Read turkana Akitoodikinet 1 Bible Online

Akitoodikinet 1 - turkana bible

Akitoodikinet 1

¹Erai akitab naga aka ngakiro ana kolong edodiuni Yesu Kiristo. Aanyuni ngesi ngakitoodikinet nguna ani a Akuj, sodi kidodikinea ngesi ngikasubak etich keng ngakiro na ajoikinit esubakinosi atipei. Tomea Kiristo emalaikat keng nia ekasuban etich keng Yoana, kitoyen ngesi ngakiro nguna,

²nakaneni eruoro Yoana daang nakolong engolikini. Eraakasi nugu ngakiro na isisaunit ngesi na eponito ani a Akuj, ka nabo ngakiro na iteni na idodiunit Yesu Kiristo.

³Epiaritae itwaan ni isomae akitab naga, epiaritae tani lu epupete ngakiro na edwaritae nugu ka akiwap na igiritae nakitab naga! Kainyo aapuu esaa lo esubakinotor ngakiro nugu daang.

⁴ Ayong Yoana egirakinit abarua naga ngitunga a ngikanisae alukan-kaarei eyakasi Asia: Kagatakinit ajokis ka ekisil a Akuj, na tokona eyei, na kolong ayei nabo namoi ebuni. Kagatakinit tani ajokis ka ekisil a ngiborei a Akuj alu emam ngawat alukan-kaarei alu eya ngaren ekicholong keng,

⁵ kagatakinit tani nguna eponito ani a Yesu Kiristo alo erai ekaanyunan a Akuj lo emunoi, lo erai lo ekingaren iteyarunio alokatoak, lo erai ngesi epolokinit ngikapolok daang a akwap kana. Kimina ngesi ngoni, nabo kotere akitu keng, kiyuu ngesi ngoni anasechesea yok

⁶ sodi kitiliwo ngesi ngoni ngimurok a Akuj lu kisubi etich a Akuj ka apakeng. Min ekipur ka apolou nia Yesu Kiristo nakajik! Aamen.

⁷Kingolik a, ebunit ngesi alodowon! Ingolikini itwaan daang, tani lukolong echumete ngesi. Igorotor ngesi ngitunga daang anakwapea kadaang. Ikokinete nguna neni!

⁸Elimunit Ekapolon Akuj Naationon, na tokona eyei, na kolong ayei ka namoi ebuni ebala, “Ayong ngesi arai na ekingaren ka na esal.”

⁹Arai ayong Yoana lokaatokus, ani araakar erukitos a Kiristo, kirai ayong ka esi ngipei kinaikinit aboliaro na eanyunito ngulu eraakasi ngika a apolou keng. Ayei ayong Patimos, ni arai ekwar a anam, ayei neni kainyo etatami sek Ngakiro a Akuj ka ngakiro na iteni kedodikini Yesu.

¹⁰Akolongit a Ekapolon, ayei ayong agogongu a Etau a Akuj, eira alokaku kang etoil loapolon noi lo ikoni loa aburuch kesuruori.

¹¹Tolim tama, “Kigir daang na itee iyong nakitab, sodi yaa akitab ngina lokanisae lua ngirerea alukan-kaarei kalu: Epeso ka Simurina ka Perigamon ka Tuatira ka Saride ka Piladelipia ta Laodikea.”

¹²Atorei ayong asaki akingolikin itwaan ni kesuruori ayong, sodi engolik ayong ngasua na a egolit ngakan-kaarei na idokonokinio ngataae.

¹³Nakaneni ayei ibore ni asibit itwaan kiding kech, enapit ngiworui lu anangito kwap ngakejen nabo elogakinit aruba a egolit lorarum keng.

¹⁴Akwang ngitim keng ekote ngajul a ngamesekin, kori akwang kea, nabo anokete ngakonyen keng kona a akim.

¹⁵Amalimalete ngakejen keng ekote akwangat na kipusio nabo kileliae anakim. Ekoni eruye a etoil keng lo a ngakipi ana echakuna alokidiama akope.

¹⁶Atingit ngesi ngikanyer ngikan-kaarei anakan keng ana aloteten sodi topud ekileng lo ekwaka ngiwaitin ngiarei anakituk keng. Akwang ereet keng ekoni akolong na enoki naparan lotingilan.

¹⁷Na engolikinea ayong ngesi, atadakakin kwap diyete ngakejen keng loger a itwaan anikatoan. Kidokok ngesi akan keng na aloteten nakou kang tama, “Nyiem! Ayong ngesi lo ekingaren ka lo a esal.

¹⁸Ayong ngesi lo ayari! Atoanit ayong, nakaneni ayari tokona ayong nakajik! Apolokinit ayong akitu ka ni eya ngikatoak.

¹⁹Kigir tokona na itee iyong, ngiboro lu eraakasi ngesi itee iyong tokona kangulu esubakinosi ekisidi.

²⁰ Eger a ngakiro ana munonoe a ngikanyer alukan-kaarei itee iyong anakan kang ana aloteten, ka ngasua na a egolit nakan-kaarei ngesi nugu, eraakasi ngikanyer lukan-kaarei ngimalaikae a ngikanisae alukan-kaarei, ani ngasua na egolit nakan-kaarei, eraakasi ngikanisae lukan-kaarei.