Read turkana Ngikatubok Ngakiro 13 Bible Online

Ngikatubok Ngakiro 13 - turkana bible

Ngikatubok Ngakiro 13

¹Apot nabo Ngisirael tosechakis Ekapolon Akuj, sodi kimiek ngesi Ngipilisti epolokinete Ngisirael a ngikaru a ngitomwon-omwon.

²Ayei itwaan iche a ere a Sora anyaritae Manoa. Arai ngesi eka ekitela a Dan. Amam aberu keng ngide ayakasi.

³Bu emalaikat a Ekapolon Akuj naberu a Manoa tolimok tama, “Kingolik a, ikolupana iyong emam ngide. Nakaneni ipoti iyong kidou ikoku nisapat.

⁴Tochoite robo imasi emuna kori epurot, kori nyiinyam akimuj cha daang na italeo akinyam,

⁵ kainyo ipoti iyong kidou ikoku nisapat. Nyiibany akou keng jik kainyo italeunio ngesi toliwor ika Akuj napei idounere. Isiakini ngesi ayuun Ngisirael ani eya Ngipilisti.”

⁶Tolot aberu ngina tolimok lokile keng tama, “Abunit itwaan a Akuj nikang. Ekwaan ngesi ka emalaikat a Akuj, arai lo kiteemi lokojokon. Nyingita ayong ngesi ni abunio, nabo nyelimokina ngesi ayong ekiro keng.

⁷Nakaneni abu ngesi katolimok ayong tama, ‘Kingolik a, ipoti iyong kidou ikoku nisapat. Tochoite robo imasi emuna kori epurot, nabo nyiinyam ibore cha daang ni italeo akinyam, kainyo eliwor idia ikitaleuno a Akuj napei idounere.’ ”

⁸Sodi kilip Manoa Ekapolon Akuj tama, “Ee, Ekapolon Akuj, kelipit atamar, kimiek kare itwaan a Akuj ni imeuni iyong, bu nabo nikosi kitatam sua ngakiro na ejoikinit kisubea idia ni idounio.”

⁹Abu Ekapolon Akuj kiira ngakiro a Manoa sodi tomeu nabo emalaikat ni aberu eyei naroatin. Nakaneni pearukito Manoa ka ngesi.

¹⁰Sodi kipiiri aberu ngina atipei tolimok lokile keng tama, “Kingolik a, abu nabo ekile lo ngoon abunit nikang.”

¹¹Tonyou Manoa kiwapak aberu keng. Tolot ngesi lokile ngolo kingit tama, “Iyong itwaan ningoon isuruori aberu naga?” Tatachu ekile ngolo tama, “Ee.”

¹²Sodi kingit Manoa tama, “Ani kiyookin ngakiro kon, nyo ejoikinit edia esubi? Ejoikinit ngesi ibooyi eboyor ali?”

¹³Tolimok emalaikat a Ekapolon Akuj Manoa tama, “Ejoikinit aberu kon echoikini ngakiro daang na alimok ayong ngesi.

¹⁴Nyeenyam ngesi ibore cha daang ni itorunit namusabib. Nyeemat emuna kori epurot, kori nyeenyam akimuj cha daang na italeo akinyam. Kiwap ngesi ngakiro daang na adungok ayong ngesi.”

¹⁵Tolimok Manoa emalaikat a Ekapolon Akuj tama, “Nyiilot kare. Kimiekinae sua ataarakisi iyong ikale idio.”

¹⁶Tolimok emalaikat a Ekapolon Akuj Manoa tama, “Ani kiratakis esi ayong, nyanyami ayong akimuj kus. Nakaneni ani kisubakis esi akipeyos na inomio, kipeyokis Ekapolon Akuj.” (Peayeni Manoa atamar erai ngesi emalaikat a Ekapolon Akuj.)

¹⁷Tolimok Manoa emalaikat tama, “Tolimokinae sua ekiro kon sodi atopedoreta sua arima iyong erai kiyookin ngakiro kon.”

¹⁸ Kingit emalaikat ngesi tama, “Nyo ingitar iyong ekiro kang, kitee atamar erai lo kitalari?”

¹⁹Sodi tolem Manoa ikale ka akipeyos a ngalemet kipeye alokidiama ataaba, kipeyok Ekapolon Akuj na esubi ngakiro nakitalarete.[14]

²⁰Ani elosi asarae a akim kidiama alokeno a ngakipeyos, abu emalaikat a Ekapolon Akuj tolot kidiama alotooma asarae a akim, iteete Manoa ka aberu keng. Sodi tadakakinos kesi kwap tatapa ngireetin ngalup.

²¹Nyebuno emalaikat a Ekapolon Akuj nia Manoa ka a beru keng nabo jik.

²²Tolimok Manoa aberu keng tama, “Iteni kitoaki ngoni kainyo kingolik Akuj!”

²³Nakaneni tolimok aberu keng ngesi tama, “Arai tasaki Ekapolon Akuj akiar ngoni, pekechamunit ngesi ngakipeyos yok, nabo pekitoodikinit ngesi ngoni ngakiro nugu daang kori pekilimokinit ngakiro na ikote nugu.”

²⁴Kidou aberu ngina ikoku nisapat, tolimok ekiro keng Samson. Abu idia topolou, topia Ekapolon Akuj ngesi.

²⁵Min etau a Ekapolon Akuj nikeng kitogogong ngesi, na ayakar ngesi kiding Sora ka Echikol anadakar a Dan.