburin. Ngesi bon arai ikoku a Yepita, amam Yepita ngide ngiche, lusapa kori lupesur.

³⁵ Ani ingolikini Yepita nakookeng, abu tochilichilaa ngiworui keng ialolongi tama, “Wae, nakookang! Kiar iyong ayong etau! Nyaanu ngakiro kiinunea iyong ayong ngichan luapolok kona? Ekong ayong ani a Ekapolon Akuj, nakaneni nyapedori ayong abuar akikong ngina!”

³⁶Tolimok nakookeng ngesi tama, “Apa, ani kikongit iyong ani a Ekapolon Akuj, tosubere ayong ngakiro na ikong iyong, aloger alo kitachakinea Ekapolon Akuj iyong ngakiro naaronok ani eya Ngiamon, alu eraakasi ngimoe kon.”

³⁷Nakaneni abu ngesi kingit apakeng tama, “Tosubakinere ayong akiroit napei naga, kimiekinae ayong bon a ngilapio a ngiarei, sodi erukosi ka ngapaalon kang atoloto ealolongo alomoru ani atoanea ayong eringa arai apese na nyepero ka ekile a ache.”

³⁸Tolimok apakeng ngesi tama, “Kape.” Kimiek Yepita ngesi tolot a ngilapio a ngiarei. Kirukosi ngesi ka ngapaalon keng kigoro ialolongete alomoru ani araakar ngesi akatoan eringa nyiuta, kidou ngide.

³⁹Ani edaun ngilapio ngiarei, tobongu ngesi nika apakeng. Tosubea apakeng ngesi ngakiro nasek ekongit ani a Ekapolon Akuj. Totoan nakookeng a Yepita eringa erai apese na nyepero ka ekile a ache. Toliwor ibore ngini etal alo Isirael,

⁴⁰toliworos ngapesur eloseenete ekaru daang moding a ngirwa a nguomwon akigoro nakookeng a Yepita na akwap a Gilead.