Read turkana 3 Yoana 1 Bible Online

3 Yoana 1 - turkana bible

3 Yoana 1

¹ Ayong Ekasukout kegirakinit iyong Gayo lopae kang lo amina dir abarua naga.

²Lopae kang lo amina, kelipakinit atamar tojoketa ngakiro daang anikon, agasi atamar tojoker akwaan kon, loger lo ejokia etau.

³Alakar ayong noi na adolunioto ngikaitotoi lukiristoi ngiche sodi katolimokis ayong atamar imina iyong dir ngakiro na iteni, loger lo iwapitor iyong ngirwa daang ngakiro na iteni.

⁴Emam ibore ketalakari ayong akidwang akiirar atamar ibooyete ngide kang anakiro ana iteni.

⁵Lopae kang lo amina, kimunoi iyong alotich alo isubea iyong ngikiristoi luche, tani lu eraakasi ngipeyok.

⁶Alimonokis kesi ngitunga a ekanisa kane ngakiro a amina kon. Kingarak kare kesi torubakis eloose analotoru kech a erot alo ejoikinit Akuj.

⁷Kainyo esiakinete kesi akisub etich a Kiristo engerito akidiaun ngiboro lu a ngitunga alu nyeraakasi ngikanupak.

⁸Ejoikinit robo ngoni ngikiristoi kingarakini ngitunga lugu, sodi atosubeta ngoni dang etich lo a ngakiro ana iteni.

⁹Egirakini ayong ngitunga a ekanisa abarua nauriyen, nakaneni towou Diotirepe lo emina aliwor ekarikon kech amisikin ngakiro na alimuni ayong.

¹⁰Na abunio ayong, alimori ngakiro daang na esubi ngesi, ngakiro naaronok na kiruoror ngesi sua ka na isudi! Nakaneni meere nguna make asubi ngesi, nyitopeyoni tani ngikiristoi lukaitotoi na eponeta, nabo iratakinit tani lu esakete akitopeyon kesi, nabo esaki akikotar kesi alokanisa!

¹¹Lopae kang lo amina, wara nyiisisa ibore ni erono, nakaneni kisisa ni ejok. Itwaan cha daang ni esubi naajokak erai ika Akuj, itwaan cha daang ni esubi naaronok nyeanyungara Akuj.

¹²Ipuruunit itwaan daang Demeterio, elimorito tani ngakiro na iteni ngesi. Nabo kiatak sua dang ekipur kosi, iyenete esi atamar eraakasi na kiruoro sua ngaka iteni.

¹³Eyakasi ayong ngakiro nakaalak asaki alimokin, nakaneni nyasaki akigir ngakiro nguna nabarua.

¹⁴Etamit atamar kianyun ka iyong atipei sodi eana a ngakituk.

¹⁵Kagatakinit ekisil. Kimalaate ngipaalon kon. Kimala ngipaalon kosi daang a ngapeipei.