Read turkana Ngikatubok Ngakiro 12 Bible Online

Ngikatubok Ngakiro 12 - turkana bible

Ngikatubok Ngakiro 12

¹Tonyout ngitunga a Epiraim lojie, todokasi ekwakaye angolol a Yorudan toloto Sapon tolimokis Yepita tamasi, “Ikokini iyong ikalami ekukuor tolot kitiji Ngiamon, nyikinyar sua erukosi ka iyong ai? Kinomi sua akai kon a akim alokidiama kon!”

²Tolimok Yepita kesi tama, “Kipot ayong ka ngitunga kang eburata ka Ngiamon lokojokon. Ani kanyarae ayong esi nyepona esi ayuun ayong anikech.

³Ani engolikini ayong atamar nyikiyuunete esi ayong, abu ayong atajal akiyar kang atodoka ekwakaye atolot etiji Ngiamon. Kesidwang Ekapolon Akuj ayong kesi. Nyo tokona iponitotor esi nikang akolongit naga akitijwore ayong?”

⁴Ani erumor tochunak Yepita ngitunga a Gilead daang kitijwoto Ngiepiraim kidwanga. (Abalasi sek Ngiepiraim, “Esi ngitunga a Gilead lu iyakasi Epiraim ka Manase, irotokinete kolong esi ani a Epiraim!”)

⁵Kibaka ngitunga a Gilead alodoketa kadaang a angolol a Yorudan sodi kiratakinae Ngiepiraim nyeesiwa. Ani nacha ebunio itwaan a Epiraim ni esaki akisii, kingit kesi tama, “Kimiekinae atodoka ekwakaye.” Kingita ngitunga a Gilead ngesi tamasi, “Irai iyong itwaan a Epiraim a?” Ani ketama ngesi, “Meere.”

⁶Tolimokis ngesi tamasi, “Tama, iyong Chiboles.” Elimuni ngesi tama, “Siboles,” kainyo akuruworit ngesi alimun akiroit ngina niajokon. Sodi kirumut ngitunga a Gilead ngesi taarakis lodoket a Yorudan. Ngirwa ngulu, apon taarae Ngiepiraim ngabunge ngatomwon-omwon ka ngaarei.

⁷Topolok Yepita Isirael a ngikaru a ngikan-kapei. Sodi totoan ngesi tonukakinae lore[13] a Gilead, lo ayei awi keng.

⁸Atoanet a Yepita, abu Ibisan lo a Betleem torik Isirael.

⁹Ayakasi ngesi talokookeng ngitomwon-uni ka tanakookeng ngatomwon-uni. Kipoto ngesi tanakookeng kiuta ngikiliok a emachar alogela, sodi torikok nabo talokookeng ngapesur ngatomwon-uni na emachar alogela kiuta. Topolok Ibisan Isirael a ngikaru a ngikan-kaarei.

¹⁰Sodi totoan ngesi tonukakinae Betleem.

¹¹Atoanet a Ibisan, abu Elon lo a Sebulun topolok Isirael a ngikaru a ngitomon.

¹²Ani erumor totoan ngesi tonukakinae Aijalon anakwap a Sebulun.

¹³Atoanet a Elon, abu Abidon lokookeng a Ilel loa Pirason topolok Isirael.

¹⁴Ayakasi ngesi talokookeng ngitomwon-omwon ka ngitatae ngitomwon-uni lu ameto ngisikiria ngitomwon-kaarei. Topolok Abidon Isirael a ngikaru a ngikan-kauni.

¹⁵Sodi totoan ngesi tonukakinae lore a Pirason lo eyei nakwap a Epiraim ana a akwap a ngimukur a Ngiamalek.