Read turkana Ngikatubok Ngakiro 21 Bible Online

Ngikatubok Ngakiro 21 - turkana bible

Ngikatubok Ngakiro 21

¹Ani echunakinosi Ngisirael Misipa, kikongo ani a Ekapolon Akuj tamasi, “Emam sua itwaan ipotori nakookeng nak itwaan a ekitela a Benjamen kiut.”

²Sodi toloto ngitunga Besel kiboikinos ngaren Akuj tanang ebong. Kigoro kesi lokojokon echalasi,

³“Ee, Ekapolon Akuj, na irai Akuj a Isirael, kotere nyo asubakinotor ngakiro nugu alo Isirael? Kotere nyo edikino ekitela a Benjamen engopiyarea alo Isirael?”

⁴Ani nataparach nache elilim, todukokis ngitunga ekeno a ngakipeyos neni. Kipeyoto kesi ngakipeyos a ekisil ka na inomio nginerin daang.

⁵Kingitas Ngisirael tamasi, “Ekitela ali alotela kadaang a Ngisirael peabunit lokiriam a Ekapolon Akuj alo Misipa?” (Kainyo ekongito sek kesi atamar itwaan daang nipealosit Misipa, eario.)

⁶Kisieneto Ngisirael ngitunga a ekitela a Benjamen lu araakasi talokaatokech. Tolimut kesi tamasi, “Angopia ekitela epei alo Isirael akolongit naga.

⁷Anukiro kisubakini ngoni taanyuneta ngikiliok a ekitela a Benjamen lu idongito ngaberu? Kikong ngoni alongaren Ekapolon Akuj atamar nyikiinakini kesi ngide yok lupesur kiuta.”

⁸Tolimut kesi tamasi, “Tangae alotela a Ngisirael peaponito lokiriam alo Misipa?” Toyena kesi atamar amam itwaan abunit alore a Yabech alo Gilead,

⁹kainyo na anyarare ngirora a ngitunga, amam itwaan tani ipei a ere Yabech alo Gilead abu kiki.

¹⁰Sodi tamasi ngitunga lu achunakina neni ngitunga lukajwok ngabunge ngatomon ka ngaarei, todungokis kesi tamasi, “Kapesi taara itwaan daang alo Yabech, tani ngaberu ka ngide.

¹¹Taara ngikiliok daang, ka aberu cha daang na apero ka ekile.”

¹²Taanyut kesi alo Yabech ngapesur na nyepero ka ngikiliok a ache ngamiae ngoomwon, sodi yaut Chilo, nakwap a kanaan.

¹³Ani erumor tomeasi ngitunga daang lu achunakina neni itwaan nia ngitunga a ekitela a Benjamen alu ayakasi nataaba a Rimon, tolimokis atamar kisil kesi.

¹⁴Tobongut ngitunga lua ekitela a Benjamen ngulu, sodi nakis Ngisirael luche kesi ngapesur na ayaunio alo Yabech, na aisikinete kesi nyeara. Nakaneni peetemokino ngapesur nguna lokiliok ngulu,

¹⁵Kisieneto Ngisirael ngitunga a ekitela a Benjamen kainyo abu Ekapolon akuj totiakatiaka ngitela a Ngisirael.

¹⁶Sodi tolimut ngikarikok a ngitunga alu achunakina tamasi, “Anukiro kisubakini ngoni taanyuneta ngikiliok a ekitela a Benjamen lu idongito ngaberu? Emam ngaberu eringa eyakasi lokitela a Benjamen.”

¹⁷Tolimut kesi tamasi, “Nyejoikinit Ngisirael itongopiarete epei a ngitela keng alutomon ka ngiarei. Atasakakisi ngitunga a ekitela a Benjamen erot nyeengopiareta.

¹⁸Nakaneni nyikiinakini ngoni kesi ngide yok lupesur kiuta, kainyo kilam ngoni itwaan a ekitela yok daang ni ipotori nakookeng kiut itwaan a ekitela a Benjamen.”

¹⁹Sodi tolimut kesi tamasi, “Aapuu esukukuu a Ekapolon Akuj lopalem esubeeneo ekaru daang alo Chilo.” (Eyei Chilo kwap Besel, kuju Lebona, tarai kide erot lo eyei kiding Besel ka Chekem.)

²⁰Todungokis kesi ngitunga a ekitela a Benjamen tamasi, “Kapesi toduka anamanat

²¹kiteto. Ani epote ngapesur a Chilo akidongare alosukukuu, topudutu esi anamanat. Kirum ipei kus apese na eliwor aberu keng a napesur kanguna, sodi tobongoreta nakwap a ekitela a Benjamen.

²²Ani epote taapakech ka talokaatokech akisuburare esi, ilimokinete esi[26] kesi tamasi, ‘Kimiekinere kare sua, kainyo nyerikuno kolong sua ngapesur alojie etiliwosi ngaberu kosi. Ani aloger eraakar meere esi ipotorete ngapesur kiinakis sua, nyisechito esi tani bo kichwangakina ngakiro nakolong ikongete esi dang.’ ”

²³Tosubakis ngitunga a ekitela a Benjamen loger ngolo. Toriko epei kech daang apese keng anapesur ana edongaate alo Chilo. Tobongosi kesi nakwap kech, toduko ngirerea toloma.

²⁴Esaa ngolo, kiealaros Ngisirael luche daang kaneni. Tolot itwaan daang lokitela keng, ni ayakasi ngitunga a awi keng ta ni ayakasi ngiboro keng.

²⁵ Ngirwa ngulu, amam ekapolon ayei nakwap a Ngisirael. Asubi itwaan daang ngakiro na ajoikinito ngesi ilope.