Read turkana Akitoodikinet 11 Bible Online

Akitoodikinet 11 - turkana bible

Akitoodikinet 11

¹Kainakin ayong asuat na itemere ibore, sodi katolimokin tamarae, “Kape kitem akai a Akuj ka ekeno lo ipeyonokinere Akuj, sodi kimaru lu ilipito alokai a Akuj.

²Nakaneni nyiitem ngiwaitin lu anikalapatan a akai a Akuj, kainyo ainakin ngiwaitin ngulu ngitunga lua ngibukui aluche, ngulu ipudaate ere lo italeuno ngolo a ngilapio a ngitomwon-omwon ka ngiarei.

³ Ameari ayong ngikaanyunak kang ngiarei enapito ngikuniae, elimorete kesi ngakiro kang ngirwa lu eraakasi abunget apei ka ngamiae ngaarei ka ngatomwon-kapei ngulu.”

⁴Ngikaanyunak luarei ngulu ngesi ngikito luarei a akimiet ka ngataae naarei ewaasi alongaren Ekapolon lo epolokinit akwap.

⁵Ani kesak itwaan akiwan kesi, elomuni akim anakituk kech sodi tomunya ngimoe kech. Ani kotere erot ngolo, eario itwaan cha daang ni esaki akiwan kesi.

⁶ Eyei kesi agogongu na egolioto adis, nyeeram akiru esaa lo iruorotor kesi ngakiro a Akuj. Eyei kesi tani agogongu na ibeloto ngileleae daang lu a ngakipi toliworos ngaakot, nabo eyei kesi agogongu na eyauneta ngakiro nakesiak nakwap, esaa daang lo esaketa kesi.

⁷Nakaneni na erumoreta ekiruor ngakiro nguna, ejiete kesi ka etiengit lo epuduni anadui ana nyesaluni. Idwangi ngesi kesi sodi taar,

⁸topero ngawat kech alorot a ere aloapolon, alo kolong aramakinere Ekapolon kech Yesu napir. Isikwaanitae ekiro a ere kangolo ka Sodom, kori Misiri.

⁹Ngitunga lu eponito anakwapea kadaang ka ngitela daang ka ngabukui daang ka ngibukui daang, isemeete ngawat kech a ngirwa a nguuni ka anus, nakaneni nyechamunete kesi enukio.

¹⁰ Elakarosi ngitunga a akwap kotere akitu a ngitunga aluarei kalu. Ichurokinete kesi nanakinos ngiboro, kainyo echanito sek ngikadwarak luarei ngulu ngitunga a ngakwapea noi.

¹¹Adaunet a ngirwa a luuni ka anus kangulu, toloma akianget na a akiyar ana abunit ani a Akuj nikech. Tonyout kesi towaa. Ngitunga daang lu aanyungarete kesi, tobul lokojokon noi.

¹²Dio kiirasi ngikadwarak a Akuj luarei ngulu etoil lo erema elimokini kesi anadis tama, “Potu kidiama nege!” Toloto kesi kidiama nadis eya lodou, iteete ngimoe kech.

¹³ Esaa lopei ngolo, tamaranik akwap lokojokon, kinyasunae ewae epei a ngiwaitin alutomon a ere. Totoaka ngitunga ngabunge ngakan-kaarei na amaranikinea akwap. Tobul ngitunga luche daang noi, kipuruut Akuj na a adis.

¹⁴Adaunosi ngakiro naaronok na a ngaarei, nakaneni etupuunete ngakiro naaronok na a ngauni atipei!

¹⁵Sodi tokutak emalaikat lo a ngikan-kaarei aburuch keng, kiirarae ngitoilio lu eremasi anadis ebalasi, “Erai tokona apolou na epolokinere akwap aka Ekapolon yok ka Kiristo keng, nakaneni epolokini ngesi nakajik!”

¹⁶Sodi ngikasukou lutomwon-arei ka nguomwon lu ebooyete alokicholongo kech alongaren Akuj tadakakin kwap ijuuruyete sodi kilipa Akuj,

¹⁷ ebalasi: “Ekapolon Akuj Naationon, na tokona iyei ka nakolong iyei! Kibuakinit iyong alakara noi ani ianyunea apolou kon naapolon noi nabo isiak iyong apolokin!

¹⁸ Angoyete lu nyeraakasi ngikanupak kilelebun, kainyo anang ngirwa a anyunyura kon, ngirwa lu iriraare ngikatoak. Anang ngirwa lu ipotorere ebachit, nakinae ngikadwarak, lu eraakasi ngikasubak etich kon, ka ngitunga kon daang ta lu kikerito iyong, napei aluuchik tanang ni luapolok. Anang ngirwa lu inyasunere lu inyasunito akwap!”

¹⁹Tangaarae akai a Akuj na eyei nadis, sodi taanyungarae asaduku na a Achamunet keng alokai keng. Sodi min akimileare ka agiro ka abelanakin a Ekipe ka amaran a akwap ta akiru naapolon na a ngamoru.