Read turkana Ngikatubok Ngakiro 6 Bible Online

Ngikatubok Ngakiro 6 - turkana bible

Ngikatubok Ngakiro 6

¹Tosechakis nabo Ngisirael Ekapolon Akuj. Kotere ngakiro nguna, abu ngesi kimiek Ngimidian epolokinete Ngisirael a ngikaru a ngikan-kaarei.

²Togogongioto Ngimidian akidwang Ngisirael, sodi toduka Ngisirael anaburiburio ka ngamoru, edukakinito Ngimidian.

³Arai nacha itakineta Ngisirael ngikinyam, pot Ngimidian, ka Ngiamalek ta ngitunga a akide kitijikis kesi.

⁴Alomeenete kesi nakwap kinyasut ngikinyam tanang kuju nakwap a Gasa. Tolemasi ngamesekin daang, ka ngaatuk ta ngisikiria. Kidongo Ngisirael emam akimuj.

⁵Aponeenete kesi ka ngaatuk kech ta ngieman, pot elalak loger a emaase. Alalak kesi ka ngikaala kech peapedorosi akimarun. Aponeenete kesi kinyasut akwap.

⁶Tolilimiyosi Ngisirael kotere Ngimidian. Kikaloikis kesi Ekapolon Akuj esakete akingarakino.

⁷Ani ikaloikinete Ngisirael Ekapolon Akuj esakete akingarakino kotere Ngimidian,

⁸abu Ekapolon Akuj tomeu ekadwaran Losirael. Tolimok ekadwaran ngolo kesi tama, “Ebala Ekapolon Akuj na erai Akuj a Isirael kona, ‘Kepuduni kolong ayong esi alo Misiri ani iraakatar ngikedalak.

⁹Katoyuu ayong esi ani Ngimisiri ka ngitunga lu kitijiete esi anakwap kana. Abu ayong erita kesi na ilooso esi ngaren, sodi kainak ayong esi akwap kech.

¹⁰Katolimok ayong esi atama, ayong arai Ekapolon Akuj na arai Akuj kus. Nyiilipa ngakujo a Ngiamor, alu tokona ilomito esi nakwap kech. Nakaneni ipot esi nyiiwap ngakiro kang.’ ”

¹¹Sodi bu emalaikat a Ekapolon Akuj nadakar a Opira, kiboikin kwap echoke lo arai eka Yoach, alo arai itwaan a ekitela a Abieser. Lokookeng lo anyaritae Gideon adai ngakanoi aniborosit anichiet emuna. Eweit ngesi ngakanoi nguna nyiingolikis Ngimidian ngesi.

¹²Bu emalaikat a Ekapolon Akuj nikeng kaneni tolimok tama, “Erukito Ekapolon akuj ka iyong, iyong lokooson togogong!”

¹³Tolimok Gideon ngesi tama, “Kimiekinae kengit, ekapolon, kotere nyo asubatar ngakiro nugu daang anikosi erai kirukit sua ka Ekapolon Akuj? Nyaanu bo ngakiro nakatalarak daang nakolong abalasi taapakosi sua asubi Ekapolon Akuj ebalasi, ‘Pekolong kiyauni ngoni Ekapolon Akuj alo Misiri a?’ Kiisik tokona Ekapolon Akuj sua, kimiekinea Ngimidian.”

¹⁴Sodi todungok Ekapolon ngesi tama, “Kape, tolot a ngikilinga alukon kalu toyuu Ngisirael ani eya Ngimidian. Ayong ilope kamearit iyong.”

¹⁵Tatachu Gideon tama, “Ekokini ayong ayuuni Ngisirael ai? Emachar kang ngesi emam agogongu alokitela a Manase, nabo ayong adit anawi kosi.”

¹⁶Tatachu Ekapolon Akuj tama, “Ipedori iyong kainyo kirukit ayong ka iyong. Imunyari iyong Ngimidian tosub keraakasi itwaan ipei.”

¹⁷Tatachu Gideon tama, “Ani ketalakarit ayong iyong, kidodikinae ayong atamar iyong dir irai Ekapolon Akuj.

¹⁸Nyiirotok kare, kidarou kainu alemunet kang a akimuj.” Tatachu ngesi tama, “Eboikin ayong tanang ibonguni iyong.”

¹⁹Sodi tolot Gideon kai keng kidorok ikale. Tolem ngakiloi ngatomon a ngakiria tosubakinea ngamugati na emam ekitoe lo itubui. Kiwaak ngesi akiring nakikap, kiwaak ngapoko namot, sodi inu emalaikat a Ekapolon Akuj alokwap echoke, dio ainakin ngesi.

²⁰Todungok emalaikat ngesi tama, “Tolem akiring ka ngamugati kidokok nataaba naga, sodi tobukok ngapoko alokidiama.” Tosubak Gideon loger ngolo.

²¹Ani erumor tolem emalaikat a Ekapolon Akuj aburo na atingit tatapea akiring ka ngamugati. Torirau akim anataaba tanomia akiring ka ngamugati. Ani erumor, topuripuriakin emalaikat.

²²Toyen Gideon atamar engolik ngesi emalaikat a Ekapolon Akuj, sodi tolim ebulit tama, “Ekapolon lo irai Ekapolon Akuj! Engolik ayong emalaikat kon kikenyikin!”

²³Nakaneni tolimok Ekapolon Akuj ngesi tama, “Min ekisil nikon. Nyiem. Nyitoani iyong.”

²⁴Todukok Gideon neni ekeno a ngakipeyos, sodi tolimok ekiro be “Ekapolon Akuj erai ekisil.” (Eringa ekeno ngolo eyei nadakar a Opira, na erai aka emachar a Abieser.)

²⁵Tolimok Ekapolon Akuj Gideon akolongit ngina nakwaare tama, “Tolem emong a apakon ka emong eche lo eraakasi ngikaru kech ngikan-kaarei, toyata ekeno a apakon lo ipeyonokinio Baal, sodi totubutubu akisikwaanet a akuj ana enyaritae Achera ana eyei lokwaas a ekeno.

²⁶Todukok ekeno a ngakipeyos loajokon a Ekapolon Akuj ana arai Akuj kon, Todukok kidiama ngasenon nguna. Ani erumor tolem emong lo a ngiarei sodi kipeye daang toliwor akipeyos na inomio, kinoma a ngakito a Achera ana itubutubi iyong.”

²⁷Sodi tolem Gideon ngikedalak keng ngitomon dio asubakin ngakiro na alimokinit ngesi Ekapolon Akuj. Ani kona aemitor ngesi ngitunga a awi keng ka ngitunga a ere, abu tosub ngakiro nguna nakwaare, meere naparan.

²⁸Ani ekienyunete ngitunga a ere nataparach toriamut ekeno a Baal kebwangabwangaar nabo ketubutubui akisikwaanet a Achera. Toriamut nabo emong lo a ngiarei kipeyoe alokeno alo kedukokin.

²⁹Kingitas make ebalasi, “Ekoe, ngae asubi ngakiro nugu?” Kingitanasi kesi sodi tangichut atamar Gideon lokookeng a Yoach asubi ngakiro nguna.

³⁰Tolimokis kesi Yoach tamasi, “Kipud lokookon nikalapatan nege, sodi taarae! Kainyo ayata ngesi ekeno a ngakipeyos a Baal nabo totubutubu akisikwaanet a Achera na ayei lokwaas a ekeno.”

³¹Nakaneni tolimok Yoach ngitunga lu aponito nikeng daang tama, “Ibakito esi ka Baal a? Kori iikinito esi Baal? Itwaan daang ni ibakito ka Baal eario eringa ataparach nyiwalara. Ani kerai Baal akuj, kimiekisi toikin bon. Erai ekeno a ngakipeyos keng ngesi ayatario.”

³²Akolongit ngina jik, apon tanyarae Gideon ekiro be Yerubaal,[12] ani alimunio Yoach tama, “Kimiekisi Baal toikin bon, erai ekeno a ngakipeyos keng ngesi ayatario.”

³³Ani erumor tochunakin Ngimidian daang, ka Ngiamalek ta ngitela a akide todokasi ekwakaye angolol a Yorudan, sodi toloma nadipo a Yesireel.

³⁴Min etau a Ekapolon Akuj nia Gideon, sodi tokutak ngesi aburuch anyarare ngikiliok a emachar a Abieser kiwapakis ngesi.

³⁵Tomea ngesi ngitunga lowaitin a Manase daang anyarare kesi kiwapakis ngesi. Tomea ngitunga anyarare ngitela a Acher ka Sebulun ta Naputal, toloto kirukosi ka kesi.

³⁶Ani erumor tolimok Gideon Akuj tama, “Ilim iyong atamar kitiyuuni iyong ayong Ngisirael.

³⁷Ewaak ayong ngajul a ngamesekin nalup nipalem kidaea sua ngakanoi. Kepean ngakop najul make, meere nalup, atoyen atamar kitiyuuni iyong ayong Ngisirael.”

³⁸Apot nguna tosubakin loger ngolo. Ani ekienyuni Gideon nataparach elilim, kichiamak ngajul sodi tochiiu ngakop kilelebun atubwa a ngakipi.

³⁹Sodi tolimok Gideon Akuj tama, “Nyikingoik. Kimiekinae eruorik apei bon. Kimiekinae atoro ngajul nugu aroet apei nabo. Kimiek tokona ngajul tooko, sodi tapapalaketa ngalup.”

⁴⁰Tosubak Akuj nguna akolongit ngina nakwaare. Ani iwalari ataparach, aokito ngajul, nakaneni toya ngakop wadaang analup.