Read turkana Ngikatubok Ngakiro 18 Bible Online

Ngikatubok Ngakiro 18 - turkana bible

Ngikatubok Ngakiro 18

¹Ngirwa ngulu, amam ekapolon ayei Isirael. Ngirwa ngulu, asakete ngitunga a Dan akwap na itiliworete akech toloma, kainyo peatiakakinitae kesi akwap na erai akech alotela a Isirael.

²Sodi tomeasi ngitunga a Dan ngikiliok ngikan lukoosok[19] anawiyei kadaang a ekitela a Dan. Ameario kesi alorerea a Sora ka Echitaol akireb akwap. Tolimokinae kesi kona, “Kapesi torebo akwap.” Tanangut kesi nakwap na a ngimukur a Epiraim, pot kai a Mika, topero neni.

³Na ayakatar kesi kai a Mika, apot toyena ekiruor a Elawit alosorokit ayei neni. Toreeunos nikeng kingita ngesi tamasi, “Ngae kiyauni iyong nege? Nyo isubi iyong anakwap kana?”

⁴Tatachu ngesi tama, “Eya ngakiro nakipupokina ayong ka Mika. Katachi ngesi ayong atosubea etich arai emuron keng.”

⁵Tolimokis kesi ngesi tamasi, “Kingit kare Akuj kejokearosi ngakiro a alotoru anakosi kana!”

⁶Tatachu emuron tama, “Kapesi akaalimon. Kiyoki esi Ekapolon Akuj analotoru anakus kana.”

⁷Sodi torotokis ngikiliok lukan ngulu tanangut lore a Laich, sodi kingolikis eger lo ebooyoto ngitunga kaneni peemito. Ekoni eboyor kech lo a Ngisidon. Araakasi kesi ngitunga lu ebooyete akaalimon, taraakas lukelilingak, lu amam itwaan eburaata. Ariamunito kesi ibore daang nicha eitanito, nabo abarito. Aloka kesi ani a Ngisidon nabo peaiyosi kesi ka ngitunga ngiche.

⁸Ani ebongorete ngikiliok lukan ngulu Sora ka Echitaol, apot ngitunga kech kingita kesi tamasi, “Anukiro ianyut esi?”

⁹Tolimut kesi tamasi, “Tonyoutu! Atoloto etijikisi ngitunga a ere a Laich, kainyo kingolik sua akwap erai natiajokon. Iboikinosi tokona esi emam ibore isubete a? Kiburuburakisi toloto tolomasi nakwap kitiliwosi akus!

¹⁰Ani inangete neni, iriamunete ngitunga lu nyiilit. Epolot akwap. Kiinak esi Akuj akwap ngina, na erai akwap na eyei ibore daang ni iitanit itwaan.”

¹¹Tonyout ngitunga ngamiae ngakan-kapei alokitela a Dan, tonyout alo Sora ka Echitaol alosit ejie.

¹²Toloto kesi kigurosi adakar alo too Kirias Yearim, alo Yuda. Ngesi eringaakar neni enyaritae adakar a Dan.

¹³Ani enyounete kaneni, tanangut kai a Mika na ayei nakwap a ngimukur a Epiraim.

¹⁴Apot ngikiliok lukan kolong sek alosito akireb akwap a Laich, tolimokis ngirukitos kech tamasi, “Iyenete esi atamar, tooma apei a ngakais kanu eyei akuj na esubunitae anakitoe sodi toburuchiarae a akwangat a? Eyakasi tani ngakujo nache ka akaluwat a emuron. Ekoe, anukiro kisubakini?”

¹⁵Apot kesi toloto kai a Mika ni ebooyo esorokit loa Lawi ngolo, kingitanasi ngesi eger a eboyor keng.

¹⁶Esaa lopei ngolo, apot ngitunga luche a ekitela a Dan, lu eraakasi ngamiae ngakan-kapei, lu aponito ejie, towaa alokidor.

¹⁷Tolomasi ngikarebok lukan ngulu jik kai tolemut akuj na asubunitae anakitoe toburuchiarae a akwangat, tolemut tani ngakujo nache, ka akaluwat na emuron. Esaa ngolo awei emuron alokidor arukito ka ngitunga lu aloose ejie lu araakasi ngamiae ngakan-kapei.

¹⁸Ani elomarete ngitunga ngulu kai a Mika alemar ngiboro lukitaleuno ngulu, abu emuron kingit kesi tama, “Nyo isubete esi?”

¹⁹Tolimut kesi tamasi, “Kililing. Tobunak akituk nakon ngina bu erukosi ka sua toliwor eketutukon kosi ka emuron kosi. Nyejok iyong iliwor emuron a ekitela alo Isirael akidwang aliwor emuron awi a itwaan a ipei a?”

²⁰Kitalakasi ngakiro nguna emuron ngolo, sodi tolem ngiboro lukitaleuno ngulu kirukosi ka ngitunga ngulu.

²¹Toreas kesi torotokis. Kingarenikis ngide kech, ka ngaatuk kech, ta ngiboro kech.

²²Ani eakarete kesi alokai a Mika, tanyarau Mika ngikudunyet keng lu ayakasi nakais pot toloto lojie. Toditasi kesi ngitunga a Dan,

²³enyarito kesi echalasi. Sodi toreas ngitunga a Dan tolimokis Mika tamasi, “Nyo kichani iyong irikunitor iyong ajore naga daang?”

²⁴Tatachu Mika tama, “Nyo ibalatar esi ayong, ‘Nyo kichani?’ Tarai bo ilemasi esi ngakujo kang nakolong asubi ayong, ka emuron kang tolooso. Nyo idongit nikang?”

²⁵Tolimut ngitunga lua Dan ngulu tamasi, “Tobunak akituk nyiilim tani akiroit apei, kainyo engoyete ta ngikiliok lugu kitijikis iyong, sodi totoaka iyong ka ngitunga a awi kon.”

²⁶Sodi torotokis ngitunga a Dan. Ani ingolikini Mika atamar eya ngitunga ngulu ngikilinga kedwangito ngesi, abu tobong nawi keng.

²⁷Alemaret kech ngiboro lu asubuni Mika, ani erumor torikosi emuron keng, apot kesi toloto Laich ni ayakasi ngitunga lu ebooyete akaalimon, taraakas lukelilingak. Taara kesi ngitunga a ere kangolo daang sodi kichunya ere a akim.

²⁸Emam itwaan abu toyuu kesi kainyo alonikina kesi ka Sidon nabo amam ngitunga ngiche aiyotor kesi. Ayei neni nadipo napei ayei ere a Besireob. Toduko ngitunga a Dan ere ngolo nabo, toloma.

²⁹Tanyarata kesi ekiro a ere kangolo Dan. Arai Dan ekiro a apaakech alokookeng a Yakobo. Arai sek ekiro a ere kangolo Laich.

³⁰Kitowaa ngitunga a Dan akuj nasubuna ngina toliwor ilipeeneo. Yonasan lo arai lokookeng a Gerichon, alo arai lokookeng a Musa ngesi abu toliwor emuron a ekitela a Dan. Toliworos ngalesea keng ngimurok jik tanang ni arikere ngitunga toliworos ngirikon.

³¹Abu akuj nasubuna a Mika ngina min neni ngirwa daang lu ayakar eam lo elipeenere Akuj Chilo.