Read turkana Akitoodikinet 10 Bible Online

Akitoodikinet 10 - turkana bible

Akitoodikinet 10

¹Sodi ataanyunga ayong emalaikat eche lo a ngikilinga etiyaun anadis. Etanapitae ngesi edou kiriamite alokakinet a Ekipe akou keng. Ekoni ereet keng akolong, kikote ngakejen keng ngapirio a akim.

²Atingit ngesi akitab naachi anakan keng, engaara. Kitowo ngesi akeju keng na a aloteten nanam, kitowo akeju na a alokedieny nalup nakoonok,

³sodi tanyarai ngesi irema, loger a ngingatunyo alu irurumaate. Na anyaraa ngesi, kiroposi ngagirokinet nakan-kaarei togirokis.

⁴ Ani napei eruorikineta kesi, atasak ayong akigirakin. Nakaneni eira ayong etoil anadis elimuni tama, “Kimunon ngakiro na alimunete ngagirokinet nakan-kaarei, wara nyiigirak nakitab!”

⁵Sodi emalaikat lo aanyungari ayong ewei ananam ka akwap nikoonon kikea akan keng na aloteten nadis

⁶sodi kikong a ekiro a Akuj ana eyari nakajik, ana kolong asubi adis ka akwap ka anam ta ibore daang ni eyei tooma kech. Tolim emalaikat tama, “Adaun ngirwa lukolong arubakinitere idaritae!

⁷Nakaneni esaa lo ekutakinea emalaikat lo a ngikan-kaarei aburuch keng, iyookini Akuj ngakiro keng namunonoe na erekinit, loger lokolong alimokinea ngikasubak etich keng, lu eraakasi ngikadwarak a Akuj.”

⁸ Sodi kesuruorik nabo ayong etoil losek eirari ayong iruoro anadis tama, “Kape tolema akitab na engaara na eyei nakan a emalaikat alo ewei ananam ka ngalup nakoonok.”

⁹Atolot ayong ni eyei emalaikat ngolo atolimok atamar kainak ayong akitab naachi ngina. Katolimok ngesi ayong tama, “Tolema tanyam, edwarer anakook kon, nakaneni eboboor anakituk kon loger a ao.”

¹⁰Atolema ayong akitab naachi ngina anakan keng sodi atanyam, abob noi anakituk kang ekoni ao. Nakaneni ani keliko ayong kerumor, todwarer anakook kang.

¹¹Dio katolimokin ayong tamarae, “Ejoikinit iyong nabo idwari ngakiro a Akuj ani eya ngitunga a ngakwapea ka ngibukui ka ngabukui ta ngikapolok.”