Read turkana Akitoodikinet 17 Bible Online

Akitoodikinet 17 - turkana bible

Akitoodikinet 17

¹Sodi bu epei a ngimalaikae alukan-kaarei alu atingito ngatubwae nakan-kaarei katolimok ayong tama, “Bua sodi kedodik eger lo iriraare amalaat na eyenikinitae, ere loapolon lo edukitoe diyete ngangololin nakaalak.

² Asubete ngikapolok a ngakwapea emalaanu ka ngesi nabo kilewa ngitunga a ngakwapea ani amaasa emuna lo epuritoe lo emalaanu keng.”

³Katorik ayong Etau a Akuj kayaa emalaikat nariet. Ataanyunga ayong kaina aberu na ebooyi alotiengit alo a arengan alo egiritae akwaan wadaang ngirora lu imenyere Akuj. Ayakasi etiengit ngolo ngakies ngakan-kaarei ka ngaamwar ngatomon.

⁴Anapit aberu ngina ngiworui lupusiek arengak ka luarengak puu nabo asirit a ngiboro alu abutakina egolit ka ngamoru nakaalak a ngaropiyae ta ngache nakaalak a ngaropiyae enyaritae ngalului. Atingit ngesi ekopo lo a egolit lo eleleba anyunyura ka ngakiro naaronok na idodiunito elomit keng.

⁵Egirakinitae loreet keng ekiro lo eya ngakiro namunonoe, “Babilon naapolon, itiokeng a ngamalaae kadaang ka ngakiro daang naaronok anakwap.”

⁶Sodi ataanyunga aberu ngina ilewato ngaakot a ngitunga a Akuj ka ngitunga daang lu aario ani achamitotor Yesu. Na aanyungarea ayong ngesi, katatalasi ngakiro nguna noi.

⁷Kengit emalaikat tama, “Nyo kitalaritotor iyong ngakiro nugu? Kalimokini ayong iyong ngakiro namunonoe a aberu kangina ka etiengit lo iwokit ngesi, etiengit lo a ngakies anakan-kaarei ka ngaamwar natomon.

⁸ Ayari kolong etiengit ngolo, nakaneni nyeringa eyari, edikino epuduni anadui nakaneni elosi kinyasunae. Ngitunga lu ibooyete anakwap lukolong nyigira ngirora kech nakitab na a akiyar napei kolong anakisiakinet, etalarete daang ngakiro nguna na ingolikineta etiengit ngolo. Ayari kolong, ani erumor totoan. Eriangakinosi kesi na ingolikineta etakanuni nabo.

⁹“Esakete ngakiro nugu aosou ka achwaanu. Eraakasi ngakies nakan-kaarei ngimoru ngikan-kaarei lu ibooyo aberu. Eraakasi kesi dang ngikapolok ngikan-kaarei,

¹⁰adaunosi ngikan a ngikapolok alukan-kaarei kangulu, eringa epei epolokinit, nabo eringa loche nyebuno. Ani kebu ngesi, epolokini mono cha wadio.

¹¹ Ani etiengit lokolong ayari nakaneni nyeringa tokona eyari, erai ngesi ekapolon lo a ngikan-kauni, lo erai epei alukan-kaarei nakaneni eliwor lo inyasunio.

¹²“Eraakasi ngaamwar natomon na ianyunga iyong ngikapolok ngitomon lu nyisiekina apolokin, nakaneni echamakinio epolokinete aapei ka etiengit a esaa a epei.

¹³Erai ibore ni esakete lutomon ngulu ipei, nabo einakinete etiengit ngolo agogongu ka apolou kech daang.

¹⁴Ejiete kesi ka Imesek, nakaneni ipiunete Imesek ka lu kolong anyarae ngesi toseu, lu iwapito ngesi dir na iteni, ipiunete kainyo erai Imesek Ekapolon lo idwangit ngikapolok luche daang nabo Ekarikon lo idwangit ngikarikok luche daang.”

¹⁵Katolimok tani emalaikat ngolo ayong tama, “Ngakipi na ianyungari iyong amalaat ibooyo, erai ngakwapea ka ngitunga ka ngibukui ta ngabukui.

¹⁶Ngaamwar natomon ka etiengit lo ianyungari iyong, eremokinosi amalaat elemarete ibore daang ni etingit ngesi kimiekis ngesi emuner. Enyamete akiring keng kinyasut ngesi a akim.

¹⁷Kainyo ewaak Akuj lotai kech ekimue lo esubeta na esakit Akuj, kainyo echamunosi kesi make nakis etiengit agogongu na epolokinio tanang ni eliworotor ngakiro a Akuj ngaka iteni.

¹⁸“Erai aberu na ianyungari iyong ere loapolon lo epolokinit ngikapolok a ngakwapea.”