Read turkana Ngikatubok Ngakiro 20 Bible Online

Ngikatubok Ngakiro 20 - turkana bible

Ngikatubok Ngakiro 20

¹Tonyout Ngisirael daang napei alo Dan tanang Beer-cheba, pot tani anakwap a Gilead ana ayei lowae lo alo kide. Tochunun kesi Misipa eraakasi ngipei alongaren Ekapolon Akuj.

²Ayakasi ngikarikok a ngitela a Ngisirael daang ni achunakina ngitunga a Akuj neni. Arai ekimar a ngasigerea ana aloose a ngakejen 400,000.

³Kiirasi ngitunga a Benjamen atamar achunakin Ngisirael luche daang Misipa. Kingitas Ngisirael tamasi, “Tolimokinae sua eger lo asubakinor akisech naga?”

⁴Abu Elawit lo arai lokile keng a apese ana aaritae tatachu tama, “Kiponi ayong ka apese kang a ngabwes apotu Gibea na erai akwap a ngitunga a Benjamen, kisaki akiper neni.

⁵Katonyoikis ayong ngitunga a Gibea kiriama akai nakwaare. Asakete kesi akiar ayong. Nakaneni totikoonosi kesi apese kang, totoan.

⁶Atolema ayong akwaan keng atotubutubu sodi ayaa ngatubet a ngapei-pei lotela lutomon ka ngiarei a Ngisirael. Asubakis ngitunga ngulu akisech naaronon noi a ngileech alokiding Ngisirael.

⁷Kingolikisi a, Ngisirael daang, tolimutu pan ngakiro na isakete esi tosubakinae.”

⁸Tonyout ngitunga daang towaa aapei tolimut tamasi, “Emam sua itwaan tani ipei, kerai ni elomit loeam kori ni elomit kai, ebongori nawi.

⁹Nakaneni ngakiro kisubakinea Gibea nugu. Kirami ekura atoseutu ngitunga lu eloose kitijikis ngitunga a Gibea.[22]

¹⁰Alo Isirael kadaang, elemunio ngitunga ngipei-pei ani eya lutomon totingakis ngasigerea akimuj, sodi toloto luche kirirata ngitunga a Gibea[23] kotere akisech naaronon asubakis kesi alo Isirael.”

¹¹Sodi tachunakin Ngisirael daang kotere ibore ipei bon, akitijikin ere ngolo.

¹²Apot ngitunga a ngitela a Ngisirael tameasi ngitunga wadaang akwap a ekitela a Benjamen ebalasi, “Anukiro naaronok nugu isubakis esi?

¹³Tokona bocha, kipotokinoe sua ngitunga luaronok eya Gibea ngulu ataara sodi atolemasi ngakiro naaronok nugu alo Isirael.” Nakaneni apot Ngitunga a Benjamen nyiirasi ngakiro na eruosi Ngisirael luche.

¹⁴Tochunun ngitunga a Benjamen alorerea aluche pot Gibea esakete akitijwore Ngisirael.

¹⁵Tanyaraut ngitunga a Benjamen ngasigerea ngabunge ngatomwon-arei ka ngakan-kapei alorerea kech. Kiatakinos nabo ngitunga a Gibea lu aseunitae lu araakasi ngamiae ngakan-kaarei.

¹⁶Anasigerea kanguna kadaang, ayakasi ngikiliok lu aseunitae lu araakasi ngamiae ngakan-kaarei. Akedienyaka ngikiliok ngulu. Eoseka kesi arai na egumarea epei kech daang amoru a apira, nyedieki tani etimot.

¹⁷Tochunakis Ngisirael luche ngasigerea nakajwok 400,000.

¹⁸Tonyout Ngisirael toloto ni elipeenere alo Besel, kingita Akuj tamasi, “Ekitela ali anikosi echamit isiauni kitijik ngitunga a Benjamen?” Tatachu Ekapolon Akuj tama, “Ekitela a Yuda ngesi isiauni.”

¹⁹Tonyout Ngisirael nataparach toloto toloma diyete ere a Gibea.

²⁰Toloto kesi kitijikis ngasigerea a Benjamen, sodi kisibaka ngasigerea alowaitin alu ingoliarito lore.

²¹Topudut ngasigerea a Benjamen alore. Taara akolongit ngina ngasigerea a Ngisirael ngabunge ngatomwon-arei ka ngaarei.

²²Nakaneni apot Ngisirael totitinyikis toloto kibaka anisek ebakitotor akolongit na ekingaren.

²³Toloto kesi kigoro alongaren Ekapolon Akuj sodi kingita ngesi tamasi, “Kibongori nabo etijwoto ngitunga a Benjamen lu eraakasi talokaatokosi a?” Tatachu Ekapolon Akuj tama, “Kapesi kitijwoto kesi.”

²⁴Sodi toloto Ngisirael akitijikin ngitunga a Benjamen akolongit na a ngaarei.

²⁵Topudut nabo ngitunga a Benjamen alo Gibea akolongit na a ngaarei ngina taara ngasigerea a Ngisirael ngabunge ngatomon ka ngakan-kauni.

²⁶Sodi toloto Ngisirael daang Besel kialolongo kaina. Kiboikinos kesi neni ngaren Ekapolon Akuj, nyimuja tanang ebong. Kipeyoto kesi ngakipeyos a ekisil ka ngakipeyos na inomio nginerin daang, kipeyoto daang alongaren Ekapolon Akuj.

²⁷Kingita Ngisirael Ekapolon Akuj nguna esubakinete. (Kainyo ayei asaduku a Achamunet a Akuj Besel ngirwa ngulu.

²⁸Pineas lokookeng a Eleasar alo erai lokookeng a Aron ngesi aweikinit asaduku ngina.) Kingita kesi Ekapolon Akuj tamasi, “Kibongori nabo etijikis ngitunga a Benjamen lu eraakasi talokaatokosi, kori kiboikin emiekisi?” Tatachu Ekapolon Akuj tama, “Kitijwoto. Kesidwangi ayong esi moi nataparach.”

²⁹Sodi kisiriama Ngisirael ngasigerea ngache Gibea toduka.

³⁰Tonyout Ngisirael akitijikin ngitunga a Benjamen akolongit na a ngauni, kibaka ingoliarito Gibea loger losek a ngirwa aluche.

³¹Topudut ngitunga a Benjamen alore, toreae kesi wache torotokis alore. Kisiakis kesi akiar Ngisirael ngiche loger losek asubeenete, taara alorotin a ngaroatin ana etenere Besel ka na etenere Gibea. Taara kesi Ngisirael esibit ngitomwon-uni.

³²Tolimut ngitunga a Benjamen tamasi, “Kidwangi ngoni kesi loger lopalem.” Nakaneni tolimut Ngisirael tamasi, “Potu atamataros atoreasi kesi alore toloto lorotin lua ngaroatin.”

³³Ani enyounete ngasigerea a Ngisirael ibakete alo Baaltar, tokurwaunos Ngisirael luche lusek adukito eriamito Gibea, topudut alowaitin alu a ngimukur adukitotor iriamito ere.[24]

³⁴Apot ngikiliok ngabunge ngatomon lu aseunitae alo Isirael kadaang kitijikis Gibea. Toliwor ibore ejie loationon. Nyeyena ngitunga a ekitela a Benjamen atamar edikino kimunyario.

³⁵Kisidwang Ekapolon Akuj Ngisirael ngitunga a ekitela a Benjamen. Taara Ngisirael akolongit ngina ngitunga a ekitela a Benjamen 25,100.

³⁶Sodi kingolikis ngitunga a ekitela a Benjamen atamar kidwang kesi. Kikutosi ngasigerea a Ngisirael ani eya ngitunga a ekitela a Benjamen kainyo egienosi kesi Ngisirael luche adukito iriamito Gibea.

³⁷Tonyout ngitunga lu adukito tamataros Gibea kiealakinos lore taara itwaan daang.

³⁸Alimokina sek ngasigerea a Ngisirael ka Ngisirael lu adukito atamar ani edirisi apuru alore,

³⁹toreunos ngasigerea na ayakasi lojie. Nasek aareta ngitunga a ekitela a Benjamen Ngisirael esibit ngitomwon-uni, apot tamasi, “Iteni, kidwangi ngoni kesi loger a ejie alo ngoon a ekingaren.”

⁴⁰Sodi Todirit apuru alore toinikin alokidiama. Ani ingoliarete ngitunga a ekitela a Benjamen naabor, tatalasi ngakiro engolikineta ere daang kenomia akim, kedirit apuru kidiama.

⁴¹Ani ereeunosi Ngisirael, tobul ngitunga a ekitela a Benjamen kainyo apot kingolikis atamar edikino kimunyario.

⁴²Tobongobongoosi kesi ani a Ngisirael tamataros lowae ngaroatin, nakaneni apot nyeepuunos. Apot ngasigerea a Ngisirael nasek ajiete ka kesi, ka na apote alore,[25] kiriama tolukakis kesi nakidingos, sodi tomunyarae ngitunga a ekitela a Benjamen.

⁴³Toroosi Ngisirael ngitunga a ekitela a Benjamen alowaitin kadaang. Kiwapa kesi jik tanang kide Gibea, taarete kesi eloose.

⁴⁴Taarae ngasigerea nakajwok a ngitunga a ekitela a Benjamen ngabunge ngatomon ka ngakan-kauni.

⁴⁵Toreas luche tamatoros lowae lo a ngaroatin, tananga nataaba a Rimon. Taarae ngabunge ngakan alorot. Kiwapakinae luche jik tanang Gidom sodi taarakinae ngabunge ngaarei neni.

⁴⁶Araakasi ngitunga a ekitela a Benjamen lu aario akolongit ngina ngabunge ngatomwon-arei ka ngakan. Araakasi daang ngasigerea nakajwok.

⁴⁷Nakaneni tobucharos ngikiliok ngamiae ngakan-kapei tamataros lowae lo a ariet toloto nataaba a Rimon, sodi kiboikinos neni ngilapio nguomwon.

⁴⁸Toreeunos Ngisirael kitijikis ngitunga a ekitela a Benjamen luche taara daang, ngikiliok ka ngaberu, ka ngide, ta ngibaren. Kichunyakis ngirerea daang akim kaneni.