Read turkana Akitoodikinet 12 Bible Online

Akitoodikinet 12 - turkana bible

Akitoodikinet 12

¹Dio tatakanu ibore iche niapolon niliwo anadis. Ayei aberu na anapit akolong nabo ayei elap kwap ngakejen keng nabo ayei ekiraun a ngikanyer alutomon ka ngiarei nakou keng.

² Aapikinit ngesi akidoun, toriabakin ngesi noi kikalou esaki akidoun.

³Tatakanu nabo ibore iche niliwo anadis. Ayei emun loapolon loarengan lo ayakasi ngakies ngakan-kaarei ka ngaamwar ngatomon, toya ngikiraunea ngipei-pei nakies nakan-kaarei keng.

⁴Kiriu ngesi a ekosim keng atiaket apei ana a ngauni a ngikanyer kadaang alu ayakasi nadis sodi tachaku kesi kwap. Towo ngesi alongaren aberu esaki akinyam ikoku keng napei idounere.

⁵Dio kidou ngesi idia ni epolokini akwap daang a asuat anakapis. Nakaneni tokoporoe ikoku Nakuj ni eyei ekicholong keng a apolou.

⁶ Tamatar aberu tolot nariet, ni asubakini Akuj kotere ngesi, ni echoikinere ngesi a ngirwa a 1,260.

⁷Sodi kisiak ejie anadis. Kitijikis Mikael ka ngimalaikae keng emun loapolon ka ngimalaikae keng aapei,

⁸nakaneni kidwangae emun loapolon, kikotarae ngesi ka ngimalaikae keng tamarae nyeringa iboikinosi nadis.

⁹ Tachakarae emun loapolon kwap, emun lokolong ngorot ngolo, lo enyaritae Ekipe, kori Esiitan, lokolong engalae ngitunga daang anakwap. Tochakunae ngesi ka ngimalaikae keng daang nakwap.

¹⁰Sodi eira ayong etoil anadis ebala, “Abu tokona ayuuno na ebunit ani a Akuj! Edodiu tokona Akuj agogongu keng na eraakar Ekapolon! Edodiu tokona Kiristo apolou keng! Kainyo lokolong awei alongaren Akuj yok ititae ngikaitotoi yok akwaar ka apaaran, achakun kwap.

¹¹Epiut ngikaitotoi yok ngesi a ngaakot a Imesek ka ngakiro na iteni na etatamete kesi, kainyo ajalito kesi akiyar kech tanang tani ni atoaketa.

¹² Ani kotere nguna, talakaros esi daang anadis, talakaros ka luche daang ibooyete kaneni! Oitiakoi! Abe etioko nginyas epete nakwap ka anam! Kainyo abu Ekipe nikus, nabo engoit noi kainyo eyeni ngesi atamar ekidioko ngirwa keng lu idongito.”

¹³Na ayenea emun loapolon atamar kachakun ngesi kwap, tolomak akirisit aberu na edouni idia.

¹⁴Nakinae aberu ngina ngabeben ngaarei na a egole aloapolon sodi topororea nikeng nariet, ni eyuunere ngesi alomun a ngikaru a nguuni ka anus.

¹⁵Toleku emun loapolon ngolo akaale a ngakipi na ikoni na a angolol, tasak atamar kiwokosi ngakipi aberu ngina.

¹⁶Nakaneni kingarakis ngalup aberu, tangaama ngalup tongobasi ngakipi na alekuni emun anakituk keng.

¹⁷Tongoik emun loapolon aberu, tolot akitojwore ngalesea keng ka nabo lu iwapito ngitalio a Akuj, nabo tonupito dir ngakiro na iteni na esileereuni Yesu.

¹⁸Towo emun loapolon alokwaas a anam.