Read turkana Akitoodikinet 19 Bible Online

Akitoodikinet 19 - turkana bible

Akitoodikinet 19

¹Arumoret kanguna, eira ibore ni ikoni echale loapolon a asepich a ngitunga anadis ebala, “Kipuroe Akuj! Eraakasi ayuuno ka ekipur ta agogongu ngaka a Akuj yok.

²Eraakasi ngakiro na edunguni ngesi na iteni na eriyan! Enyasu ngesi amalaat nakolong enyasunit ngitunga a akwap a emalaanu keng. Erira Akuj ngesi ani aarea ngikasubak etich keng.”

³Kiremasi kesi nabo tamasi, “Kipuroe Akuj! Idaui apuru na a akim ana enomi ere loapolon ngolo kidiama nakajik!”

⁴ Kibusokinos ngikasukou lutomwon-arei ka nguomwon ka ngisubuna lu ayarete nguomwon kwap sodi kilipa Akuj, na ebooyi alokicholong a apolou keng. Tolimut tamasi, “Aamen! Kipuroe Akuj!”

⁵Sodi eira ayong etoil alokicholong a apolou a Akuj ebala “Kipuro Akuj yok, ngikasubak etich keng daang ka ngitunga daang, luuchika ka luapolok aapei, lu ikerito ngesi!”

⁶Sodi eira ibore ni ikoni echale lo asepich a ngitunga, lo ikoni eruye a ngakipi ana imasuna anakope, nabo ikoni abelakinet a Ekipe nakaruon. Eira ayong kesi elimunete tamasi, “Kipuroe Akuj! Kainyo Ekapolon Akuj Naationon na erai Akuj yok ngesi erai Akarikon!

⁷Atalakaros atagata ngesi, epuro apolou keng! Kainyo anang esaa lo a akuuta a Imesek, asubakin ateran na iusio idarit ngesi.

⁸ Ainakin ngesi ngiworui luajokak kamalamalak.” (Ngakiro naajokak esubete ngitunga a Akuj kesi eraakasi ngiworui luajokak).

⁹Sodi katolimok ayong emalaikat tama, “Kigir nugu: Epiaritae noi lu anyaraun nakimuj a akuuta a Imesek a Akuj.” Sodi kiatak emalaikat tama, “Ngakiro nugu ngesi na iteni a Akuj.”

¹⁰Ebusokin ayong kwap diye ngakejen keng asaki akilip ngesi, nakaneni katolimok ngesi ayong tama, “Nyiikok neni! Arai ayong dang ekasuban etich loger kon ka ngikaitotoi kon, kirichakinit ngoni daang ngakiro na iteni na edodiuni Yesu. Kilip iyong Akuj!” Kainyo ngakiro na iteni edodiuni Yesu ngesi adwarete ngikadwarak a Akuj.

¹¹Sodi ataanyunga ayong adis engaar, ayei angole naakwaan inaa. Anyaritae ekamean angole ngina, lo Emunoi dir lo a Iteni. Erai ngesi ekeriran ka ekajwon a eboyor alo etenoono.

¹²Ekote ngakonyen keng asarae a akim nabo anapit ngesi ngikiraunea lukaalak anakou keng. Egiritae ekiro kidiama keng, nakaneni emam itwaan eyeni atamar erai ekiro ngolo nyo mati ngesi bon elope.

¹³Anapit ngesi eworu lo abutarito ngaakot. Ekiro keng ngesi, “Akiroit a Akuj.”

¹⁴Ewapito ngasigerea a adis ngesi edokito ngangolei naakwaak tanapito ngiworui lu italeuno luakwaak kea.

¹⁵Apudununi ekileng lokakwanan anakituk a ekamean angole kangolo lo idwangea ngesi ngibukui a ngakwapea. Epolokini ngesi kesi a asuat anakapis ka akichii emuna lo epuritoe niborosit nichiet emuna, erai iborosit ngini nia anyunyura ana engoitor Akuj Naationon.

¹⁶ Egiritae ekiro logo kidiama eworu keng ka ngakejen keng, “Ekarikon lo idwangit ngikarikok daang ka Ekapolon lo idwangit ngikapolok daang.”

¹⁷Sodi ataanyunga ayong emalaikat ewei anakolong. Kirema ngesi tolimok ngikieny daang lu aporito alokidiama tama, “Potu! Tochunakinos wapei kotere esukukuu loapolon a Akuj!

¹⁸ Potu tanyama ngaringo a ngikarikok ka ngikarikok a ngasigerea ka ngasigerea ka ngaringo a ngangolei ka na a ngikameak ngangolei ta na a ngitunga kadaang, alu eraakasi ngirikon ka lu nyeraakasi ngirikon ta luuchik ka luapolok!”

¹⁹Sodi ataanyunga ayong etiengit ka ngikarikok a ngakwapea ka ngasigerea kech echunakin akitojwore lo ameat angole ka ngasigerea keng.

²⁰Kirumunae etiengit ngolo toenae aapei ka ekadwaran lokaliokon lo asubi ngakitoodikinet nakailiilok alongaren keng. (Ngakitoodikinet nakailiilok nguna ngesi engalaa ngesi lu eyei emachar a etiengit ka lu elipito ekisikwaane losubuna a etiengit kangolo.) Etiengit ngolo ka ekadwaran lokaliokon, tachakakinae eyarete nanam na a akim na itonoki akibirit.

²¹ Taarae ngasigerea keng a ekileng alo epuduni anakituk kangolo ameat angole. Sodi tanyama ngikieny daang ngaringo kech kimwoko.