Read turkana Akitoodikinet 13 Bible Online

Akitoodikinet 13 - turkana bible

Akitoodikinet 13

¹Sodi ataanyunga etiengit epuduni ananam. Ayakasi ngaamwar ngatomon ka ngakies ngakan-kaarei, ayakasi ngikiraunea ngitomon naamwar natomon nguna. Ayakasi nabo ngirora ngikan-kaarei lu kiyenyet Akuj nakies nakan-kaarei nguna.

²Ekoni etiengit ngolo eris, ekote ngakejen keng na a ebu alokaadengan, nabo ekoni akituk na a engatuny. Nak emun loapolon ngolo etiengit agogongu keng ka ekicholong keng lo a apolou ka apolou keng na epol noi.

³Asibit akou apei a etiengit kangolo na ayei ajeme naaronon, nakaneni angalekinit ajeme ngina. Tatalasi ngitunga daang anakwap ngakiro a etiengit kangolo sodi kiwapakis ngesi.

⁴ Kilipa ngitunga daang emun loapolon ngolo kainyo ngesi ainakini etiengit ngolo apolou. Kilipa kesi tani etiengit ebalasi, “Ngae ikoni etiengit? Ngae itiji ngesi?”

⁵Tachamakinae etiengit ngolo iwoga a ngakiro ana iyenyea Akuj, tachamakinae nabo dang epolokini loger ngolo a ngilapio a ngitomwon-omwon ka ngiarei.

⁶Tolomak ngesi akimeny Akuj ka ekiro a Akuj, ka ni ibooyo Akuj ta daang lu ibooyete anadis.

⁷Tachamakinae ngesi itiji ngitunga a Akuj nabo kidwang kesi, nabo nakinae apolou na epolokinio ekitela daang ka ngakwapea daang ka ngabukui daang ta ngibukui daang.

⁸ Ilipete ngitunga daang lu eya nakwap ngesi, mati lu kolong egirio ngirora kech nakitab na a akiyar na a Imesek ani kolong aario. Egirio kolong ngirora ngulu eringa akwap nyesubakina.

⁹“Ani keya ngaki, kiira robo!

¹⁰Itwaan cha daang ni ejoikinit irumunio torikoe, ejoikinit erikio, itwaan cha daang ni ejoikinit eario a ekileng, ejoikinit eario a ekileng. Echamit ngitunga lu a Akuj eliworosi lu etitinyikinito noi nabo lu enupito.”

¹¹Sodi ataanyunga ayong etiengit eche lo alomuni analup. Ayakasi ngaamwar ngaarei na ekote ngaamwar a imesek, nabo eruoro ngesi loger a emun aloapolon.

¹²Kotere apolou daang na aanyuni ngesi ani a etiengit alo ekingaren, kidesik etiengit lo a ngiarei ngolo akwap daang ka ngitunga lu ibooyete anakwap akilip etiengit lo ekingaren, lo angaleki ajeme.

¹³Tosub etiengit lo a ngiarei ngakitoodikinet nakailiilok nakaalak, totiyau ngesi tani akim anadis totiyau kwap alongaren itwaan daang.

¹⁴Sodi kingala ngesi ngitunga daang lu ebooyete anakwap kotere ngakitoodikinet nakailiilok na achamakinio ngesi esubi alongaren etiengit lo a ekingaren. Tolimok etiengit kesi atamar tosubakis ekisikwaane lo itamununeta kesi etiengit lo awanio a ekileng sodi toyar.

¹⁵Tachamakinae etiengit lo a ngiarei iangakini akiyar ni eyei ekisikwaane losubuna lo a etiengit alo a ekingaren, sodi kiruorikinea ekisikwaane losubuna ngolo nabo taar daang lu nyilipete ngesi.

¹⁶Kidesik ngesi ngitunga daang, luapolok ka luuchik, ngikabarak ka ngikebootok, ngirikon ka lu nyerai ngirikon, atamar tamacharikinae emachar nakan kech na aloteten kori loreetin kech.

¹⁷Amam itwaan epedori akigiel ibore kori agielar emam emachar lo ekiro kangolo, lo erai ekiro a etiengit kori ekimar a ekiro keng.

¹⁸Eraakasi ngakiro nugu na esakete aosou. Itwaan cha daang ni echwaana, epedori akiyen ekimar a etiengit, kainyo erai ekimar ngolo ekiro a itwaan. Ekimar a ekiro kangolo ngesi 666.