Read turkana Ngikatubok Ngakiro 4 Bible Online

Ngikatubok Ngakiro 4 - turkana bible

Ngikatubok Ngakiro 4

¹Ani ketoana Eud kerumor, tosechakis Ngisirael Ekapolon Akuj nabo.

²Sodi kipoto Ekapolon Akuj kesi nak Yabin, lo arai ekapolon a Ngikanaan lo apolokinit ere a Asor. Anyaritae ekarikon a ngasigerea keng Sisera, lo alomit Aroches Agoim.

³Apot Ngisirael kikaloikis Ekapolon Akuj esakete akingarakino, kainyo ayakasi Yabin ngaurukukui na ngasua na irito ngangolei ngamiae ngakan-koomwon, nabo aboliar ngesi Ngisirael niaronon a ngikaru a ngitomwon-arei.

⁴Debora, na arai aberu a Lapidos, arai akadwaran, nabo arai ngesi akatubon ngakiro kotere Ngisirael ngirwa ngulu.

⁵Ebooyeene ngesi alokwap eengol eche ayei kiding Rama ka Besel anakwap ana a ngimukur a Epiraim, sodi tolosioneto Ngisirael neni totub ngesi ngakiro.

⁶Abu ngesi tomea itwaan anyarare Barak lokookeng a Abinoam alo Kedech anakwap a Naputal. Abu ngesi tolimok Barak tama, “Kidungok iyong Ekapolon Akuj na erai Akuj a Ngisirael atamar, ‘Tolem ngikiliok ngabunge ngatomon alotela a Naputal ka Sebulun sodi toriko kesi moru a Tabor.

⁷Ayauni ayong Sisera lo erai ekarikon a ngasigerea a Yabin, bu kitijik iyong anangolol a Kichon. Irukunete ngesi ka ngaurukukui keng na irito ngangolei ka ngasigerea nakaneni kesidwangi ayong iyong ngesi.’ ”

⁸Tatachak Barak Debora tama, “Alosi ayong erai kilot iyong, nakaneni ani pekilot iyong, nyalosi ayong dang.”

⁹Tatachu Debora tama, “Etemokin. Kirukori ayong ka iyong, nakaneni ani aloger kangolo, nyeliwor ekipur lo idwangere ngimoe ekon, kainyo ipotokini Ekapolon Akuj Sisera kipotok aberu.” Sodi kirukosi Debora ka Barak toloto Kedech.

¹⁰Tonyarau Barak ngitela a Naputal ka Sebulun potu Kedech, sodi kiwapakis ngesi ngikiliok ngabunge ngatomon. Kirukosi Debora ka ngesi.

¹¹Eber lo arai itwaan a Kenis, eguruorit eam keng alodiyete echoke lo eyei Sananim diyete Kedech. Atiakak ngesi ka Ngikenis luche lu araakasi ngalesea a Obab alo arai lokamuran a Musa.

¹²Ani iirari Sisera atamar anangu Barak lokookeng a Abinoam moru a Tabor,

¹³abu ngesi tanyarau ngaurukukui keng na araakasi ngamiae ngakan-koomwon ka ngasigerea keng, tanyarau kesi alo Aroches Agoim potu nangolol a Kichon.

¹⁴Sodi tolimok Debora Barak tama, “Tonyou! Kiinak Ekapolon Akuj iyong Sisera, kidwang akolongit naga.” Sodi totiyaun Barak alomoru a Tobor ka ngikiliok keng lu araakasi ngabunge ngatomon.

¹⁵Ani isiakini Barak ejie, kisibiler Ekapolon Akuj Sisera ka ngaurukukui keng ta ngasigerea keng, sodi todoku Sisera anaurukuk keng tamatar a ngakejen.

¹⁶Kiwap Barak ngaurukukui nguna ka ngasigerea tanang Aroches Agoim, sodi taarae ngasigerea a Sisera daang. Emam itwaan apon toiisikinae tani ipei.

¹⁷Tamatar Sisera tolot loeam a Yael ana arai aberu a Eber alo arai Ekenisit, kainyo achamam Yabin lo arai ekapolon a Asor ka awi a Eber.

¹⁸Tolot Yael kisiriamia Sisera tolimok tama, “Tolom tooma, ekapolon. Tolom tooma loeam kang. Nyiiem.” Sodi tolom ngesi tooma. Tarap Yael ngesi a awaru.

¹⁹Tolimok Sisera ngesi tama, “Nakinae kare ngakipi namatan. Kanyamit akure.” Tangaa ngesi etuo keng loa ngakile, kidokak tamat, sodi tarap ngesi nabo.

²⁰Tolimok Sisera ngesi tama, “Towo anakituk a eam. Ani kebu itwaan kingit iyong tama, ‘Eyei itwaan eyei nege a?’ Tolimok tama, ‘Emam,’ ”

²¹Ani aloger aburunitor Sisera noi, abu tojotoor. Tolem Yael akitoe a eam, tolem esebo toting anakan ana aloteten, toniamar nia Sisera sodi kisitor akitoe lowae lo a loteten a akou toped toloma nalup, taar.

²²Ani ebuni Barak esaki Sisera, topudo Yael akisiriamiar ngesi tolimok tama, “Bua nege! Kedodikini ayong iyong itwaan ni isaki iyong.” Sodi tolomasi Barak ka Yael tooma, toriamut Sisera eperi alokwap etoanit, epedit akitoe a eam akou.

²³Abu Ekapolon Akuj akolongit ngina kisidwang Ngisirael Yabin lo arai ekapolon a Ngikanaan.

²⁴Apot Ngisirael kichiakiasi ngesi lokojokon tanang inyasunete ngesi.