Read turkana Ngikatubok Ngakiro 19 Bible Online

Ngikatubok Ngakiro 19 - turkana bible

Ngikatubok Ngakiro 19

¹Ngirwa ngulu, lu amamakar ekapolon ayei Isirael, ayei Elawit epei alomit lowaitin lukalonak a akwap ana a ngimukur a Epiraim. Toriko ngesi apese alore a Betleem alo Yuda akitiliwor apese keng a ngabwes,

²nakaneni abu apese ngina tongoa ka ngesi sodi tobongo nawi a apakeng alo Betleem sodi kiboi kaina ngilapio nguomwon.

³Tonyou lokile keng tolot asakar ngesi, esaki akimaima tobuu nawi. Kirukosi ngesi ka ekasuban etich keng taramasi ngisikiria ngiarei. Toriko apese ngesi kai, ani ingolikini apakeng a apese ngesi, kipeyou elakara.

⁴Abu apakeng a apese kiratak ngesi, sodi kiboikin ngesi neni a ngirwa a nguuni. Toliworos kesi imujeenete ka apereenen neni.

⁵Ani akolongit na a ngoomwon, tonyout kesi nataparach elilim esakete alosit. Nakaneni tolimok apakeng a apese lokamuran keng tama, “Tanyam mono ibore idio kigangea etau. Ani erumor toloto.”

⁶Sodi kiboikinos ngikiliok luarei kimuja, tamata aapei. Abu apakeng a apese tolimok ekile ngolo tama, “Toper kare nege akwaar naga talakar.”

⁷Tonyou Elawit esaki alosit, nakaneni kiratak apakeng a apese ngesi, tanang eperi neni nabo.

⁸Akolongit na a ngakan, tanyou ngesi nataparach elilim tasak alosit. Tolim apakeng a apese tama, “Kimuj mono akimuj adio tonyou ta esaa eche.” Apot ngikiliok luarei ngulu kimuja aapei.

⁹Ani enyounete ekile ngolo ka apese keng, ta ekasuban etich keng, esakete alosit, tolimok apakeng a apese ngesi tama, “Kingolik a, edikino tokona ewari. Toper nege akwaar naga. Aapiki tokona ni eribokinea. Toper nege sodi talakar. Ani moi tonyou nataparach elilim tolot nawi.”

¹⁰Nakaneni towou ekile ngolo akiper. Tonyou torotok, sodi tanangu diyete Yebus (ngesi Yerusalem). Arikit ngesi ngisikiria ngiarei iwokito ngasaaja. Arukito nabo ka apese keng.

¹¹Tanangut kesi diyete Yebus kewar, sodi tolimok ekasuban etich keng ngesi tama, “Nyo pekilomarea lore loa Ngiebus logo atopero?”

¹²Nakaneni tolimok ekapolon keng ngesi tama, “Nyikilomari ngoni lore a ngitunga alugelayek, alu nyeraakasi Ngisirael.

¹³Kapana ngaren wadio atopero Gibea kori Rama.”

¹⁴Sodi toloto kesi kiporosi Yebus. Ani edooyori akolong, tanangut kesi Gibea ni ayei nakwap a ekitela a Benjamen.

¹⁵Totuboros kesi lore ngolo toloto akiper neni. Tolomasi kesi lore kiboikinos nikalapatan kainyo emam itwaan abu kipeyou kesi topero nawi keng.

¹⁶Na ayakatar kesi neni, abu ekasukout eche bu neni ebong arumoret a etich keng anamanat. Arai ngesi eka akwap a Epiraim, nakaneni alomit ngesi Ngibea ngirwa ngulu. (Araakasi ngitunga luche alomito neni ngika ekitela a Benjamen.)

¹⁷Abu ngesi kingolik ekaloton ngolo ibooyi anikalapatan a ere, sodi kingit ngesi tama, “Aliwae ilosi iyong? Aliwae ibunio iyong?”

¹⁸Tatachu Elawit tama, “Kinyouni sua alore a Betleem, alo Yuda, kilosi lowaitin lukalonak a akwap ana a ngimukur a Epiraim, ani erai akwap kang. Alosit ngoon ayong lore a Betleem, alo Yuda. Alosi tokona nawi[20] kang. Nakaneni emam itwaan kipeyou sua nawi keng atopero.

¹⁹Kitingit sua nginyia lu itoonitoe ka ngatunyeny na edakasi ngisikiria kosi. Kitingit tani ngamugati ka emuna lu kinyami ayong, ka apese kang, ta ekasuban etich kang. Kitingit sua ibore daang nikiitanit.”

²⁰Tolim ekasukout tama, “Kiboyoto akaalimon. Tolomutu nawi kang kengarakini ayong esi, nyiipero nikalapatan.”

²¹Toriko ngesi kesi kai keng. Nakinae ngisikiria nginyia tadaka. Kilotasi ngipeyok kech ngakejen, sodi kimuja, tamata.

²² Ani eringa kesi imujete, elakara, pot ngikiliok a ere kangolo lu itepereenete[21] ngikiliok luche kiriama akai. Kidichakis kesi ekidor a akai isuruorete ekasukout lolope a akai ebalasi, “Kipud itwaan nitete abuni kai kon! Kisaki sua etopero ngesi!”

²³Nakaneni topudo ekasukout ngolo tolimok kesi tama, “Meere kongina talopaekang! Nyiisubakis kare akisech naaronon noi, a ngileech naga! Abe erai bo itwaan epeyonon kang!

²⁴Kingolikis a, eyei apese keng na a ngabwes nege, ka nakookang na eringa nyepero ka ekile a ache. Kimiekisi kepudok kesi, tosubeta ngakiro daang na isakete. Nakaneni nyiisubeta itwaan en akisech naaronon noi naga!”

²⁵Nakaneni apot ngikiliok ngulu nyiirasi ngakiro keng. Sodi kipudok Elawit ngolo kesi apese keng na a ngabwes. Totikoonosi kesi apese ngina akwaar kiiya kiwala.

²⁶Ani iwalari, tonyou aberu ngina tolot tadakakin lokidor a akai a ekasukout, ana ayei lokile keng tooma. Toper ngesi kaneni tanang ipiripiruuni akolong.

²⁷Tonyou lokile keng nataparach esaki alosit. Ani engaari ngesi ekidor, toriam ngesi apese keng eperi alongaren akai itorwarit ngakan enangunito lokidor a akai.

²⁸Tolim ngesi tama, “Tonyou atoloto!” Nakaneni nyetachuna apese ngakiro. Sodi kidokok ngesi akwaan a apese losikiria tolot nawi keng.

²⁹Ani enanguni ngesi nawi keng, toloma kai tolem ekileng. Tolem ngesi akwaan a apese keng totubutubu ngatubet ngatomon ka ngaarei. Yaa ngesi ngatubet nguna a ngapei-pei lotela lutomon ka ngiarei a Ngisirael.

³⁰ Tolimut ngitunga daang lu engolikinete tamasi, “Nyeanyuna nugu nakanuan! Nyesubakina na ikote nugu nakanuan, napei kolong apudunioto Ngisirael anakwap a Misiri! Kitamakisi pan ngakiro nugu ataanyutu ibore nikisubakini! Ekoe, kikokini ai?”