Read turkana Ngikatubok Ngakiro 5 Bible Online

Ngikatubok Ngakiro 5 - turkana bible

Ngikatubok Ngakiro 5

¹Apot Debora ka Barak lokookeng a Abinoam toeokis eeos logo akolongit ngina.

²Kipuro Ekapolon Akuj! Erichakina Ngisirael ejie. Alemuna ngitunga a alakara.

³Topupokisi esi ngikapolok! Todetasi ngaki, esi ngikapolok! Aeokini ayong Ekapolon Akuj. Aboliakini ayong atoeonok. Ekapolon Akuj, na erai Akuj a Isirael.

⁴Ekapolon Akuj, na irotokinio iyong alomoru a Seir, naipudunio anakwap a Edom, abu akwap tamaranik, talakak adis ngakipi. Iteni, apot ngidowon talakakis ngakipi.

⁵ Tamaranikis ngimoru alongaren Ekapolon Akuj a Sinai, alongaren Ekapolon Akuj na erai Akuj a Isirael.

⁶Ngirwa lua Chamugar lokookeng a Anas, ngirwa lua Yael, apot ngajorei a ngimuchurus tapalikis akitoruunun nakwap, nabo kileilea ngikalotok alorotin alu eloka.

⁷Tapalikinae ngirerea a Ngisirael, tanang ni ibunio iyong Debora, bu iyong loger a itiokeng a Ngisirael.

⁸Ani eseunio ngakujo nakitet, min ejie nakwap. Ayei itwaan abu toting akwara alokiliok a Ngisirael, alu eraakasi ngabunge ngatomwon-omwon a?

⁹Erukito etau kang ka ngikarikok a ngajorei a Ngisirael, lukolong alemunosi a alakara. Kipuro Ekapolon Akuj!

¹⁰Tolimutu[7] ngakiro nguna, esi lu idokito ngasikiria naakwaak, esi lu ibooyete alojemu aluajokak, ka esi lu iloose alorotin.

¹¹Tani ngikaeok lu eyakasi lochorin, alimosi akidwang a Ekapolon Akuj ngimoe keng, akidwang a Ngisirael ngimoe kech! Totiyaunos ngitunga a Ekapolon Akuj alorerea[8] kech.

¹²Debora, tonyou, tonyou! Tonyou toeok eeos, tonyou! Barak lokookeng a Abinoam, tonyou! Toriko ngirikon kon!

¹³Ani erumor totiyaunos lu emunoi pot lokarikok kech. Pot ngitunga a Ekapolon Akuj nikeng[9] esakete ejie.

¹⁴Apote kesi alo Epiraim tolomasi nadipo,[10] ewapito ekitela a Benjamen ka ngitunga keng. Atiyaunosi ngikarikok a ngajorei alo Makiri, totiyaunos ngikaweikinak alo Sebulun.

¹⁵Apot ngikapolok a Isakar ka Debora. Iteni abu Isakar kiwapak Barak, kiwapakis ngesi tolomasi nadipo. Nakaneni atiakak emachar a Reuben, nyetiakuna kesi atamar kilosi.

¹⁶Kotere nyo edongioto kesi ka ngamesekin? Akipup ngikeyokok enyarito ngamesekin a? Iteni, atiakak emachar a Reuben, nyetiakuna kesi atamar kilosi.

¹⁷Kiboikin ekitela a Gad kide Yorudan. Ani kotere nyo edongio ekitela a Dan natubwae? Tolom ekitela a Acher lokwaas a anam, Kidong tolom neni

¹⁸Nakaneni apot ngitunga a Sebulun ka Naputal, tajala akiyar kech alojie.

¹⁹Pot ngikapolok tojwoto, pot ngikapolok a Kanaan tojwoto, alo Taanak, anakipi a Megido, nakaneni emam ngakwangae apot kesi tolemasi,

²⁰Tojwoto ngikanyer anadis, totubonoros kesi alokidiama, kitijwoto Sisera.

²¹Tolelea kesi akaale a Kichon, angolol a Kichon na alelee. Arotokini ayong ngaren, arotokini ayong ngaren a agogongu!

²²Sodi pot ngangolei eporoporoote, ituruyete ngakichiaket kech ngalup.

²³Ebala emalaikat a Ekapolon Akuj, “Kilama Meros. Kilama ngulu elomito inaa. Nyepona kesi akingarakin Ekapolon Akuj, nyepona kesi akingarakin Ekapolon Akuj ejie.”

²⁴Yael epiaritae anaberu, aberu a Eber alo erai Ekenisit, ngesi epiaritae anaberu ana elomito loeaman.

²⁵Elipi Sisera ngesi ngakipi, nakaneni nak ngakile, Ainuni ngesi elaabo a ngakile a atubwa anatiajokon.

²⁶Alemuni ngesi akitoe a eam a akan apei, tolem esebo akan anache Taram ngesi Sisera kirobak akou. Kichum ngesi toped akou.

²⁷Toriedik ngesi, tadakar, toper anakejen a Yael, tadakakin neni totoan.

²⁸Kingoliana itiokeng a Sisera alopuke a akai, Tokienyiana[11] ngesi kayaaye alaar, ingita ebala, “Kotere nyo etinenikinitor aurukuk keng? Nyo awouneta ngangolei keng abongun atipei?”

²⁹Tatachut ngaberu nakoosok erukito ka ngesi. Kitamana ngesi bon tama,

³⁰“Engasete kesi ngiboro ka akikor. Tolema asiger apei apese apei kori ngaarei, tolema Sisera eworu loajokon, asir na itakitae na anapi ayong alomosiring kang.”

³¹Ee Ekapolon Akuj, kimiek ngimoe kon daang totoaka kongina. Nakaneni kimiek ngipaalon kon tachaut loger a akolong ana ipiripiruuni! Sodi min ekisil nakwap a ngikaru a ngitomwon-omwon.