Read turkana Ngikatubok Ngakiro 8 Bible Online

Ngikatubok Ngakiro 8 - turkana bible

Ngikatubok Ngakiro 8

¹Sodi tolimokis ngitunga a Epiraim Gideon tamasi, “Anukiro nugu kisubea iyong sua? Nyo pekinyaraa iyong sua na ilosio iyong akitijwore Ngimidian?” Apot kisuburata ngesi lokojokon.

²Tolimok ngesi kesi tama, “Anukiro apedo ayong asubakin na isikwaanikinio ka na isubakis esi, idwangito tani nadikidio isubakis esi ngitunga a Epiraim, na asubakis ngitunga a emachar kang a Abieser.

³Kotere agogongu a akuj, ipot esi taara Oreb ka Seeb lu araakasi ngikatukok a Ngimidian. Anukiro asubak ayong na isikwaanio ka nguna?” Ani elimuni Gideon nguna, apot kesi kiapakis angoit.

⁴Apot Gideon ka ngitunga keng lu araakasi ngamiae ngauni pot nangolol a Yorudan todokasi ekwakaye. Aburunit kesi, nakaneni aringa iwapito ngimoe.

⁵ Ani enangunete kesi lore a Sukos, tolimok ngesi ngitunga a Sukos tama, “Nakisi kare ngitunga lukang lugu ngamugati ngadi. Eburunit kesi, nakaneni ewapit ayong Seba ka Salimuna lu eraakasi ngikapolok a Ngimidian.”

⁶Nakaneni tatachut ngikarikok a Sukos tamasi, “Irum iyong Seba ka Salimuna ibalar iyong sua ainakisi ngasigerea kon akimuj a?”

⁷Sodi tolim Gideon tama. “Ani kikote neni, nakainakinea Ekapolon Akuj ayong Seba ka Salimuna, sodi erum kesi, kedesi ayong esi a ngiikwa ka ngirega lua ariet.”

⁸Tonyou Gideon kaneni, tolot Penuel. Tolimok ngitunga kaneni ngapei kiro nguna, sodi tatachakis ngitunga a Penuel ngesi ngakiro napei atachakinete ngitunga a Sukos.

⁹Tolimok ngesi ngitunga a Penuel tama, “Na abongunio ayong nabo a ekisil, aukori ayong adukoru nakus nakooyen naga!”

¹⁰Ayakasi Seba ka Salimuna lore a Karikor ka ngasigerea kech. Anasigerea kadaang ana a ngitunga a akide, ngitunga 15,000 make kesi apot kidongo. Ngasigerea 120,000 kesi apon taarae.

¹¹Sodi kiwapak Gideon erukudi alokwaas a ariet, ewae loa lokide Noba ka Yogibea, kituumwok ngasigerea kitijik.

¹²Tamataros Seba ka Salimuna lu araakasi ngikapolok a Gibeon, nakaneni kiwap Gideon kesi sodi kirum. Kitubul ngesi ngasigerea a Ngimidian daang.

¹³Tobongu Gideon lokookeng a Yoach alojie kitoru napak a Eres.

¹⁴Kirum ngesi esorokit lo abuni alo Sukos sodi kingitana ngakiro. Kigirak esorokit ngolo ngirora a ngikarikok a Sukos nak Gideon, araakasi ngikarikok ngulu ngitomwon-kaarei ka ngikan-kaarei.

¹⁵Ani erumor tolot Gideon lotunga a Sukos tolimok tama, “Kingolikisi Seba ka Salimuna lukolong kichiketa esi ayong ibalasi, ‘Irum iyong Seba ka Salimuna ibalar iyong sua nakisi ngasigerea kon na eburunit akimuj a?’ ”

¹⁶Ani erumor, tolem ngesi ngiikwa ka ngirega anariet kiriraa ngikarikok a Sukos.

¹⁷Touko nabo adukoru nakooyen alo Penuel sodi taar ngitunga alore kangolo.

¹⁸Ani erumor kingit Gideon Seba ka Salimuna tama, “Nyaalu ngitunga lukolong iarete esi alo Tabor?” Tatachut kesi tamasi, “Ekwaan kesi daang ka iyong. Ekoni ipei kech daang lokookeng a ekapolon.”

¹⁹Tolim Gideon tama, “Araakasi kesi talokaatokang, ngide a itiokang. Ekongi ayong ani Akuj atamar arai kolong nyiiar esi, pekaar ayong esi.”

²⁰Sodi tolimok Gideon lokookeng loapolon lo anyaritae Yeser tama, “Tonyou, taar kesi.” Nakaneni abu edia nyeeut ekileng keng. Toem ngesi ani araakar edia.

²¹Sodi Seba ka Salimuna tolimokis Gideon tamasi, “Tonyou iyong elope taarae sua. Ekile ngesi epedori akisub etich lo erai eka ekile.” Sodi tonyou Gideon taar Seba ka Salimuna, dio alemar asir na ayei lomosiringan a ngikaala kech.

²²Ani erumor tolimokis Ngisirael Gideon tamasi, “Topolokinoe sua, iyong ka ngalesea kon na isidiyete, kainyo kiyuu iyong sua ani a Ngimidian.”

²³Tatachu Gideon tama, “Nyakapolokini ayong esi, kori nyikipolokini lokookang esi. Ekapolon Akuj kipolokini esi.”

²⁴Nakaneni tolimok Gideon kesi tama, “Asaki ayong ibore ipei bon anikus. Kainak itwaan daang ayong ngamaritoi na eyakasi loboro lu engatarit ngesi.” (Anapito Ngimidian ngamaritoi a egolit loger a ngitunga aluche a ariet.)

²⁵Tatachut kesi tamasi, “Kicham sua ainakin iyong ngamaritoi.” Topetakis kesi awaru sodi tachakak itwaan daang ngamaritoi na angatarit ngesi.

²⁶Arai apotis a ngamaritoi ana a egolit ainakinio Gideon ngakiloi ngatomwon-arei, peimaritae asir, ka ngalagam ta ngiworui lupusiek-arengak lu anapito ngakapolok a Midian. Peemaritae tani ngiriko lu abutokinitae lomosiringan a ngikaala kech.

²⁷Tolem Gideon egolit ngolo tosubunea akuj nasubuna kiwaak nawi keng na eyei lore a Opira. Tongero Ngisirael daang Akuj toloto inaa akilip akuj nasubuna ngina. Arai ibore ngini elokit ani a Gideon ka ngitunga a awi keng.

²⁸Apot Ngisirael kidwanga Ngimidian tojongoto aemit. Min ekisil nakwap a ngikaru a ngitomwon-omwon tanang ni atoanea Gideon.

²⁹Tobongo Gideon lokookeng a Yoach nawi keng, kiboikin inaa.

³⁰Ayakasi Gideon talokookeng ngitomwon-kaarei, lu auri ngesi elope kainyo ayakasi ngesi ngaberu nakaalak.

³¹Ayei nabo ngesi apese a ngabwes na alomit Chekem. Abu apese a ngabwes ngina kidou idia a Gideon, sodi tanyara ekiro keng Abimelek.

³²Abu Gideon lokookeng a Yoach totoan emojongit noi, sodi tonukakinae ngesi naliel a Yoach alo arai apakeng. Ayei aliel ngina lore a Opira, alo arai ere a emachar a Abieser.

³³Ani ketoana Gideon kerumor, apot nabo Ngisirael tongero Akuj sodi kilipa ta Baal. Kitiliwosi kesi Baal na achamunet akuj kech.

³⁴Tapalikis Ngisirael akilipit Ekapolon Akuj na erai Akuj kech, nakolong ayuuni kesi alomoe kech alu eriamito kesi.

³⁵Emam naajokak apot kesi tosubeta ngitunga a awi a Gideon kotere ngakiro nakolong ajokak daang asubea ngesi Ngisirael.