Read turkana Ngikatubok Ngakiro 3 Bible Online

Ngikatubok Ngakiro 3 - turkana bible

Ngikatubok Ngakiro 3

¹Ani erumor, abu Ekapolon Akuj kimiek ngibukui ngiche anakwap sodi toroea Ngisirael lusek aringa nyeloto lojie alo Kanaan.

²Asubi ngesi kona sodi kitatamea ngalesea a Ngisirael daang ngakiro a ejie, tarai noi ngulu aringa nyeloto lojie a ache.

³Ngulu emiekinio anakwap ngesi ngirerea ngikan a Ngipilisti, ka Ngikanaan daang, ka Ngisidon daang, ta Ngiipi lu ebooyete alomoru a Lebanon, napei alomoru a Baal Erimon tanang napak a Amas.

⁴Ngitunga ngulu aroyere Ngisirael, taanyunere kiwapete ngitalio lukolong ainakini Ekapolon Akuj taapaakech, kisitoru nia Musa.

⁵Sodi toloma Ngisirael kiding Ngikanaan, ka Ngiiti, ka Ngiamor, ka Ngiperes, ka Ngiipi, ta Ngiebus.

⁶Apot Ngisirael kiutas ka kesi nabo kilipa ngakujo kech.

⁷Toisikis Ngisirael Ekapolon Akuj na erai Akuj kech. Apot tosechakis ngesi, sodi kilipa ngakujo nasubuna a Baal ka Achera.*g**

⁸Sodi tongoik Ekapolon Akuj Ngisirael kimiek Kuchan Richasaim, lo arai ekapolon a Mesopotamia torem kesi, sodi topolok kesi a ngikaru a ngikan-kauni.

⁹Ani erumor kikaloikis Ngisirael Ekapolon Akuj, sodi tomeu ngesi itwaan ni alachuni kesi. Arai ngolo Osiniel lokookeng a lokaatokeng a Kaleb aloochi alobe Kenas.

¹⁰Abu etau a Ekapolon Akuj bu nia Osiniel, toliwor ngesi ekarikon a Ngisirael. Abu Osiniel tolot lojie sodi nak Ekapolon Akuj ngesi agogongu na edwangea ekapolon a Mesopotamia.

¹¹Min ekisil nakwap a ngikaru a ngitomwon-omwon, ani erumor totoan Osiniel.

¹²Tosechakis Ngisirael Ekapolon Akuj nabo. Kotere ngakiro nguna, abu Ekapolon Akuj kitiliwo Egilon lo arai Ekapolon a Moab lo egogong noi akidwang Ngisirael.

¹³Tochunak Egilon Ngiamon ka Ngiamalek kirukosi ka ngesi kidwanga Ngisirael, sodi tolemasi ere a Yeriko lo arai ere a ngingolea.

¹⁴Tosuba Ngisirael etich a Egilon alo arai ekapolon a Moab a ngikaru a ngitomon ka ngikan-kauni.

¹⁵Ani ikaloikinete Ngisirael Ekapolon Akuj, abu ngesi inu kesi ekayuunan lo anyaritae Eud lokookeng a Gera, alo a ekitela a Benjamen. Akedienyana Eud. Tolemut Ngisirael ngainakinet nakis Eud yaa nia Egilon alo arai ekapolon a Moab.

¹⁶Asubakinit sek Eud ekileng keng loapolon loakwanan a ngiwaitin kadaang, tarai aoyau keng ngasentimitae ngatomwon-kan. Ainikinit ngesi ekileng ngolo tooma ngiworui keng alowae alo aloteten.

¹⁷Sodi inaa ngesi Egilon ngainakinet. Arai Egilon itwaan nitiatuman.

¹⁸Ani erumori Eud akipotor ngainakinet, kitwaarak ngesi ngitunga lusek adakito ngiboro ngulu.

¹⁹Nakaneni ani enangi namoru na ekulitae eyakasi diyete Gilgal, tobongo Eud nia Egilon. Tolimok tama, “Ee ekapolon, eya ayong ngakiro namunonoe asaki alimokin iyong.” Sodi todungok Ekapolon Ngikasubak etich keng tama, “Kililinga chek.” Topudosi ngikasubak etich keng daang.

²⁰Ebooyi ekapolon anamaniyat keng anakaalimon eyei kidiama akai. Tolot Eud nikeng tolimok ngesi tama, “Eya ayong ngakiro na asaki alimokin iyong na eponito ani Akuj.” Tonyou ekapolon towo.

²¹Kirepak Eud akan keng na alokedieny tout ekileng alowae keng alo aloteten, sodi kilijak nakook a Ekapolon.

²²Toloma ekileng daang tooma aapei ka atinget a ekileng dang, sodi toburuchia atumes kesi. Abu Eud nyeeut ekileng ngolo anakook a ekapolon, nakaneni abu ekileng toporu alokaku.

²³Ani erumor topudo Eud nikalapatan togolok ngidorin a amaniyat ana alokidiama akai,

²⁴sodi torotok. Pot ngikasubak etich keng, nakaneni ani ingolikinete ngidorin egolitoe kitama ebalasi, “Elosit tokona ngon kinga akingarakin anamaniyat anakaalimon.”

²⁵kidara kesi nikooyen, tanang ni eilio. Ani ewouni ngesi angaar ngidorin a amaniyat, tolemut kesi egoliet tangaareta ngidorin. Toriamut ekapolon kech eperi alokwap etoanit.

²⁶Ani eringa kesi idarito, tosiiwak Eud, kiporo ngamoru na ekulitae tanang Seira.

²⁷Ani enanguni nakwap na a Ngimukur a Epiraim, tokutak ebune anyarare Ngisirael lojie, sodi torik ngesi kesi totiyaun alomukur.

²⁸Tolimok kesi tama, “Kiwapakinae ayong! Kisidwang Ekapolon Akuj esi Ngimoab lu eraakasi ngimoe kus.” Sodi kiwapakis kesi Eud tolemasi ewae lo adikino Ngimoab edokareta ekwakaye Yorudan. Nyelakakina kesi itwaan tani ipei edokari ekwakaye.

²⁹Akolongit ngina, apot Ngisiraael taara Ngimoab ngabunge ngatomon, lu araakasi daang ngikiliok lua ngikilinga. Emam tani epei lo abuchar.

³⁰Kidwanga Ngisirael Ngimoab akolongit ngina, sodi min ekisil nakwap a ngikaru a ngitomwon-kauni.

³¹Ekarikon lo atupit ngolo ngesi Chumugar lokookeng a Anas. Ayuuni ngolo daang Ngisirael taar Ngipilisti ngamiae ngakan-kapei a akitoe ana irit emong.