Read turkana Ngikatubok Ngakiro 15 Bible Online

Ngikatubok Ngakiro 15 - turkana bible

Ngikatubok Ngakiro 15

¹Ani ekisidi, tolot Samson aanyun aberu keng ngirwa lu alemere ngakanoi. Arikokinit ngesi aberu keng ikale. Tolimok ngesi apakeng a aberu keng tama, “Asaki atoloma kai a aberu kang.” Nakaneni kitonger apakeng a aberu Samson alomar tooma.

²Tolimok ngesi Samson tama, “Etamit ayong atamar kori iremokino iyong ngesi lokojokon. Sodi epoto ayong ngesi ainak lopae kon. Nyibus mono nakaatokeng naachi akidwang ngesi a? Tolema kare ngina.”

³Tolim Samson tama, “Akolongit naga, nyeringa nabo ayong kapaikinio ngakiro na asubakinea ayong Ngipilisti!”

⁴Sodi tolot Samson kirum ngikweei ngamiae ngauni. Kimorik ngikosiman kech toen a ngaarei-rei, sodi toinik ngakinwaket naeneta.

⁵Ani inokakini ngesi ngakinwaket nguna, talakak ngesi ngikweei tolomasi namanat a Ngipilisti. Kinoma kesi ngikinyam lu alemitae daang ka lu ayakasi namanat, ta ngikito a akimiet dang.

⁶Sodi kingitas Ngipilisti tamasi, “Ngae asubi ngakiro nugu?” Tolimut kesi tamasi, “Samson, lo erai lokamuran a itwaan a Timuna. Asubi ngesi kongina kainyo epotorio aberu keng nakinae lopae keng.” Sodi tolot Ngipilisti naberu kinoma ngesi ka apakeng a akim totoaka.

⁷Tolimok Samson kesi tama, “Ani kerai na isubete esi kesi nugu, ekongi ayong atamar atachakini jik, ani erumor atolot!”

⁸Kitijik Samson kesi nikaronon taar lukaalak. Ani erumor tolot ngesi kiboikin nakope a ataaba ana eyei Etam.

⁹Pot Ngipilisti toloma Yuda, sodi kitijikis ngitunga a ere a Lei.

¹⁰Kingit ngitunga a Yuda kesi tamasi, “Nyo kitijioto esi sua?” Tatachut kesi tamasi, “kipotu sua akirumun Samson atoena sodi atosubeta ngesi ngakiro nakolong kisubea ngesi sua.”

¹¹Tonyout ngitunga a Yuda ngabunge ngauni toloto nakope a ataaba ana eyei Etam kingita Samson tamasi, “Nyiyeni iyong atamar kipolokinito ngoni Ngipilisti a? Anukiro tokona nugu kisubakinea iyong sua?” Tatachak Samson kesi tama, “Asubakinea ayong kesi ngakiro nakasubakineta kesi ayong.”

¹²Tolimokis kesi ngesi tamasi, “Kipotu tokona sua akien iyong sodi epotokisi Ngipilisti.” Tolimok Samson kesi tama, “Kikongo esi atamar nyikiarete esi ngikulepek ayong.”

¹³Tolimut kesi tamasi, “Mam, nyikiari sua iyong. Akien bon kieni sua iyong sodi epotokisi Ngipilisti.” Sodi toena kesi ngesi a ngaunoi a ngaarei anakitet tobuut ngesi anaburibur.

¹⁴Ani enanguni ngesi Lei, tomotunos Ngipilisti nikeng echalasi. Atipei bu etau a Ekapolon Akuj nikeng kitogogong ngesi. Tongedangedaa ngesi ngaunoi na aenitere ngakan keng tosub keraakasi ngiunoi lu enomit akim.

¹⁵Taanyu ngesi akoit a abokony a esikiria alo keringa etoani. Tokudokin ngesi tolem akoit ngina, taarea ngikiliok abunget apei.

¹⁶Toeok Samson tama, “Aar ngikiliok abunget apei a akoit a abokony a esikiria. Asenok ayong kesi a akoit a abokony a esikiria.”

¹⁷Ani erumor ngesi aeo, tachaka ngesi akoit ngina anakan. Tanyarae neni Ramas Lei.[16]

¹⁸Sodi tanyam ngesi akure lokojokon. Tanyara ngesi Ekapolon Akuj tama, “Kitiliwo iyong ayong ekedwangan a eger aloationon. Kaari tokona akure ayong, sodi kerumut Ngipilisti lu eraakasi ngibukui lugelayek lugu a?”

¹⁹Sodi tangaa Akuj nikoororon analup alo Lei, pot ngakipi. Tamat Samson ngakipi kikwaru ngesi topuatun etau keng. Tanyarae elelea ngolo Akore.[17] Eringa elelea ngolo eyei Lei.

²⁰Torik Samson Ngisirael a ngikaru a ngitomwon-arei alu apolokinitotor Ngipilisti akwap