Read turkana Ngikatubok Ngakiro 16 Bible Online

Ngikatubok Ngakiro 16 - turkana bible

Ngikatubok Ngakiro 16

¹Akolongit apei, alosi Samson lore a Ngipilisti lo enyaritae Gasa, kingolik amalaat sodi tolot topero ka ngesi.

²Tolimokinae ngitunga a Gasa tamarae, “Abu Samson nege.” Kiriama kesi neni sodi toperut kesi Samson alokidor a ere akwaar kiiya. Kidatakis kesi akwaar kiiya itamete ebalasi, “Kimiekisi edarutu tanang echili nanyang, sodi ataara ngesi.”

³Toper Samson ani enangi kiding akwaar, tonyou tolot toting ngidorin a ere toditu, kiturukuu ka ngapirio naarei daang aapei ka egoliet kech, ta ngiboro kech daang, sodi kidokok losegeta keng tadaka jik todokarae kidiama emukura lo erounit Eburon.

⁴Ani ekisidi kanguna, tachamun Samson ka aberu ache anyaritae Delila, na alomit nadipo a Serek.

⁵Pot Ngikapolok lukan a Ngipilisti tolimokis aberu ngina tamasi, “Kimaima Samson kitolimok ibore itogogongit ngesi lokojokon, ka eger lo kipedorea sua akidwang ngesi, atoena sodi etilimiyosi. Elemuni ipei kosi ngaropiyae abunget apei ka amiat apei kiinak iyong.”

⁶Sodi tolimok Delila Samson tama, “Tolimokinae kare ayong ibore ni kitogogongit iyong lokojokon ka eger lo epedorea itwaan akidwang iyong kitoen sodi kitililimiyo.”

⁷Tatachu Samson tama, “Ani kaen ayong a ngaunoi a akau anakitet a ngakan-kaarei ana nyitoonitoe, apalagagi ayong ekok ngitunga luche.”

⁸Sodi inut ngikapolok a Ngipilisti Delila ngaunoi a akau nakitet ngakan-kaarei na peetoonitoe, sodi toen Delila Samson a ngaunoi kanguna.

⁹Edait Delila ngikiliok ngiche alokai ana alotooma idarito. Tolimok Delila Samson tama, “Samson, eponito Ngipilisti!” Nakaneni tonged Samson ngaunoi nguna loger a ngiunoi alu enomi akim tongedas. Sodi apot kesi nyeeyan ni eanyunitor ngesi ngikilinga.

¹⁰Tolimok Delila Samson tama, “Kingolik a, kitabangaan iyong ayong, sodi kingal. Tolimokinae kare eger lo epedorea itwaan akien iyong.”

¹¹Tolimok Samson ngesi tama, “Ani kaen ayong a ngaunoi anakitet ana emam ibore aenitere a ache, apalagagi ayong ekok ngitunga luche.”

¹²Sodi tolem Delila ngaunoi nakitet toen Samson, ani erumor kirema tama, “Samson, eponito Ngipilisti!” Edarito ngikiliok anamaniyat ana alotooma. Nakaneni tonged Samson ngaunoi anakan keng loger a ngiunoi aluuchik.

¹³Tolimok Delila Samson tama, “Tani tokona eringa iyong kitabangaanit ayong kingalae. Tolimokinae kare eger lo epedorea itwaan akien iyong.” Tatachu Samson tama, “Ani kioyik iyong ngaenet nakan-kaarei a ngitim kang totokokin, todonyok a emutu kirijak, apalagagi ayong ekok ngitunga luche.”

¹⁴Ani ejotoor Samson, tolem Delila ngaenet nakan-kaarei a ngitim a Samson tooyik totokokin, sodi todonyok a emutu kirijak, dio alimokin Samson tama, “Samson, eponito Ngipilisti!” Nakaneni tokienyu Samson talachak ngitim keng anatokot.

¹⁵Sodi kingit Delila Samson tama, “Ikokini iyong itamari ayong ‘Kamina ayong iyong,’ togeal etau kon ni eyei ai? Ngalooso nauni nugu kitabangaan iyong ayong, nabo nyelimokina iyong ayong ibore ni kitogogongit iyong lokojokon.”

¹⁶Torubak Delila ingisit Samson jiik. Tobela Samson ni aneikinor Delila akingisit ngesi,

¹⁷sodi tolimok ngesi Delila ngakiro keng daang tama, “Nyebanya akou kang nakanuan jik, kainyo ketaleunio kolong ayong atoliwor ika Akuj napei eringa ayei nakook a itiokang. Ani kabanyar ayong, edaun ngikilinga kang atapalagag ayong ekok ngitunga luche.”

¹⁸Ani eanyuni Delila atamar kalimoki Samson ngakiro na iteni, tomea itwaan anyarare ngikapolok a Ngipilisti ebala, “Potu tokona aponet naga bon kainyo kalimoki ngesi ayong ngakiro na iteni.” Sodi pot ngikapolok a Ngipilisti nikeng etingito ngaropiyae.

¹⁹Kitojotoo ngesi Samson anakejen keng sodi tanyarau itwaan bu tabanya ngaenet nakan-kaarei a ngitim a Samson. Ani erumor tolomak aboliar Samson ani adaunotor Samson ngikilinga.

²⁰Tolim Delila tama, “Samson eponito Ngipilisti!” Tokienyu Samson itami ebala, “Alachakin ayong atobuchar loger lopalem.” Peayeni ngesi atamar aisiki Ekapolon Akuj ngesi.

²¹Kirumut Ngipilisti ngesi topuyonokis ngakonyen keng. Torikosi ngesi Gasa sodi toena ngesi a ngiriko a ngasua ananyangayek. Kitusubae ngesi etich a akiriere alojela.

²²Nakaneni kisiakis ngitim a akou keng arupun nabo.

²³Kiriamariama ngikapolok a Ngipilisti akinyam akimuj nakaalan ka akipeyokin akuj kech nabe Dagon akipeyos naapolon. Toeokis kesi tamasi, “Kisidwang akuj kosi sua Samson lo erai emoit kosi!”

²⁴Ani ingolikinete ngitunga Samson, kipuruut akuj kech ebalasi, “Kisidwang akuj kosi sua emoit kosi, lo enyasu akwap kosi, lo aar ngikaalak kosi.”

²⁵Ani elakarosi kesi, tamasi, “Tanyarautu Samson, bu tobolia kitalaka ngoni.” Sodi tanyaraunae kitalaka kesi. Kitowae ngesi alokiding ngapirio.

²⁶Tolimok Samson edia lo arikit ngesi tama, “Kimiekinae atatap ngapirio na itoweito akai, asaki atogongakin.”

²⁷Eleleba ngikiliok ka ngaberu kai, ta ngikapolok a Ngipilisti daang. Ayakasi nabo ngikiliok ka ngaberu esibit ngabunge ngauni kidiama akai, lu eteete Samson ebolia.

²⁸Sodi tanyara Samson Ekapolon Akuj tama, “Ee Ekapolon lo irai Ekapolon Akuj, kitamunae ayong. Kelipit iyong atamar kitogogong ayong akitogogongiet naga bon. Kitogogongoi kare cha Akuj sodi atatachakinea Alopilisti kalu ngakiro na apuyokineta kesi ngakonyen kang naarei.”

²⁹Toting Samson ngapirio naarei eyakasi kiding akai igangito, toting apei a akan ana aloteten, toting nache alokedieny, sodi kijuka

³⁰Kirema tama, “Kimiekinae ayong atotoaka ka Ngipilisti!” Abu ngesi kijuka a ngikilinga keng kadaang, sodi toukokin akai lokapolok lukan ka ngitunga daang lu ayakasi neni. Abu Samson taar ngitunga lukaalak na atoanea ngesi lu idwangito lu aari ngesi eringa eyari.

³¹Pot talokaatokeng ka ngitunga a awi kech, luche tolemasi akwaan keng yaasi tanukakis kiding Sora ka Echitaol, naliel a Manoa alo arai apakeng. Arikit Samson Ngisirael a ngikaru a ngitomwon-arei.