Read turkana Akitoodikinet 14 Bible Online

Akitoodikinet 14 - turkana bible

Akitoodikinet 14

¹Sodi engolia ayong, ayei Imesek ni awei alomoru Sion. Arukito ngesi ka ngitunga lu araakasi 144,000 lu igiritae ekiro keng ka ekiro ka Apakeng loreetin kech.

²Sodi eira ayong etoil anadis lo aruo loger a ngakipi ana echakuna anakope nabo ekoni abelakinet a Ekipe nakaruon noi. Ekoni etoil lo aruo ngitoilio a ngikaeok alu idese ngagitae.

³Awaasi ngitunga ngulu alongaren ekicholong lo a apolou ka ngitieng lu ayarete luomwon ta ngikasukou. Amam ngitunga ngiche apedorete akiyen eeos ngolo mati ngitunga ngulu lu araakasi 144,000 lu alachunio anakwap.

⁴Ngitunga ngulu kesi lu nyepero ka ngaber a ache, kitaleunos a erot kangolo. Iwapito kesi Imesek awadaang ani cha elosi. Alachun kesi ani eya ngitunga luche, aliworosi lu a ekingaren lu elemikinio Akuj ka Imesek.

⁵ Nyelimuno kesi alioko a ache, kainyo emam akemer a akisech eyei nikech.

⁶Dio ataanyunga ayong emalaikat eche eporit alokidiama. Ayakasi ngesi Ngakiro Naajokak a akiyar ana nyedaun asaki alimokin ngitunga daang a akwap ka ebukut daang ka ekitela daang ka ngabukui daang ta ngakwapea daang.

⁷Kirema ngesi tama, “Tokera Akuj sodi kipuruut ngesi! Kainyo anang tokona esaa lo irira ngesi ngitunga. Kilipa lokolong asubuni adis ka akwap ka anam ta ngileleae a ngakipi!”

⁸ Kiwapak emalaikat lo a ngiarei lo a ekingaren ebala, “Aukor! Iteni dir, aukor Babilon naapolon! Ngitunga a Babilon lukolong etamaase ngitunga a ngakwapea kadaang emuna lo epuritoe, emuna lo adwaran lo a etereku a emalaanu kech!”

⁹Kiwapak emalaikat lo a nguuni luche luarei, irema ebala, “Itwaan cha daang ni ilipit etiengit ka ekisikwaane keng losubuna, sodi tamacharikinae emachar loreet keng kori nakan keng,

¹⁰emasi ngesi elope emuna lo epuritoe lo a Akuj, emuna lo a angoit keng, lo abukoki ngesi engoit noi lokopo lo a anyunyura keng! Daang lu emaase emuna ngolo, eboliare anakim ka akibirit, alongaren ngimalaikae lu italeuno ka Imesek.

¹¹ Idaui apuru a akim ana eboliare kesi kidiama nakajik. Ngitunga lu ilipito etiengit ka ekisikwaane losubuna ka itwaan daang ni emacharikinitae emachar a ekiro keng, nyiengunete akwaar ka apaaran.”

¹²Echamit ngitunga a Akuj eliworosi lu etitinyikinito, lu iwapito ngitalio a Akuj nabo tonupito ngakiro a Yesu.

¹³Sodi eira ayong etoil anadis ebala, “Kigirak nugu! Epiaritae lu etoakete alotich a Ekapolon napei tokona jik!” Elimunit Etau a Akuj ebala, “Iteni dir! Iengunete kesi alotichisio kech aluketuburunak kainyo irukete kesi ka ngitichisio lukolong asubete kesi.”

¹⁴Dio engolia ayong, engolik edou loakwaan. Engolik lo ebooyi alodou kangolo ikoni Lokookeng a Itwaan. Anapit ngesi ekiraun lo a egolit anakou keng, totingite ekileng lokakwanan anakan keng.

¹⁵Sodi tolom emalaikat eche alokai a Akuj sodi tanyara lo ebooyi alodou irema ebala, “Tolem ekileng kon lolemet tolemea ngalemet, kainyo anang esaa, akoko ngalemet anakwap!”

¹⁶ Sodi kimasa lo ebooyi alodou ekileng keng lolemet nakwap, sodi tolemae ngalemet na a akwap.

¹⁷Sodi ataanyunga ayong emalaikat eche epuduni alokai a Akuj ana eyei nadis, atingit ngesi dang ekileng lolemet lokakwanan.

¹⁸Sodi bu nabo emalaikat eche alokeno alo ipeyonokinere Akuj, emalaikat ngolo ngesi epolokinit akim. Tanyara ngesi lo atingit ekileng lolemet loakwanan irema ebala, “Tolem ekileng kon lolemet totub ngamusabib a ngimusabib a akwap, kainyo akoko ngamusabib!”

¹⁹Sodi kimasa emalaikat ekileng keng nakwap, totub ngamusabib alomusabib, sodi tachakak niborosit nichiet emuna ni erai anyunyura na engoitor Akuj noi.

²⁰ Tochuae ngamusabib aniborosit anichiet ayei nikalapatan a ere, toleleu akaale a ngaakot na asaluni ani ebayi ngakilomitae ngamiae ngauni, tarai atulukuk keng ngamitae ngaarei.