Read turkana Ngikatubok Ngakiro 17 Bible Online

Ngikatubok Ngakiro 17 - turkana bible

Ngikatubok Ngakiro 17

¹Ayei kolong itwaan anyaritae Mika ni alomit nakwap na a ngimukur a Epiraim.

²Tolimok ngesi itiokeng tama, “Ngaropiyae nakolong araakasi abunget apei ka amiat apei akokoyari itwaan anikon a, sodi kilamakin iyong eira ayong a ngaki kang, kingolik a, ngaropiyae nguna atingit ayong. Ayong kolong alemari.” Tolimok itiokeng ngesi tama, “Kitopia iyong Ekapolon Akuj, ikakoku.”

³Sodi tobuak ngesi itiokeng ngaropiyae. Tolim itiokeng tama, “Ekongi ayong alope akitaleun ngaropiyae nugu toliworos ngaka Ekapolon Akuj nyeeponeta ngilam nia lokookang. Elemunio kesi tosubunere akuj nasubuna nakitoe sodi toburuchiarae a akwangat. Tokona bocha, kabuakini ayong iyong ngaropiyae nugu.”

⁴Ani erumor tolem ngesi ngaropiyae nguna tobuak itiokeng. Tolem itiokeng ngaropiyae nguna ngamiae ngaarei nak eketiakan ngasua. Kicheu itwaan ngini akuj nasubuna anakitoe sodi toburuchia a akwangat. Kiwaakinae kai a Mika.

⁵Ayei itwaan nibe Mika ngini ni elipeenea akuj keng. Tosub ngesi ngakujo nasubuna nabo todonyu akaluwat*g** sodi toseu lokookeng epei toliwor emuron keng.

⁶ Ngirwa ngulu amam ekapolon ayei Isirael. Asubi itwaan daang ngakiro na ajoikinito ngesi ilope.

⁷Ngirwa lupei ngulu, ayei esorokit epei a Ngilawi lo ebooyi alore a Betleem alo Yuda.

⁸Tonyou ngesi alo Betleem tasaka wache ni elomi. Ani analosit keng, tanangu ngesi nawi a Mika na ayei nakwap na a ngimukur a Epiraim.

⁹Kingit Mika ngesi tama, “Aliwae ibunio iyong?” Tatachu ngesi tama, “Arai ayong Elawit abunit alore a Betleem alo Yuda. Asaki wadio ni alomi.”

¹⁰Tolim Mika tama, “Eruko, toliwor eketutukon kang ka emuron kang, sodi kainak ayong iyong ngaropiyae ngatomon ekaru daang, ka ngiworui, ta akimuj.”[18]

¹¹Tacham esorokit lo a Lawi ngolo akiboikin ka Mika loger a lokookeng.

¹²Kitiliwo Mika ngesi emuron keng, sodi kiboikin nawi a Mika.

¹³Tolim Mika tama, “Ayeni tokona ayong atamar itojoki Ekapolon Akuj ngakiro kang daang kainyo Elawit erai emuron kang.”