Read turkana Ngikatubok Ngakiro 9 Bible Online

Ngikatubok Ngakiro 9 - turkana bible

Ngikatubok Ngakiro 9

¹Abu Abimelek lokookeng a Gideon tolot lore a Chekem, ni alomito ngiyenet a itiokeng daang, tolimok kesi tama,

²“Kingita ngitunga a Chekem daang tamasi, ‘Ichamito esi anu? Atamar kitopolokis talokookeng a Gideon lutomwon-kaarei daang kori epei bon?’ Kitamutu robo atamar arai ayong ngakoyo ka ngaakot kus.”

³Kisuruoro ngiyenet a itiokeng ngitunga a Chekem ngakiro naajokak kotere Abimelek, sodi apot ngitunga a Chekem totiakut akiwapakin Abimelek, ebalasi, “Erai ngesi lokaatokosi.”

⁴Tolemikis kesi Abimelek ngaropiyae ngatomwon-kaarei alokai a Baal ana a achamunet. Tolem Abimelek ngaropiyae nguna kigirea ngitunga luko aronok, kiwapakis kesi ngesi.

⁵Tolot Abimelek nawi a apakeng alo Opira, sodi taar talokaatokeng, lu araakasi ngitomwon-kaarei, taar daang alokidiama amoru apei. Nakaneni apon nyear Yosam lokookeng a Gideon loochi kainyo abu ngesi toduk.

⁶Ani erumor tochunakin ngitunga a Chekem daang ka Besmilo, toloto lochoke lo italeunitoe alo Chekem, sodi kitiliwosi Abimelek ekapolon.

⁷Ani iirari Yosam ngakiro nguna, abu ngesi tolot towo alokidiama emoru a Gerisim sodi kirema tolimok kesi tama, “Topupokinae ayong, esi ngitunga a Chekem, sodi kiirarea Akuj esi!

⁸Eriamiriamete kolong ngikito aseun ekapolon kech. Tolimokis kesi ekitoe a akimiet tamasi, ‘Toliwor ekapolon kosi.’

⁹Tatachu ekitoe akimiet tama, ‘Aisikini ayong atumes kang, na erai ngesi erimare ngakujo ka ngitunga atolot atubonor alokidiama ngikito a?’

¹⁰Sodi tolimokis ngikito emeyan tamasi, ‘Toliwor ekapolon kosi.’

¹¹Tatachak emeyan kesi tama, ‘Aisikin ayong abobou kang ka ageor naajokon atolot atubonor alokidiama ngikito a?’

¹²Sodi tolimokis emusabib tamasi, ‘Toliwor ekapolon kosi.’

¹³Tatachak emusabib kesi tama, ‘Aisikini ayong emuna kang lo italakanari ngakujo ka ngitunga atolot atubonor alokidiama ngikito a?’

¹⁴Sodi tolimokis ngikito daang eregae tamasi, ‘Toliwor ekapolon kosi.’

¹⁵Tatachak eregae kesi tama, ‘Ani kisakete esi iteni akitiliwor ayong ekapolon, potu kigienokinos etolim kang. Ani kemam, erirauni akim anaten kang ana a ngiikwa tonomiasi ngichekereng a Lebanon.’ ”

¹⁶Tolim nabo Yosam tama, “Tokona bocha, itiliworete kolong esi Abimelek ekapolon kotere ngakiro na iteni a? Ipot esi kidodikis Gideon arimatoi ka asubea ngitunga a awi keng niajokon, itemem ka ngakiro nakolong asubi ngesi a?

¹⁷Kitamutu atamar ajii kolong apakang kotere esi. Adikino ngesi etoani ani asakea ayuun esi ani a Ngimidian.

¹⁸Nakaneni inyoikis tokona esi ngitunga a awi a apakang, taara talokookeng alokidiama amoru apei. Nabo Abimelek, lo erai lokookeng apakang lo edouni akedalan keng, itiliwosi esi ngesi ekapolon a Chekem ani iyanatar ka esi.

¹⁹Tokona bocha, ani kerai ngakiro na isubeta esi Gideon ka ngitunga a awi keng akolongit naga ngaka iteni, talakaros robo ka Abimelek, sodi talakar ngesi ka esi.

²⁰Nakaneni ani pekikote neni, kimiek torirau akim ani a Abimelek sodi tonomia ngitunga a Chekem ka Besmilo. Torirau akim ani a ngitunga a Chekem ka Besmilo tonomia Abimelek.”

²¹Ani aloger aemitor Yosam lokaatokeng Abimelek, abu ngesi tamatar todok, tolot Beer.

²²Abu Abimelek topolok Isirael a ngikaru a nguuni.

²³Kiteremok Ekapolon Akuj Abimelek ka ngitunga a Chekem, sodi tongero kesi Abimelek.

²⁴Asubakinosi nguna kongina tatachakinor akitu a talokookeng a Gideon alutomwon-kaarei aarete Abimelek ka ngitunga a Chekem lu engarakinete ngesi akiar.

²⁵Tongero ngitunga a Chekem Abimelek sodi kidaa ngitunga alokidiama ngimoru toliworos ngirukooi lu ademete ngitunga lu etoruuniyete neni daang ngiboro. Tolimokinae Abimelek ngakiro nguna.

²⁶Sodi pot Gaal lokookeng a Ebed ka ngiyenet keng Chekem. Kigienokinos ngitunga a Chekem ngesi.

²⁷Toloto kesi daang namanat kech togerut ngamusabib, tochiut emuna sodi tosubakis esukukuu. Tolomasi kesi kai a akuj kech sodi kimuja nabo tamata, sodi kiruorotor Abimelek imenyete.

²⁸Tolim Gaal tama, “Ekoe a, kikoni ngoni ngitunga a Chekem ai? Erai Abimelek ngae kisubea ngoni etich keng? Meere ngesi lokookeng a Gideon a? Meere Sebul lo iwapit ngakiro na edunguni ngesi a? Kiwapa ngakiro a Amor alo erai apaakus, apakeng a Chekem!

²⁹Arai bo tarai ayong arikit ngitunga lugu dang, ketwarak ayong Abimelek! Kalimok atama, ‘Kiatak ngasigerea kon sodi tonyou toji.’ ”

³⁰Abu Sebul lo arai ngesi apolokinit ere ngolo, tongo kilelebun na eirarea ngakiro na alimuni Gaal.

³¹Tomea ngesi ngitunga nia Abimelek alo Aruma ebala, “Gaal lokookeng a Ebed ka ngiyenet keng, apot Chekem ayaut ekurikur. Kiratakinete kesi iyong nyiilom lore.

³²Tokona bocha, tonyoutu iyong ka ngitunga kon nakwaare toduka anaroatin.

³³Tonyout moi nataparach ipiripiruuni akolong kituumwokis ere toremo. Sodi ani epote Gaal ka ngitunga keng akitijikin esi, tarama lokojokon!”

³⁴Sodi tonyout Abimelek ka ngitunga keng daang nakwaare toloto toduka anikalapatan Chekem a ngalooso a ngoomwon.

³⁵Ani ingolikinete Abimelek ka ngitunga keng Gaal epuduni towo alokidor a ere, tonyout kesi anisek adukitotor.

³⁶Kingolik Gaal kesi sodi tolimok Sebul tama, “Kingolik! Ngitunga kui etiyauna alokidiama ngimoru!” Tatachu Sebul tama, “Meere ngiborei ngulu ngitunga, erai ngitorubei a ngimoru.”

³⁷Tolimu Gaal nabo tama, “Kingolik! Ngitunga kui ekokoriunito alomoru, nabo iwapuunit ajore ache erot lo ebunit alokitoe alobe emulon alo a ngikekeriak!”

³⁸Sodi tolimok Sebul ngesi tama, “Nyaani tokona akituk kon, iyong lo been ibala, ‘Ngae sek Abimelek, kisubea ngoni etich keng?’ Meere ngitunga lubeen imenyi iyong lugu a? Tonyou tokona tojwoto ka kesi.”

³⁹Toriko Gaal ngitunga a Chekem kitiji Abimelek.

⁴⁰Tamatar Gaal sodi kirita Abimelek ngesi. Towanawanaaros ngitunga lukaalak tanang lokidor a ere.

⁴¹Tolom Abimelek Aruma, sodi kirita Sebul Gaal ka ngiyenet keng nyiiboikinos Chekem nabo.

⁴²Ani akolongit nache, toloto ngitunga naroatin, sodi tolimokinae Abimelek.

⁴³Tolem ngesi ngitunga keng totiak a ngalooso a ngauni sodi toduka anaroatin idarito. Ani ingolikini ngesi ngitunga epudunete alore, topud ani adukitor, bu akiar kesi.

⁴⁴Ani ematarosi Abimelek ka atiaket nakeng akibak alokidor a ere, kitijikis ngalooso nache naarei ngitunga anaroatin taara daang.

⁴⁵Tojwoto ngitunga apaaran ngina daang. Tolema Abimelek ere sodi taar ngitunga a ere, toukono ngakais keng, dio aburuchiar ngalup a amakat.

⁴⁶Ani iirarete ngikarikok a adukuoru anaapolon a Chekem ngakiro nguna, toloto kesi esakete ayuun anawas anakaagongon a akai a Baal ana achamunet.

⁴⁷Tolimokinae Abimelek atamar echunakina kesi inaa.

⁴⁸Sodi kirukosi Abimelek ka ngitunga keng moru a Salimon. Tolem ngesi aep totub ateni a ekitoe sodi kidokok loseget keng. Tolimok ngesi ngitunga keng tama, “Nyo ingolikis esi ayong asubakini? Tosubakisi esi dang atipei.”

⁴⁹Sodi totub itwaan daang ateni a ekitoe. Kiwapakis kesi Abimelek sodi totukokis ngakito nawas nakaagongon ngina sodi kichunyakis akim, totoaka ngitunga lu ayakasi tooma neni daang. Araakasi kesi ngitunga abunget apei, ngikiliok ka ngaberu.

⁵⁰Ani erumor tolot Elimelek Sebes toji kaneni sodi tolema ere a Sebes.

⁵¹Nakaneni ayei adukuoru nakaagongon lore ngolo. Tamataros ngitunga a ere kangolo tooma sodi todokasi kidiama adukuoru ngina.

⁵²Tolot Abimelek nadukuoru ngina esaki akitijwore sodi taapia lokidor esaki akichunyakin akim.

⁵³Sodi kimasu aberu ache amoru nakirias todo nakou a Abimelek kirobak.

⁵⁴Sodi tanyarau Abimelek atipei esorokit lo atingakinit ngesi ngiboro keng lujiet, tolimok tama, “Tout ekileng kon kitaar ayong, nyekeruorotor ayong ngitunga ebalasi, ‘Aberu aari Abimelek.’ ” Sodi tout esorokit lokeng ngolo ekileng kichum ngesi toporu kayaaye, dio Abimelek totoan.

⁵⁵ Ani ingolikinete Ngisirael atamar atoana Abimelek, tobongosi nawiyei kech.

⁵⁶Eger ngolo ngesi atachakinea Akuj Abimelek akisech nakolong asubea ngesi apakeng, aarea talokaatokeng lutomwon-kaarei.

⁵⁷Sodi abu Akuj tobuak ngitunga a Chekem ngakiro nakolong aronok daang asubete kesi, tobongokinos kesi ngikulepek, loger cha lokolong elamea kesi Yosam lokookeng a Gideon.