Read turkana Ngikatubok Ngakiro 14 Bible Online

Ngikatubok Ngakiro 14 - turkana bible

Ngikatubok Ngakiro 14

¹Akolongit apei, abu Samson totiyaar tolot Timuna. Ani enangi inaa, kingolik ngesi apese ache na arai aka Ngipilisti.

²Sodi tobongo ngesi nawi tolimok apakeng ka itiokeng tama, “Eyei apese ache a Ngipilisti Timuna nakaminarit ayong. Torikokinae ayong apese ngina toliwor aberu kang.”

³Nakaneni tolimokis apakeng ka itiokeng ngesi tamasi, “Nyo peianyunea iyong apese alotunga a emachar yok, alu eraakasi ngitunga yok? Nyo ilositor iyong asakar aberu ni eya Ngipilisti lu eraakasi ngibukui lugelayek?” Nakaneni tolimok Samson apakeng tama, “Torikokinae ayong apese ngina kainyo ngesi kaminarit ayong.”

⁴Peayenete apakeng ka itiokeng atamar arai Ekapolon Akuj arikit Samson akisub ngakiro nguna ani asakea erot lo itijio Ngipilisti. Arai Ngipilisti apolokinito Isirael ngirwa ngulu.

⁵Sodi kirukosi Samson ka apakeng ta itiokeng toloto Timuna. Ani epedete kesi ngamanat a Ngimusabib alo Timuna, kiira Samson engatuny lotisorokit irurumae.

⁶Atipei bu etau a Ekapolon Akuj nia Samson kitogogong ngesi, sodi toruakin engatuny tonyilinyilaa a ngakan, loger lo enyilinyilaarea itwaan ikale. Nakaneni abu ngesi nyeelimok apakeng ka itiokeng ngakiro na abu ngesi tosubak.

⁷Ani erumor tolot Samson kisuruor apese ngina, tomina apese ngina ngesi.

⁸Ani ekisidi tobongo Samson kiut apese ngina. Totubor ngesi alorot tolot akingolikin akwaan a engatuny a lokolong aari ngesi. Kingolik ngesi enene a ao ka akimiet keng anakwaan a engatuny.

⁹Tokiritok ngesi akimiet a ao nakan keng tanyam alorot. Tolot ngesi nika apakeng ka itiokeng, nak kesi akimiet a ao ache, tanyama kesi. Nakaneni abu Samson nyeelimok kesi atamar alemuni ngesi akimiet a ao anakwaan a engatuny alo atoanit.

¹⁰Tolot apakeng a Samson nawi a apese kangina, sodi tosubak Samson akimuj nakaalan, kimujae. Asubeenete ngisorok lu eutanasi kongina.

¹¹Ani ingolikinete Ngipilisti ngesi, yaut ngisorok ngitomwon-uni kiruko ka ngesi.

¹²Tolimok Samson kesi tama, “Kimiekisi katolimok ngakitadapet, ani kilimokis esi ayong eger a ngakitadapet kanguna eringa ngirwa lukan-kaarei a esukukuu a akuuta nyedauna, kainakini ayong esi ngiworui luajokak ngitomwon-uni ka ngiworui luche nabo ngitomwon-uni.

¹³Nakaneni ani kipiyo esi alimun eger a ngakitadapet kanguna, kiinakis esi ayong ngiworui luajokak ngitomwon-uni ka ngiworui luche nabo ngitomwon-uni.” Tolimut kesi tamasi, “Tolimokinae sua ngakitadapet kon eirasi, pan.”

¹⁴Tolim ngesi tama, “Nia ekanyaman abunio ibore ninyamat. Nia lokaagongon abunio ibore nikaabon.” Kipiyo kesi alimun eger a ngakitadapet kanguna a ngirwa a nguuni.

¹⁵Ani enangi akolongit na a ngoomwon, tolimokis kesi aberu a Samson tamasi, “Kimaima lokile kon kitolimok sua eger a ngakitadapet kanguna. Ani kemam kinomi sua iyong a akim ka ngitunga a awi a apakon. Kinyaraunete kolong esi sua nege akidem ngiboro a?”

¹⁶Tolot aberu a Samson nikeng kigoronok ngesi tama, “Kiremokino iyong ayong. Ilimokini iyong ngitunga kang ngakitadapet nakaneni nyikilimok ayong eger a ngakitadapet kanguna!” Tolimok Samson ngesi tama, “Kingolik a, eringa ayong nyelimokina tani apakang ka itiokang. Ekokini ayong kalimokini iyong ai?”

¹⁷Kigoronok aberu ngina Samson alorwa alukan-kaarei a akuuta kangulu. Ani enangi akolongit na ngakan-kaarei, tolimok Samson ngesi eger a ngakitadapet kanguna, kainyo abu ngesi toneikin akingisit loche. Tolimok aberu ngina ngitunga keng eger a ngakitadapet kanguna.

¹⁸Sodi ani akolongit na ngakan-kaarei, eringa Samson nyepero,[15] apot ngitunga a ere kangolo tolimokis Samson tamasi, “Nyo ebob idwangit ao? Nyo egogong idwangit engatuny?” Tatachak Samson kesi tama, “Arai nyeerai aite kang ichileta esi ngalup, pekianyunito eger a ngakiro kanguna.”

¹⁹Atipei bu etau a Ekapolon Akuj nikeng kitogogong ngesi. Totiyaar ngesi tolot Achikelon taar ngikiliok ngitomwon-uni, tobut ngiboro kech, sodi yau ngiworui lukaanikak ajokak inu ngikiliok lu alimunete eger a ngakitadapet. Ani erumor, tobongo ngesi nawi a apakeng engoit ileleba kotere ngakiro asubakinosi.

²⁰Kipotoroe aberu a Samson nakinae lopae keng lokolong aweikinit ngesi anakuuta.