Read turkana Ngikatubok Ngakiro 7 Bible Online

Ngikatubok Ngakiro 7 - turkana bible

Ngikatubok Ngakiro 7

¹Akolongit apei nataparach elilim, tonyout Gideon ka ngitunga keng toloma lokwaas a elelea a Arod. Alomit adakar a Ngimidian nadipo kwap kesi alomoru a More.

²Tolimok Ekapolon Akuj Gideon tama, “Kalalakinito ayong ngitunga lu irukitotor iyong kotere akisidwang kesi Ngimidian. Epedorete Ngisirael kiwogakinos make tamasi, ‘Kiyuun sua make.’ Sodi nyakainakis ayong ekipur.

³ Tolimok tokona ngitunga tama, ‘Itwaan daang ni eemit ejoikinit ebongori nawi, edongo sua nege moru a Gilead.’ ” Toroana Gideon ngitunga sodi tobongosi ngitunga ngabunge ngatomwon-arei ka ngaarei, kidongo ngabunge ngatomon.

⁴Sodi tolimok Ekapolon Akuj Gideon tama, “Eringa ngitunga elalak. Toriko kesi nakipi katotiakak ayong iyong kesi kaneni. Ani itwaan ni kalimokini ayong iyong atama, ‘irukorete itwaan en ka iyong’, elosi ngini. Ani atamari ayong, ‘Nyirukorete itwaan en ka iyong’, nyelosi ngini.”

⁵Sodi toriko Gideon kesi nakipi, tolimok ekapolon Akuj ngesi tama, “Kipaka itwaan daang ni ijakijaki ngakipi emasi a angajep loger a iingok, totiak ka ngitunga lu ekudokinosi a ngakungin kech tamata ngakipi.”

⁶Tookut ngitunga ngamiae ngauni ngakipi a ngakan kech kijakajakakis, nakaneni tokudokin luche daang a ngakungin tamata.

⁷Tolimok Ekapolon Akuj Gideon tama, “Ngitunga ngamiae ngauni lu ejakajakinete ngakipi emaase kesi kayuunea ayong esi kesidwang Ngimidian. Tobongosi ngitunga luche daang nawiyei kech.”

⁸Sodi kimiek Gideon Ngisirael luche daang tobongosi nawiyei, dio kisidong ngamiae ngauni. Ngulu kesi etingito ngiboro ka ngaburucho a ngitunga a luche. Arounito kesi adakar Ngimidian na eyei nadipo.

⁹Akolongit ngina nakwaare, tolimok Ekapolon Akuj Gideon tama, “Tonyou, totiyaar kitiji adakar, kainyo kesidwangi ayong iyong.

¹⁰Nakaneni ani kiemit iyong alosit akitijikin, kirukosi ka Pura lo erai ekasuban etich kon.

¹¹Iirari iyong ngakiro na iruosi kesi sodi taanyunea iyong agogongu na itijikinio.” Apot Gideon kirukosi ka Pura lo arai ekasuban etich keng, totiyaaros ni ayakasi ngasigerea anadakar a ngimoe.

¹²Akeikina Ngimidian, ka Ngiamalek, ta ngitunga a akide akeikina nadipo loger a emaase nabo alalak ngikaala kech loger a asinyen ana eyei lokwaas a anam.

¹³Napei anangunea Gideon neni, abu toriam ekile isisanakini loche ngakiro na erujae, ebala, “Erujae ayong amugati a ngakiria a ngimomwa ikokoriun nadakar yok, sodi tanang eam. Toukor eam toper analup.”

¹⁴Tatachu ekile loche tama, “Emam nabo iche, pearai ekileng a Esiraelit a lobe Gideon lokookeng a Yoach. Esidwang Akuj ngesi Ngimidian ka ngasigerea yok daang!”

¹⁵Ani iirari Gideon ngakiro a akirujare kangina, ka eger a ngakiro kanguna, abu ngesi toriedik kilip Akuj. Sodi tobongo ngesi nadakar tolimok Ngisirael tama, “Tonyoutu! Kisidwang Ekapolon Akuj esi ngasigerea a Ngimidian!”

¹⁶Totiak Gideon ngitunga keng lu araakasi ngamiae ngauni, totiak a ngalooso a ngauni sodi nak itwaan daang aburuch ka amot na eyei akinwaket tooma.

¹⁷Sodi tolimok kesi tama, “Kingolikinae ayong, tosubakis ngakiro na asubakini ayong esaa lokinangunea ngoni nikalapatan a adakar

¹⁸Nakikutakinea ayong ka ngitunga lukirukitor ngaburucho nakosi, tokutakis esi dang nakus alowaitin kadaang a adakar, sodi kiremasi ibalasi, ‘Eka Ekapolon Akuj ka Gideon!’ ”

¹⁹Apot Gideon ka ngikiliok lu arukitotor lu araakasi amiat apei tanangut nikalapatan a adakar keapiki kiding akwaar, akilokonyiet a itwaan ani eyoki adakar. Sodi tokutakis kesi ngaburucho nabo tabwanga ngamoti na ayakasi na atingito anakan kech.

²⁰Tokutakis ngalooso nauni daang ngaburucho nabo tobwanga ngamoti. Totinga ngakinwaket a ngakan kech ana alokedieny, totinga ngaburucho a ngakan kech ana aloteten, sodi kiremasi ebalasi, “Ekileng a Ekapolon Akuj ka Gideon!”

²¹Towaa kesi, itwaan daang alowae keng, kiriama adakar. Tamataros ngasigerea daang na a ngimoe igorosi.

²²Ani ekutakinete ngitunga a Gideon ngaburucho na araakasi ngamiae ngauni nguna, abu Ekapolon akuj kisibiler ngasigerea a ngimoe taaras make a ngilengea kech. Tamataros kesi lowae a Saretan tananga Bes Chita tanang lore a Abel- meola diyete Tabas.

²³Sodi tanyarae ngikiliok a Isirael alotela a Naputal ka Acher ta ngiwaitin daang a Manase pot kiritasi Ngimidian.

²⁴Tomea Gideon ngitunga nakwap daang na a ngimukur a Epiraim ebala, “Totiyaunos kitijikis Ngimidian. Kibaka anangolol a Yorudan ka ngayana daang tanang Besbara, kiratakis Ngimidian nyeedokasi ekwakaye.” Sodi tanyaraunae ngitunga a ekitela a Epiraim daang pot kibaka anangolol a Yorudan ka ngayana daang tanang Besbara.

²⁵Kirumut kesi Oreb ka Seeb lu araakasi ngikatukok a Ngimidian. Taarakis kesi Oreb nataaba a Oreb, sodi taarakis Seeb ni enyaritae nichiet emuna a Seeb. Kiwapakis kesi Ngimidian, sodi yaut ngakies a Oreb ka Seeb nia Gideon alo kide Yorudan.