Read turkana Akitoodikinet 16 Bible Online

Akitoodikinet 16 - turkana bible

Akitoodikinet 16

¹Sodi eira etoil alokai a Akuj elimokini ngimalaikae lukan-kaarei ngulu irema tama, “Kapesi tobukokisi ngatubwae nakan-kaarei a anyunyura a Akuj nakwap!”

² Tolot emalaikat lo a ekingaren tobukok atubwa keng nakwap. Tatakanuut ngajemei nakariabak noi ani eya ngulu ayei emachar a etiengit ka ngulu elipete ekisikwaane keng losubuna.

³ Sodi tobukok emalaikat lo a ngiarei atubwa keng nanam. Kikokis ngakipi ngaakot a itwaan anikatoan sodi totoan ibore nikayaran daang eyei nanam.

⁴Dio tobukok emalaikat lo a nguuni atubwa keng nangololin ka ngileleae a ngakipi, sodi kilochos kesi toliworos ngaakot.

⁵Eira ayong emalaikat lo eweikinit ngakipi elimuni tama, “Ikongina Akuj na italeuno, na iyei ka nakolong iyei! Eraakasi ngakiro na idunguni iyong na etenooko.

⁶Abukorete kesi ngaakot a ngitunga a Akuj ka na a ngikadwarak a Akuj, nakaneni iinak iyong kesi ngaakot tamata. Aanyut kesi na ejoikinit eanyunete!”

⁷Sodi eira ayong etoil alokeno alo ipeyonokinere Akuj ebala, “Ekapolon Akuj Naationon Noi! Etenooko dir ngakiro na idunguni iyong eraakasi na iteni dir!”

⁸Dio tobukok emalaikat lo a nguomwon atubwa keng nakolong, sodi tachamakinae akolong enomi ngitunga a amonis keng anakariran.

⁹ Tonom kesi amonis nakariran sodi kimenya kesi ekiro a Akuj ana epolokinit ngakiro nakesiak nugu. Nakaneni towout kesi akilung ngasechesea kech, kipuro ngesi.

¹⁰Sodi tobukok emalaikat lo a ngikan atubwa keng lokicholong a apolou a etiengit. Toribok ni apolokinit etiengit ngolo chuch, sodi tokonya ngitunga ngangajepa kech eriabasi,

¹¹ sodi kimenya kesi Akuj na a adis kotere ariaba ka ngajemei kech. Nakaneni towout kesi akilung eboyor kech loaronon.

¹²Sodi tobukok emalaikat lo a ngikan-kapei atubwa keng nangolol naapolon enyaritae Eupurate. Kijua angolol, tosubakinor erot lo a ngikapolok alu epote alokide.

¹³Dio ataanyunga ayong ngipean nguuni lu ikote ngakidodoka. Alomunito anakituk a emun aloapolon, ka akituk a etiengit ka akituk a ekadwaran alokaliokon.

¹⁴Eraakasi kesi ngipean alu esubete ngakitoodikinet nakailiilok. Eloose ngipean luuni lugu daang lokapolok a ngakwapea, echunun kesi wapei tojioto Akolongit naapolon a Akuj Anaationon Noi.

¹⁵ “Topupok! Abuni ayong loger a ekokolan! Epiaritae noi itwaan ni ekienyi irichakinit ngiworui keng, sodi nyilaa ngesi emuner taanyu ngileech alokiding ngitunga!”

¹⁶ Sodi tochunut ngipean ngikapolok wapei ni enyaritae a Ngaeburaniae Arimagedon.

¹⁷Sodi tobuko emalaikat lo a ngikan-kaarei atubwa keng kidiama. Kiruorik etoil alowae alo ekicholong alo a apolou, alokai a Akuj, irema ebala, “Asubakin!”

¹⁸Kimileu akwap togirok ka abelakin, nabo tamaranik lokojokon. Nyemaranikina akwap loger ngolo a ache nakolong jik asubunere itwaan, amaranikin a akwap ngina ngesi erono noi idwangit daang!

¹⁹Tapak ere loapolon ngapaket ngauni, kinyasun ngirerea a ngakwapea kadaang. Nyimuriakina Akuj ere loapolon enyaritae Babilon. Kitamat ngesi emuna a ekopo keng, emuna lo epuritoe lo a anyunyura keng.

²⁰Tongopiyasi ngikwarin daang a anam, topuripuriakin ngimoru daang.

²¹ Totep akiru na a ngamoru ngitunga, erai apotis a amoru a apei ngakiloi ngatomwon-kan, kilama ngitunga ngulu Akuj kotere ngamoru na akiru nakesiak nguna, kainyo araakasi ngakiro nakesiak nguna naaronok noi.