Read turkana Ngikatubok Ngakiro 2 Bible Online

Ngikatubok Ngakiro 2 - turkana bible

Ngikatubok Ngakiro 2

¹Torotok emalaikat a Ekapolon Akuj alo Giligal tolot Bokim tolimok Ngisirael tama, “Kepuduni kolong ayong esi alo Misiri kayau nakwap nakolong echikakini ayong taapaakus. Atolim ayong atama, ‘Nyechwangakini ayong jik achamunet kang ka esi.

²Nyejoikinit esi ichamakinosi ka ngitunga lu elomito nakwap naga. Echamitae esi ibwangete ngikenoi kech a ngakipeyos.’ Nakaneni nyesuba esi ngakiro nakolong kalimokini ayong esi. Isubakis esi nakolong kitengeritoe!

³Kalimokinit tokona ayong esi atamar nyeritari ayong ngitunga lugu iloose esi ngaren. Eliworosi kesi ngimoe kus, sodi toliworos ngakujo kech eloit anikus.”

⁴Ani elimuni emalaikat ngakiro nguna erumori, kikalout Ngisirael daang,

⁵ ngesi enyaritere neni Bokim.[6] Kipeyonokis kesi Ekapolon Akuj kaneni.

⁶Abu Yochua kiala Ngisirael, sodi tolot itwaan daang alemar akwap keng.

⁷Apot Ngisirael tosuba etich a Ekapolon Akuj ngirwa lu ayarea Yochua daang, ka ngirwa lu ayareta ngikarikok daang lu eteete ngakiro naapolok daang na asubea Ekapolon Akuj Ngisirael.

⁸Abu Yochua lokookeng a Nun, lo arai ekasuban etich a Ekapolon Akuj totoan erai ngikaru keng amiat apei ka ngitomon.

⁹Tonukakinae ngesi Timunas Sera na arai akwap na atiakakinitae ngesi anakwap ana a ngimukur a Epiraim kwap emoru a Gaach.

¹⁰ Apot ngitunga a alesit kangina daang totoaka, sodi bu alesit ache na peayeni Ekapolon Akuj kori ngakiro na asubea ngesi Ngisirael.

¹¹Sodi tosechakis Ngisirael Ekapolon Akuj kisiakis akisub etich kata Baal.

¹²Tapalikis kesi akilip Ekapolon Akuj, na erai Akuj kata apaakech, Akuj nakolong epuduni kesi alo Misiri. Kisiakis kesi akilip ngakujo ngache, na eraakasi ngakujo a ngitunga alu iriamito kesi. Kijuuruoto kesi ilipito ngakujo nguna, sodi kitongoa Ekapolon Akuj.

¹³Tapalikis kesi akilip Ekapolon Akuj sodi tosuba etich kata Baal ka Achitaros.

¹⁴Sodi tongoik Ekapolon Akuj Ngisirael kimiek ngimoe itijikinete kesi nabo toremo ngiboro kech daang. Abu ngesi kimiek ngimoe lu eriamito kesi idwangete Ngisirael nakaneni apot Ngisirael nyeeweikis ngimoe kech.

¹⁵Nacha alooso kesi lojie, peebakit Ekapolon Akuj alowae kech, loger lokolong sek alimunitor atamar nyebaki alowae kech. Apot kesi pena lochan lukaapilak.

¹⁶Ani erumor nak Ekapolon Akuj Ngisirael ngikarikok lu ayuunete kesi alomoe.

¹⁷Nakaneni apot Ngisirael nyiiwap ngakiro a ngikarikok kech. Apot Ngisirael tongero Ekapolon Akuj sodi kilipa ngakujo nache. Ewapito kolong taapakech ngitalio a Ekapolon Akuj, nakaneni apaliki alesit nakitetet naga akisub kongina.

¹⁸Arai nacha einakinea Ekapolon Akuj Ngisirael ekarikon, kingarak ngesi ekarikon ngolo toyuu ngitunga alomoe kech ngirwa daang lu eyarea ngesi. Apeneenete Ekapolon Akuj ngisien anikech na ikalounioto kesi kotere ngulu aboliatar kesi nabo kichiakiarito.

¹⁹Nakaneni na etoanea ekarikon ngolo, tobongosi ngitunga nakiro nangorok, sodi toroketa noi kidwanga tani alesit na engareni nakech. Tosuba kesi etich a ngakujo anache ka akilip kesi. Towout kesi aisikin ngakiro kech naaronok.

²⁰Ani erumor tongoik Ekapolon Akuj Ngisirael tolimok tama, “Echwangak ebukut logo achamunet nakolong echikakini ayong taapaakech atamar kirichakis. Ani aloger awouneta kesi akiwap ngakiro kang,

²¹nyeringa ayong nabo eritari ngibukui lukolong aringa eya nakwap na atoanea Yochua,

²²sodi atoroea ayong anikech kiwapete Ngisirael ngirotin kang kori kemam, loger lokolong ewapitotor taapaakech.”

²³Sodi abu Ekapolon Akuj tachamak ngibukui ngulu idongete nakwap. Abu ngesi nyeeinak Yochua agogongu na idwangea kesi kori abu nyiirita kesi na atoanea Yochua.