Read turkana Akitoodikinet 18 Bible Online

Akitoodikinet 18 - turkana bible

Akitoodikinet 18

¹Arumoret kanguna, ataanyunga ayong emalaikat eche etiyaun anadis. Apol noi apolou keng, sodi kinwaku akwangis keng akwap wadaang.

²Kirema ngesi lokojokon tama, “Aukor ngesi! Aukor Babilon naapolon! Aliwor tokona ni ibooyoto ngipean ka ngipara, aliwor ni ibooyoto ngikieny luaronok italeo akinyam ka lu kikadakinete noi.

³ Kainyo amat ngibukui daang emuna keng lo epuritoe, lo erai emuna loadwaran lo a etereku a emalaanu keng. Aloma ngikapolok a ngakwapea ka ngesi. Abara ngimuchurus a ngakwapea kotere etereku keng lo emam kona etitinyikinio.”

⁴Sodi eira ayong nabo etoil eche iruoro anadis ebala, “Topudutu ngitunga kang! Topudutu anikeng! Nyiimorikinosi esi ka ngesi isubete ngasechesea keng, sodi nyikiriraare esi ka ngesi aapei!

⁵ Kainyo ekokis ngasechesea keng na edokokin anang kidiama nadis, nakaneni eringa Akuj itamunit eboyor keng loaronon.

⁶Tosubeta napei kisubea ngesi esi, tatachakisi anikeng ngatachakinet ngaarei, nguna asubi ngesi daang. Kilelebikisi ekopo keng emuna loadwaran noi lo idwangit lokolong kipurokinit ngesi esi.

⁷ Kitaanyutu ngesi ngichan ka ariaba na itemem ka ekipur ta ajako nakolong aanyunit ngesi. Kainyo itami ngesi ebala: ‘Ebooyi ayong akapolon kane! Meere ayong apuserut, nyasutonokini ayong jik!’

⁸ Kotere nguna, ichanyuni ngesi akolongit apei ngakiro nakesiak, edeke ka ariaba ta akoro. Inomio ngesi a akim, kainyo Ekapolon Akuj na irirae ngesi, etiono.”

⁹Ngikapolok a ngakwapea lukolong alomete ka ngesi nabo kiboyoto alotereku, ikalounete kisutusuta na ingolikineta apuru na idaaui anakim ana enomi ere ngolo.

¹⁰ Ewaasi kesi echadakina nikalonan noi kainyo ekerito aboliaro ka ngesi aapei. Etamarete, “Oitiakoi kare! Abe eroko ngakiro nugu noi! Ere a Babilon daang lo eyenikinitae epolot etia ni etia, erirakin a esaa a epei bon a?”

¹¹Igorotor ngimuchurus a akwap tosutonokineta, kainyo emam itwaan eringa egieli ngiboro kech,

¹²emam itwaan egieli egolit kech ka akwangat na elalak ngaropiyae ka ngamoru na elalak ngaropiyae ta ngamoru elalak ngaropiyae na enyaritae ngalului, nyeringa egielio ngiworui kech ludielet ka lupusiek-arengak ka lunyusuk ta luarengak. Nyeringa egielio ngiboro lugelagelae lua ngakito ana elalak ngaropiyae ka ngiboro lua ngikel a etom, ka ngikito lu elalak ngaropiyae ka ngamaritoi ka asuat nanyang ta ngamoru na ikwaan ka akaleuleu.

¹³Nyeringa egielio ekitoe loongor-nyang lo itoboboe akimuj ka lo itukukunyi akimuj ka emitina, ka ekinyaate lokakukunyon todwar ta eche lokakukunyon, ka emuna lu epuritoe ka akimiet ka ngakiria ka ngakanoi ka ngaatuk ka ngamesekin ka ngangolei ka ngaurukukui, ka ngikedalak ta tani ngitai a ngitunga.

¹⁴Tolimokis ngesi ngimuchurus tamasi, “Angopiasi ngiboro daang luajokak lukolong kimuit iyong aanyun, adaun ebari kon daang ka akibuseanu kon, nakaneni nyianyuni iyong kesi nabo!”

¹⁵Echadakinosi ngimuchurus lukolong abarete ani asubeta emuchuruseenu alore kangolo, towaa anialonan, kainyo ekerito kesi ariaba ka ngesi aapei. Igorosi kesi nabo tosutonokis,

¹⁶sodi tolimut tamasi, “Oitiakoi kare! Abe eroko ngakiro na apot lore lo a apolon logo! Anapit kolong ngesi ngawarui nadapal, napusiek-arengak ka naarengak puu, nabo tobutakina ngiboro lua egolit ka ngamoru na elalak ngaropiyae ta ngamoru na elalak ngaropiyae na enyaritae ngalului!

¹⁷Sodi tongopia ebari ngolo daang a esaa a epei!” Ngikapolok a ngatubwae daang ka lu adokito ngatubwae ka lu esubete etich anatubwae, ta lu eyarakinito nanam, towaa anialonan,

¹⁸sodi kiremasi na aanyungareta apuru na idaui anakim ana enomi ere ngolo tamasi, “Emam ere eche nakanuan lo ikoni ere loapolon logo!”

¹⁹ Tobukokis apua nakies kech, kikalout ka asutonokina ebalasi, “Oitiakoi kare! Abe eroko ngakiro na apot lore loapolon logo! Erai ngesi ere lo abarakinete daang lu ameto ngatubwae kech ananamea! Nakaneni angopiki ngesi ibore daang a esaa a epei!”

²⁰ Talakar adis ani enyasunor ngesi! Talakaros ngitunga a Akuj ka ngimeanara ta ngikadwarak a Akuj! Kainyo erira Akuj ngesi kotere nakisubea ngesi esi!

²¹Dio kikeu emalaikat epei loti a ngikilinga amoru na etia akiries naapolon sodi achakakin nanam ebala, “Ikokinio ere loapolon a Babilon ewatario kwap nege, sodi nyeanyungar nabo!

²²Eruye a ngagitae ka na a ngitoilio a ngitunga alu ekusete ebune ka aburuch, nyeringa iirario anikon nabo! Emam ekadukon lo eyeni akiduk ibore tani ipei emini nikon. Emam tani itwaan iirari eruye a akiries!

²³ Nyeringa nabo akicha a ataa etakanuni alotooma kon, nyeringa nabo ngitoilio a ngikiliok alu iutasi ka ngaberu na iusio iirario anikon. Araakasi ngimuchurus kon ngikapolok anakwapea kadaang, nabo kotere amuronot na a alioko, kingalata ngitunga daang lua ngakwapea!”

²⁴Kirirae Babilon kainyo arukaunio ngaakot a ngikadwarak ka ngitunga a Akuj, alore. Iteni dir, ngaakot kadaang alu aario anakwap.